“قازاتومونەركاسىپ” اق ديرەكتورلار كەڭەسىنىڭ باسشىسى اۋىستى، – دەپ حابارلايدى Tengrinews.kz ءتىلشىسى كومپانيانىڭ ءباسپاسوز قىزمەتىنە سىلتەمە جاساپ.

“سامۇرىق-قازىنا” ۇاق” اق باسقارماسىنىڭ سىرتتاي وتىرىسىنىڭ قورىتىندىسى بويىنشا “قازاتومونەركاسىپ” ۇاك” اق ديرەكتورلار كەڭەسىنىڭ قۇرامى مەن وكىلەتتىلىك مەرزىمى انىقتالىپ، كەڭەس مۇشەلەرى جانە توراعاسى سايلاندى.

“قازاقستان رەسپۋبليكاسى پرەمەر-ءمينيسترىنىڭ ءبىرىنشى ورىنباسارى باقىتجان ءابدىرۇلى ساعىنتاەۆ “سامۇرىق-قازىنا” اق باسقارماسىنىڭ شەشىمىمەن جالعىز اكتسيونەردىڭ وكىلى رەتىندە “قازاتومونەركاسىپ” ۇاك” اق ديرەكتورلار كەڭەسىنىڭ توراعاسى بولىپ سايلاندى”، – دەلىنگەن حابارلامادا.

سونىمەن قاتار، “قازاتومونەركاسىپ” ۇاك” اق ديرەكتورلار كەڭەسىنىڭ جاڭا قۇرامى بەلگىلى بولدى. ولار: بەكتەمىروۆ قۋانىش ابدىعاليۇلى – جالعىز اكتسيونەردىڭ وكىلى، “سامۇرىق-قازىنا” اق اكتيۆتەرىن باسقارۋ جونىندەگى باس ديرەكتور; تۇرماعامبەتوۆ ءماجيت ابدىقالىقۇلى – جالعىز اكتسيونەردىڭ وكىلى، “تاۋ-كەن سامۇرىق” اق باسقارما توراعاسى; ارسلانوۆا زارينا فۋاتوۆنا – تاۋەلسىز ديرەكتور; جۇماعاليەۆ اسقار قۋانىشۇلى – “قازاتومونەركاسىپ” ۇاك” اق باسقارما توراعاسى. ايتا كەتەيىك، “قازاتومونەركاسىپ” ۇاك” اق ديرەكتورلار كەڭەسىنىڭ وكىلەتتى مەرزىمى – ءبىر جىل.

ەسكە سالايىق، مامىر ايىندا “قازاتومونەركاسىپ” ۇاك” اق باسشىسى بولىپ بۇعان دەيىن قر ينۆەستيتسيالار جانە دامۋ ۆيتسە-ءمينيسترى قىزمەتىن اتقارعان اسقار جۇماعاليەۆ تاعايىندالعان ەدى. ونىڭ كانديداتۋراسى ديرەكتورلار كەڭەسىنىڭ كەزەكتەن تىس وتىرىسىندا ماقۇلدانىپ، قازاقستان رەسپۋبليكاسىنىڭ ۇكىمەتىمەن كەلىسىلگەن. وسىعان دەيىن قر ءسىم ءباسپاسوز قىزمەتى 26 ناۋرىزدا پەكين ۋاقىتى بويىنشا 14.30-دا “قازاتومونەركاسىپ” ۇاك” اق باسقارما توراعاسى نۇرلان قاپپاروۆتىڭ قىتايدا قايتىس بولعانىن حابارلادى. ونىڭ جۇرەگى توقتاپ قالعان. 31 ناۋرىزدا “قازاتومونەركاسىپ” ۇاك” اق باسقارما توراعاسى كومپانياسىنىڭ ۋاقىتشا مىندەتىن اتقارۋشى بولىپ وسىعان دەيىن باسقارما توراعاسىنىڭ ەكونوميكا جانە قارجى جونىندەگى ورىنباسارى بولىپ كەلگەن ايدار ءارىپحانوۆ تاعايىندالعان بولاتىن.