— Qanat ağa, jiırmasınşı jeñisiñiz qwttı bolsın! Qazaqtıñ abıroyın asqaqtatıp, bedelin tağı bir köterdiñiz. Şın quandıq. Qarsılasıñızdı alğaşqı raundta-aq qwlattıñız. Eñ oñay jekpe-jegiñiz osı bolğan şığar?

— Men bwl jarısqa öte köp dayındaldım. Negizi bwl jekpe-jek säl erterek ötu kerek edi. Türli sebeptermen keyinge şegerile berdi. Şamamen 6 ay boyı osı jarıstı küttim. Sport ol qiındıqtardan twradı. Biik beles bağındırıp, qazaqtıñ atın şığaru üşin men sonıñ barlığınan ötuim kerek. Sabır saqtap, şıdamdılıq tanıtıp, kündelikti jattığuımdı üzbedim. Tipti ädettegiden de köbirek jattığıp, tehnikalıq mümkindikterimdi arttıruğa küş saldım. Eşbir qarsılasqa anau älsiz mınau mıqtı dep qaramaymın. Är qarsılasqa tiyanaqtı dayındalamın. Bwl jolı 10 raundtıq kezdesu boladı dep, dayındalıp şıqqan edim. Qwday bwyırtıp alğaşqı raundta-aq wttım. Bwl jeñisim de jattığuımnıñ nätijesi dep oylaymın.

— Internetten jaña kiim ülgisin kiip, fotosessiya jasağan suretiñizdi körip qaldıq. Jaña kelisim şarttar jasaldı ma?

— «Nelson» promouterlik kompaniyasımen arı qaray jwmıs jasasa beremin. Biraq, biz qazir jaña menedjermen kelisim şartqa otırdıq. Endi meniñ jekpe-jekterimdi älemdegi eñ tanımal menedjer El Heymon wyımdastıratın boladı. Ol bwrın Meyvezerdiñ kezdesulerin ötkizgen täjiribeli maman. Aldağı uaqıtta jağımdı jañalıqtar köp boladı dep senemin. Osı rette Bauırjan Ospanov ağama erekşe alğıs aytqım keledi. Ol kisiniñ meniñ biik beles bağındıruıma jasap jatqan eñbegi orasan zor. Wlttıñ müddesin oylaytın, elge tirek bolatın ağamnıñ barına quanamın. Boyında azamattıq, danalıq pen parsattılığı mol ağa aman bolsın!

— Äleumettik jeliler men sayttarda «Qanat Islamnıñ jekpe-jegin otandıq telearnalar nege körsetpeydi?» degen maqalalar jazılıp, türli pikirler aytıluda. Şınımen de nege jekpe-jekteriñizdi telearnalardan köre almay jürmiz? Mwnıñ biz bilmeytin bir sırı bar ma?

— Sporttıñ da basqa salalar siyaqtı öziniñ zañdılığı bar. Mwnı biri tüsinse biri tüsinbey jatadı. Köp adam meni Genamen salıstıradı. Genanıñ özi köp eñbek etti, ol da basında telearnalarğa şıqqan joq. Belgili bir beles bağındırğan soñ barıp, ekrandardan körsetile bastadı. Älemge tanımal bolmay jatıp, telearnağa şığamın deu ol qisınğa kelmeydi. Ekrannan körsetu üşin sportşınıñ ataq därejesi, jetistigi bolu kerek. Men 20 jekpe-jegimdi endi ğana ötkizdim. Amerikanıñ özi bwl kezdesuimdi ekrannan körsetken joq. Mağan äli köp eñbek etu kerek. Qazaqstandağı telearnalarğa meniñ eşqanday da ökpem joq. «Qazaqstan» wlttıq arnası bir bağdarlamasın mağan arnağanın bilemin, jarıstan soñ skayp arqılı swhbattastıq. Qanşama jurnalister jarıs aldında da jarıstan soñ da habarlasıp jattı. Allağa şükir, elimniñ barına, meni izdeytin qazağımnıñ barına quanıştımın. «Qazaqstan» telearnası men «Qazsportqa» alğıstan basqa aytarım joq. Eşkim meni şettetip jatqan joq. Men sportta aqırın-aqırın ösip kele jatırmın. Bwyırtsa, jekpe-jegimdi telearnadan körsetetin künge de jetemiz. Sizder sabır etip kütuleriñiz kerek. Al mağan talmay eñbek etu kerek.

— Jiırmasınşı jekpe-jektiñ videosın körermen eki künnen soñ kördi. Suretter äli künge deyin joq. Nege? Älde qasıñızda jarnamañızben aynalısatın adam joq pa?

— Sizderdi tüsinemin. Ekrannan köre almağan soñ, kezdesulerimdi internetten köruge asığasızdar. Keyde oğan da mümkindik bolmay jatadı. Jaña kelisim şartqa endi qol qoydıq. Bwyırtsa, endi barlığı basqaşa boladı dep oylaymın. Kelesi jarıstarımnıñ sureti men videoları öz uaqıtında jarialanatın şığar.

— Kelesi jekpe-jegiñiz qaşanğa josparlanuda? Jıl soñına deyin qanşa jekpe-jek ötkizesiz?

— Qazir osı mäselelerdi şeşip jatırmız. Aldağı 10 künniñ işinde belgili boladı. Tağı bir kezdesu ötkizuim mümkin. Qanat dep taqımın qısıp otırğan elime alğıs aytqım keledi. Qazaqtıñ tuın köteretin jastar köp bolsın. Qazaq eli örkendep dami bersin. Elimiz, Elbasımız aman bolsın!

— Rahmet, ağa. Aman jüriñiz! Qazaqtıñ Qanatın älem tanısın!

Swhbattasqan — Berik SWLTAN

oishogyr.kz