– Qazaqstanda eki jıl jürdim. Biraq azamattıq alu mümkin bolmadı. Al legioner retinde oynağım kelmedi. Sosın elime qaytıp oraldım, – dedi.

«ARMANI WLTTIQ QWRAMAĞA ENU BOLATIN»

Mwrattıñ futbolşı bolu talabın kişkentay kezinen qoldağan ağası Tunsay Önal ata-analarınıñ 28 jıl bwrın Stambuldan Amsterdamğa qonıs audarğandarın aytadı.

Mwrat Önaldıñ ağası Tunsay Önal.

– Mwrat bes jasında Amsterdamdağı «Vespuççi» äuesqoy komandasınıñ futbol klubına qabıldandı. 17 jasında jastar arasında üzdik şabuılşı boldı. Keyin basqa da klubtarda oynadı. Osıdan eki jıl bwrın «Qazaqstanğa bar» dep jiberdik. Qazaqstanda eki jıl jürdi, Qazaqstan pasportın ala almadı. Onıñ armanı Qazaqstan wlttıq qwramasına enu bolatın. Biraq ol armanı orındalmadı. Sosın amalsız qayta oraldı. Qazir Gollandiyanıñ Topklasse divizionındağı eñ mıqtı komandalardıñ biri «Lissege» auıstı, – dedi renişti ünmen.

Mwrat oynağan şımkenttik «Qıran» futbol komandasınıñ direktorı Talğat Poşimov «onıñ komandada liderlik deñgeyde bolğanın, biıl da oynaydı dep ümittengenderin» aytadı.

– Ol soñğı keterinde «kelmeymin» degen joq, «köremin» degen bolatın. Biraq keşe (10 qañtar – red.) Gollandiyanıñ bir komandasınan bizge qatınas qağazı kelipti. «Bizge [Mwrat Önaldı aluğa] rwqsat beriñder» dep. Ol oyınşı retinde jaqsı. Ortalıq qorğauşı retinde de, keyde şabuılşı retinde de oynay beredi. 2015 jılı 14 gol soqtı, – dedi «Qıran» futbol komandasınıñ direktorı.

Talğat Poşimovtıñ sözinşe, «ata-anası Gollandiyada twrğandıqtan Mwrattıñ özi Qazaqstan azamattığın aluğa qatıstı ekioylı bolğan».

– Basında eki eldiñ azamattığın da qatar almaqşı boldı. Biraq bizde mümkin emes qoy (Qazaqstanda qos azamattıqqa zañmen tıyım salınğan – red.). Keyin özi Qazaqstan azamattığın aluğa asa qwlşınıs bayqatpadı, – dedi Poşimov.

«JWMISTARI JAUAPSIZ QALDI»

Qazaqstannıñ keybir sporttıq aqparat qwraldarı Mwrat Önaldıñ bwğan deyin «bir märte wlttıq qwramağa şaqırtu alğanı» turalı jazğan. Alayda Qazaqstan futbol federaciyasınıñ baspasöz hatşısı Dina Isqaqova mwnı joqqa şığardı.

Qazaqstandıq futbol janküyerleri. (Körneki suret)

– Mwrat Önaldıñ azamattığı joq. Al onıñ wltı qazaq bolğanımen şetel azamatı bolğandıqtan qwramağa şaqıra almaymız. Ötken jılı «Ala dop» saytı «Mwrat Önaldıñ wlttıq qwramada oynauğa mümkindigi bar ma» dep hat jazğan bolatın. Biz öz tarapımızdan Oñtüstik Qazaqstan oblısınıñ işki sayasat bölimine şığıp, Mwrattıñ azamattıq alu mäselesiniñ bolatın-bolmaytının swrağanbız. Olar «jwmıs jasap jatırmız» dep jauap bergen. Biraq sol jwmıstarı jauapsız qaldı, – dedi Dina Isqaqova.

Mwrat Önal Qazaqstanğa kelgen twsta qabıldanğan «Qazaqstan Respublikasınıñ keybir zañ aktilerine eñbek migraciyası mäseleleri boyınşa tüzetuler men tolıqtırular engizu turalı» zañğa säykes oralmandarğa azamattıq Qazaqstanğa köşip kelgen soñ 4 jıldan keyin beriledi dep körsetilgen.

Biraq sırttan kelgen 13 şeteldik futbolşığa 2014 jılı az ğana uaqıt işinde Qazaqstan azamattığı berilgen edi. Olardıñ işinde Resey, Ukraina, Belarus', Qırğızstan men Makedoniyadan şıqqan futbolşılar bolğan. Azattıqtıñ olarğa jıldam azamattıq beru sebebi turalı swrağına ädilet ministrligi bwl proceduranıñ zañdı türde jüzege asqanın mälimdegen. Ministrliktiñ habarlauınşa, memleketaralıq kelisimderge säykes, Resey, Belarus', Ukraina jäne Qırğızstan azamattarınıñ Qazaqstan azamattığın alu tärtibi oñaylatılğan. Bwrınğı SSSR aumağında twrğan jäne postsovettik elderdiñ birinde düniege kelgen adam Qazaqstan azamattığın oñaylatılğan tärtip boyınşa jıldam aladı.

Azat Europa / Azattıq radiosı