قىتايدا تۋعان ەتنيكالىق قازاق قانات يسلام 2008 جىلى پەكين وليمپياداسىنا سول ەلدىڭ اتىنان قاتىسىپ، قولا جۇلدە يەلەنگەن. ول 2010 جىلى قازاقستان ازاماتتىعىن الىپ، «استانا ارلاندارى» كلۋبىندا بوكستاسقان. بىراق 2012 جىلى لوندون وليمپياداسىنا قازاقستان اتىنان قاتىسۋىنا بايلانىستى ازاماتتىق-قۇقىقتىق داۋ تۋعان سوڭ كاسىپقوي بوكسقا بەت بۇرىپ، اقش-قا كەتكەن.

سپورتشى ازاتتىققا بەرگەن سۇحباتىندا الداعى جوسپارلارىمەن دە ءبولىستى.

ازاتتىق: – سوڭعى كەزدەسۋدە ءسىزدى مەكسيكالىق الەكسيس كاماچومەن رينگكە شىعادى دەپ حابارلانعان. بىراق سوڭعى ساتتە قارسىلاسىڭىز اۋىستى. نە سەبەپ بولدى؟

قانات يسلام: – مەكسيكالىق بوكسشى باسىندا «كەزدەسۋگە شىعامىن» دەپ كەلىسىم بەرگەن. بىراق سوڭعى ساتتە جەكپە-جەكتەن باس تارتتى. شىقپايمىن دەگەندى قيناي المايسىڭ. باسقا امال جوق.

قانات يسلام مەن فيدەل مونتەرروس مۋنوسپەن كەزدەسۋى. كولۋمبيا، 7 تامىز 2014 جىل.

​ازاتتىق: – جىل باسىندا «بيىل بەس-التى كەزدەسۋ وتكىزۋدى جوسپارلايمىن» دەپ مالىمدەگەن ەدىڭىز. بىراق بيىل رينگكە ەكى رەت قانا شىقتىڭىز. جوسپارىڭىزدى ورىنداۋعا نە كەدەرگى بولىپ جاتىر؟

قانات يسلام: – كاسىپقوي بوكستا ءبارى بوكسشى قالاعانداي بولا قويمايدى. جوسپاردىڭ ورىندالماۋىنا سەبەپ كوپ. ماسەلەن، مەنىڭ دارەجەمدەگى قارسىلاستار تابىلمادى. كەي بوكسشىلار ءوز تالاپتارىن قويدى. ەكى جاق – مەنىڭ پروۋموۋتەرىم مەن قارسىلاس بوكسشىنىڭ كومپانياسى كەلىسە الماعان جايتتار دا بولدى. تامىزدا ءبىر-ەكى قارسىلاس كەلىسىم بەرىپ، كەيىن جەكپە-جەككە شىقپاي قويدى.

ازاتتىق: – كوپتەگەن بوكس ماماندارى «قانات يسلام الەمدىك دەڭگەيگە شىعۋى ءۇشىن مىقتى مەنەدجەر نەمەسە پروۋموۋتەرلەرمەن جۇمىس ىستەۋ كەرەك» دەگەن پىكىردى ءجيى ايتادى. بەدەلدى بوكس مەنەدجەرلەرىمەن جۇمىس ىستەۋگە مۇمكىندىك بار ما؟

قانات يسلام: – پروۋموۋتەرىمدى اۋىستىرمايمىن. ياعني، بۇرىنعى پروۋموۋتەرىم نەلسون لوپەسپەن جۇمىس ىستەي بەرەمىن. تاعى ءبىر جاقسى جاڭالىق – كاسىپقوي بوكستاعى ەڭ بەدەلدى Showtime تەلەارناسىنىڭ يەسى، امەريكاداعى نومەرى ءبىرىنشى مەنەدجەر سانالاتىن ەل حەيمونمەن كەلىسىم-شارتقا قول قويدىم. الداعى ۋاقىتتا ول مەنىڭ كەزدەسۋلەرىمدى ۇيىمداستىرۋعا كومەكتەسەدى. ول وسىعان دەيىن مەيۆەزەردىڭ مەنەدجەرى بولدى. قازىر قازاقستاندىق بوكسشى بەيبىت شۇمەنوۆپەن دە جۇمىس ىستەپ جاتىر.

