АСПАННАН ТҮСКЕН МИЛЛИОНЕР
kerey.kz
facebook парақшасынан
“Сығанақ” қаласының ішінде “Қазақ елі” тарихи сериалының “Халық көтерілісі” сахнасын түсіріп жатқан едік. Дəл төбемізден “гүр” етіп, “Бидайықтың көл жайқаған жалғызындай” бір тікұшақ ұшып өте шықпасы бар ма! “Мынау қайтеді-ей”, – деп қойып, түсірілімді жалғастыра бердік. Сәлден соң, түскі асқа берілетін 40 минуттық үзілісті пайдаланатын əдетіммен Іле бойын жағалап кеттім. Жоғары өрлеп келе жатыр едім, бағанағы тікұшақтың өкпе тұсымнан шыға келгені. Тым төменде ұшып жүр, қамысқа қонайын деп жүрген кəдімгі инелік сияқты, үшкіл тұмсығымен су жағасындағы алып жартастарға сүйкене таяп барып “үңіледі” де, қайта серпіледі. Бір кезде шұғыл бұрылып, осының бəрін қызықтап қарап тұрған маған қарай төтелей салды. Əуелде өтіп кетер деп ойлаған ем, жоқ, тура мені бетке алып, дəл қасыма қонғалы келе жатыр. Бұл да бір қызық болды ғой деп, қарсы жүрдім. Сол екі ортада жерге қонған шай қасықтай ғана тік ұшақтың аядай кабинасынан жапырласып үш адам түсті де, ыржия күліп, маған қарай адымдады. Бір-бірімізді баяғыдан білетін кісілерше емен-жарқын амандасып, жөн сұрасып жатырмыз.
- Менің атым Степан, мына кісінің есімі Андре, Швейцария банкісінің басшысы, Қазақстанға арнайы саяхатқа келді, əлемдегі ұлы шыңдардың түгелге жуығын оттегі құтысын пайдаланбай бағындырған атақты, кəсіпқой альпинист, ендігі арманы Хантəңірі шыңына шығу, бүгін Хантəңірі шыңын барлап қайтуға шығып едік, жолымыз болмады, Алатауды қалың бұлт құрсап жатыр екен, амалсыз кері бұрылып, Іле бойын шола кетейік деп шештік, бұл кісінің келгендігі бір мақсаты – “Таңбалы тасты” көру еді, көрінген жартастың төбесіне шүйіліп оны да таба алмадық, енді қайтып бара жатырмыз, бірақ, Андре мырза сіздер кино түсіріп жатқан мына қамалдың ішін аралап көргісі келеді, бұл мүмкін бе, сіз мұнда кім болып істейсіз, бізді ішке өткізе аласыз ба? – деп өтініш білдіре тоқтады аудармашы.
Мен жөнімді білдіріп, олардың бұл өтінішін орындауға пәрменді екенімді айтқанымда екеуі кəдімгідей қуанысып қалды. “Тіпті “Таңбалы тасты” да көрсетемін”, – дегенімде, əсіресе миллионер банкир (əйгілі Швейцария миллионері екен) балаша мəз-мейрам болды:
- Бағана үстеріңізден төмен ұшып өттік, кино түсіріп жатқандарыңызды кеш байқадық, түсірілімдеріңізге кедергі жасасақ, ғафу етіңіз, – деп қалбалақтап жатыр банкир мырза.
Жүре əңгімелесіп, “Сығанақтың” ішіне кірдік, іші-сыртын тегіс аралатып, актерлермен таныстырдым, олар да жапырласып фотаға түсуде, Андренің де қолағаштай фотаапаратында тыным жоқ, əсіресе оған түйелер қызық болды-ау деймін, əйтеуір шыртылдатып бағуда. Сөйтіп жүргенде сағаттарына жалт-жалт қарасқан саяхатшылар уақыттарының болып қалғанын айтып, тікұшақтарына қарай асыға басып, жөнеп берді. Кетіп бара жатып қолымды ризашылықпен қысып тұрып, “Таңбалы тастың” жолын сұрауды да ұмытқан жоқ.
Жолаушыларын мінгізіп ала сала, қасықтай тікұшақ инеліктей лып етіп жоғары көтерілді де, дөң маңдайын “Таңбалы тасқа” қарай төсеп, ұша жөнелді. Біз төменде қала бердік. Тікұшақты көзіммен ұзатып салып тұрып: “Самолет, самолет, бізді өзіңмен ала кет” деген бала кезде айырплан көргенде айтатын “əнді” ішімнен айтып тұрғанымда, неге екені белгісіз, ұрлаған ақшасын офшорларға тығатын өзіміздің жемқор шенеуніктер есіме түсті…
Мына суреттер сонда түскен фоталар еді:
Пікір қалдыру