امەريكالىق J. D. Power and Associates اگەنتتىگى اقش-تاعى ەڭ قاۋىپسىز اۆتوموبيلدەردىڭ رەيتينگىن ۇسىندى. مۇنداي زەرتتەۋدى كومپانيا 27-ءشى رەت جۇرگىزىپ وتىر، – دەپ حابارلايدى AutoNews.ru.

ءتىزىم 2013 جىلى شىعارىلعان كولىك يەلەرىنەن ساۋالناما الۋ ارقىلى جاسالدى. جۇرگىزۋشىلەردەن سوڭعى 12 ايدا كولىگىندە قانداي اقاۋدىڭ بولعانى سۇرالعان. سەنىمدىلىك كورسەتكىشى ماركانىڭ 100 اۆتوموبيلىندە بولسا انىقتالادى.

رەيتينگتە ءبىرىنشى ورىندى Lexus اۆتوموبيلدەرى الدى (برەندتىڭ 100 كولىگىنىڭ 95-ىندە اقاۋ شىققان). ەكىنشى ورىندا Porsche (97 اقاۋ), Buick ءۇشىنشى ورىندا كەلەدى (106 اقاۋ). ودان كەيىنگى ورىنداردا Toyota (133) مەن GMC (120).

ساراپشىلار اقش جۇرگىزۋشىلەرىنىڭ كوپ جاعدايدا كولىكتىڭ سىرتقى بەتىندەگى اقاۋلارعا بايلانىستى شاعىم ايتاتىنىن اتاپ ءوتتى. ال قوزعالتقىشتاعى جانە ترانسميسسياداعى اقاۋلار ازايعان. ۇيالى تەلەفونعا Bluetooth ارقىلى جالعاۋ كەزىندە شىعاتىن جارامسىزدىقتار جويىلماي وتىر ەكەن. ساۋالناماعا قاتىسقانداردىڭ ءبىر بولىگى اۋديپجۇيەنىڭ دۇرىس جۇمىس ىستەمەيتىنىن، ناۆيگاتسيا قىزمەتىنىڭ بۇلىنە بەرەتىنىن، كليمات-باقىلاۋدىڭ ىستەن شىعاتىنىن جانە اقپاراتتىق-ويىن-ساۋىق جۇيەسىنىڭ سەنىمسىز ەكەنىن اتاعان.

2015 جىلدىڭ جازىندا كومپانيا امەريكالىقتاردان قانداي كولىكتىڭ ۇزدىك ەكەنىن انىقتاۋ ءۇشىن ساۋالناما جۇرگىزىپتى. ساۋالناماعا 85 مىڭ جۇرگىزۋشى قاتىسقان. ونىڭ قورىتىندىسىنا سايكەس، Porsche يەلەرى ءوز كولىكتەرىن ۇزدىك دەپ سانايدى ەكەن. نەمىس ماركاسى مۇمكىن بولعان 1000 ۇپايدان 874 ۇپاي الدى.

tengrinews.kz