Ruhaniyat Twlğalar Qazaq şejiresi Ädebi älem
Seniñ ülkendigiñ men saqalıñnıñ qadirli ekendigi ras. Biraq…
kerey.kz
Estelik 1964 jılı Eskendir esimdi aqsaqaldıñ auızınan jazılıp alınğan eken (Qazaqtıñ ata zañdarı, IX tom, 196 bet)
***
Bir jılı Abaydıñ üyinde köp kisi tüstenip otırsa, Kötbaq qara Qazıbek deytin ösekşi, qıdırmaşı kirip kelipti. Ol esikten kire sälem berip:
– E, qwday aydap, bwyırğan tağamğa kez kelgenimdi qaraşı, – dep qolın jumastan tabaqqa qaray entelep kele jatsa, Abay zildi ünmen:
Qayda barasıñ öñmeñdep, otır sol jerge, – depti. Qazıbek ne derin bilmey sılq etip otıra ketipti.
Abay Qazıbekti qayırıp tastağan soñ bir söz aytpastan, qonaqtarımen etti jey beripti. Et artınan şay işilipti. Qazıbekti şayğa da şaqırmaptı. Tamaq işip bolısımen jwrttıñ bäri şığıp bara jatqanda Qazıbek te kete bermek bolıp türegelgende, Abay «otır» dep işara jasaptı. Qazıbek qayıra otırıptı. Sonda Abay:
Sen öziñ ösek jinaysıñ, bireudiñ dauın satıp alıp, aytısqa tüsesiñ. Osınıñ bäri bir qwdaydıñ bwyrığı ma? – depti. Qazıbek eşteñe dep ündey almaptı.
Al sen jaña «Qwday aydap, bwyırğan tağamğa tap keldim-au» dep ediñ. Bwyırdı ma sol tağam, joq pa? – depti. Qazıbek:
Bwyırmadı, – depti. Abay:
Ol solay. Sen as üşin arıñdı satıp, bwyırmağan astan işemin dediñ. Onı bwyırıp twr dediñ. Käne, bwyırğanı. Onan da «qañğırıp jürip as üstine kez boldım-au» dep nege aytpadıñ? Jeytin tamağıñdı şınıñdı aytıp jeseñ neñ ketedi, – dep wrsıptı. Sonda Qazıbek otırıp:
Abay, qazaqtıñ bir ırım saltı bar-tın. Ülkenin sıylauşı edi, tım bolmağanda saqalımdı sıylasañ etti, – depti. Sonda Abay:
Saqalın satqan käriden, eñbegin satqan bala artıq. Seniñ ülkendigiñ men saqalıñnıñ qadirli ekendigi ras. Biraq sonıñ qadirin öziñ ketirip jürsiñ ğoy. Öziñ sıylamağan saqaldı jwrt ne qılsın? – dep jauap qatqan eken.
Pikir qaldıru