ازاتتىق: – ءار كەزدەسۋىڭىزدەن گونورار الاسىز با؟

قانات يسلام (ورتادا) قارسىلاسى رەينالدو ەسكۋيۆيا (سول جاقتا) جانە مەنەدجەرى نەلسون مەندەسپەن (وڭ جاقتا) بىرگە. (سۋرەت Nelsons كومپانياسىنىڭ رەسمي سايتىنان الىندى).

​قانات يسلام: – گونورار تۋرالى ايتۋعا ءالى ەرتە. سوڭعى كەزدەسۋدە لاتىن امەريكاسى چەمپيونى دەگەن اتاعىمدى قورعادىم. الداعى كەزدەسۋلەرىمدە IBF, WBC تۇجىرىمدارى بويىنشا رەيتينگتىك كەزدەسۋلەر وتكىزسەم دەگەن جوسپارلارىم بار.

ازاتتىق: – بىلتىر «استانا» پرەزيدەنتتىك كلۋبىمەن ارالارىڭىزدا كەلىسسوزدەر بولعان ەدى. ودان ناتيجە بار ما؟ سىزگە «استانا» كلۋبى الداعى ۋاقىتتا دەمەۋشى بولا ما؟

قانات يسلام: – بىلتىر «استانا» كلۋبىمەن كەلىسسوز جۇرگىزدىك. مەن ءوز شارتتارىمدى، ولار ءوز شارتتارىن ايتتى. كەيىن «داعدارىس، بيۋدجەتتى قىسقارتىپ جاتىر» دەپ، كەلىسسوزدەر توقتادى.

ازاتتىق: – 21-كەزدەسۋىڭىزدى قاشان وتكىزبەكسىز؟

قانات يسلام: – ازىرگە جۇمىستار جۇرگىزىلىپ جاتىر. قىتايدان، رەسەيدەن ۇسىنىس بار. كەلەسى كەزدەسۋدى قىتايدا وتكىزۋىم دە مۇمكىن. بىراق ناقتى ۋاقىتى بەلگىسىز.

ازاتتىق: – قازاقستاندا جەكپە-جەك وتكىزۋگە مۇمكىندىك بار ما؟

قانات يسلام: – قازاقستاندا جەكپە-جەك وتكىزۋگە مۇمكىندىك از. «كەل، مەن جەكپە-جەگىڭدى وتكىزىپ بەرەيىن» دەپ شاقىرىپ جاتقان ەشكىم جوق. ءوزىم بارىپ وتكىزبەيمىن عوي. بىزدە (قازاقستاندا – رەد.) كاسىپقوي بوكس كەشتەرىن ۇيىمداستىرۋ دامىماعانىن بىلەسىز. بىراق الداعى ۋاقىتتا ءبىر كەزدەسۋ وتكىزۋگە مۇمكىندىك بولسا ەكەن دەيمىن.

ازاتتىق: – جاتتىعۋ رەجيمىڭىز، الداعى جوسپارىڭىز قالاي؟

قانات يسلام: – كۇنىنە ەكى ۋاقىت جاتتىعۋ جاسايمىن. اعىلشىنشام دا جاقسارىپ قالدى. وتباسىم قازىر الماتىدا. جىل سوڭىندا قازاقستانعا بارىپ قايتاتىن ەدىم. بيىل ەلگە بارىپ قايتۋ ۋاقىتى ءسال ناقتىلانباي تۇر. ءدال قازىر كەلەسى كەزدەسۋىمنىڭ وتەتىن ۋاقىتىن ناقتىلاپ الۋىم كەرەك. جىل سوڭىنا دەيىن تاعى ءبىر كەزدەسۋ وتكىزسەم دەيمىن.

ازاتتىق: – سۇحباتىڭىزعا راحمەت.

رۋسلان مەدەلبەك

ازاتتىق راديوسى