كوز قاراس ساياسات

قازاق مۇددەسى جəنە سايلاۋ.

kerey.kz

 |  Jan 14, 2016

ءبىر انىعى – بۇگىنگى پارتيالاردىڭ ىشىندە ناعىز ۇلتشىل نەمەسە شىنايى دەموكراتيالىق وپپوزيتسيالىق پارتيا جوق. 
بۇنداي جاعدايدا ۇلتتىق باعىتتا جۇرگەن ازاماتتار مەن توپتاردىڭ ەكى جولى بار: ا) بويكوت; ب) ۇلتتىق ۇراندار مەن جەكەلەگەن ازاماتتاردى بار پارتيالارعا وتكىزۋ.
بويكوت جاعى تۇسىنىكتى. ول ءۇشىن ەشتەڭە ىستەۋدىڭ دە قاجەتى جوق. تەك بار جاعدايدى ايتىپ، سايلاۋدى كەلەمەجدەپ، تروللينگ جاساۋ. 
ەكىنشى جول قيىنداۋ، بىراق دۇرىسى وسى. ياعني، الداعى ۋاقىتتا ۇلتتىقباعىتتاعى ازاماتتار باس قوسىپ، ناقتى تالاپتار مەن ازاماتتاردى ىرىكتەۋى كەرەك. سول تالاپتاردى ورىنداعان، باعدارلاماسىنا قوسقان پارتيالارعا تاكتيكالىق تۇرعىدان قول ۇشىن بەرۋگە بولادى. ۇلتشىلداردى پارتيالىق تىزىمدەردىڭ العاشقى وندىعىنا ەنگىزگەن پارتيالارعى ۇيىمداستىرۋشىلىق نە اقپاراتتىق قولداۋ كورسەتۋگە بولادى. ياعني پارتيالىق سايلاۋدى ازاماتتىق سايلاۋ قىلۋعا تالپىنىپ كورۋ دەگەن ءسوز.
قاجەتتى جəنە ءسوزسىز تالاپتار ىشىنە مىنالاردى قوسۋ كەرەك:
- قاپاستا وتىرعان ۇلتشىلداردى بوساتۋ، قىلمىستىق ىستەردى جابۋ;
- مەملەكەتتىك ءتىل تۋرالى زاڭدى قابىلداۋ;
- وتارسىزدانۋ باعىتىنداعى شارالار، سونىڭ ىشىندە 1916 جىلعى ۇلت-ازاتتىق كوتەرىلىستىڭ 100-جىلدىعىنا ارنالعان ناقتى شارالاردى وتكىزۋ;
- قازاقتاندىق ۇلت دەگەننەن باس تارتىپ، بار جەردە قازاق ۇلتى دەگەندى دəرىپتەۋ، ۇلىقتاۋ;
- قازاق كوشى مəسەلەسى جəنە الاشتى ارقاعا اتتاندىرۋ;
- كەدەندىك وداق پەن ودكب-دان شىعۋ، باس تارتۋ;
- قازاق ەكولوگياسى، پروتوندارعا تىيىم سالۋ;
- ۇلتتىق ەكونوميكانى دامىتۋ، ۇلتتىق بيزنەستى قولداۋ…
تاعىسىن تاعى… ناقتى شارالاردى تىزبەلەي بەرۋگە بولادى ءəلى دە.
باستى وي – قازاق ۇلتشىلدارى ءسوزسىز قولدايتىن 20-25 ناقتى، تۇسىنىكتى، تۇجىرىمدىق ساياسي ۇرانداردىڭ ءتىزىمىن جاساۋ، ونى جۇرتقا جەتكىزۋ، وسى تۇرعىدا ۇلتشىلدار اراسىنداعى كونسەنسۋس پەن كەلىسىمگە جەتۋ. وزىمىزگە تىكەلەي قاتىسى جوق سايلاۋ ارقىلى وزىمىزگە اۋاداي قاجەتتى كەلىسىم مەن ءوزارا ءىس-قيمىل ءدəستۇرىن قالىپتاستىرۋ.
وسى سايلاۋدا ءوزىن قازاقپىن، قازاققا جانىم اشيدى دەگەن ءəربىر پارتيا قۇرامىنا قازاق پاتريوتتارىن تارتۋى ءتيىس. مىسالى، ءəربىر پارتيادا ورالمان قازاقتىڭ وكىلى بولۋى شارت. Əر پارتيادا قازاق ەكولوگتارى بولۋى شارت. تاعىسىن تاعى.
ونداي ازاماتتاردىڭ لەگىن انىقتاپ، سولاردى پارتيالارعا ۇسىنۋ. جاڭاعى ازاماتتاردى جۇرت الدىنا شىعىپ، جازباشا مىندەتتەمە الۋعا مىندەتتەۋ، مəجبۇرلەۋ.
مىندەت – رەتى كەلسە مəجىلىستە قازاق مۇددەسىن قورىقپاي، ۇرىكپەي ايتا الاتىن بەيرەسمي ۇلتتىق فراكتسيا نەمەسە الاششىل دەپۋتاتتار توبىن قۇرۋعا تىرىسۋ.
تالقىعا وسىنى ۇسىنايىن دەپ ەدىم.

ايدوس سارىمنىڭ facebook پاراقشاسىنان الىندى