بۇگىن – العىس ايتۋ كۇنى
2016 جىلعى 14 قاڭتاردا قازاقستان رەسپۋبليكاسىنىڭ پرەزيدەنتى ن.ءا.نازارباەۆ قازاقستان حالقى اسسامدلەياسىنىڭ قۇرىلعان كۇنى 1 ناۋرىزدى ەلىمىزدە العىس ايتۋ كۇنى دەپ جاريالاپ، № 173 جارلىققا قول قويعان بولاتىن.
العىس ايتۋ كۇنى – بۇل، ەڭ الدىمەن ەلىمىزدە تىنىشتىق پەن ۇندەستىك، ءوزارا سەنىمدىلىك پەن بارلىق قازاقستاندىقتارعا دەگەن قۇرمەتتىڭ ورنىعۋىنا نەگىز بولعان پرەزيدەنتتىڭ بەيبىتشىلىك پەن كەلىسىم ساياساتىنىڭ سالتاناتى كۇنى. بۇل – تاعدىر تالكەگىمەن قازاقستان جەرىنە ەرىكسىز قونىس اۋدارعان ءتۇرلى ەتنوستاردىڭ ميلليونداعان وكىلدەرىنىڭ قۇتتى قونىسىنا اينالعان قاسيەتتى قازاق جەرى مەن قوناقجاي قازاق حالقىنا تەرەڭ تاعزىمنىڭ بەلگىسى. قازاق حالقى قيىن-قىستاۋ زاماندا ولاردىڭ باسىنا تۇسكەن اۋىرتپالىقتى قايىسپاي بىرگە كوتەرە ءبىلدى، بۇل بۇگىنگى تاڭدا ەلىمىزدەگى ءتۇرلى ۇلت وكىلدەرىنىڭ اراسىنداعى ادامگەرشىلىك قارىم-قاتىناستىڭ ونەگەلى ولشەمىنە اينالدى.
العىس ايتۋ كۇنى – كۇردەلى زاماندا يىق تىرەسە بىرگە ەڭسەرىپ، قىسقا مەرزىم ىشىندە ەلباسىنىڭ باسشىلىعىمەن تاۋەلسىز قازاقستاندى قۇرۋ جولىندا ايانباي تەر توككەن ەلىمىزدىڭ بارلىق ازاماتتتارىنىڭ ءبىر-بىرىنە قۇرمەت بىلدىرەتىن كۇن.
پرەزيدەنت العىس ايتۋ كۇنى تۋرالى: «قازاقستان حالقى اسسامبلەياسى قۇرىلعان كۇن – 1 ناۋرىزدى جىل سايىن بارلىق ەتنوستاردىڭ ءبىر بىرىنە جانە مەيىرباندىق تانىتىپ، ول ادامداردى ءوز تۋعانىنداي قابىلداعان قازاقتارعا العىس ايتۋ كۇنى رەتىندە اتاپ ءوتۋ ادىلەتتى بولار ەدى. ول كۇن ءبىزدى بۇرىنعىدان دا گورى جاقىنداستىرا تۇسپەك. بۇل كۇن مەيىرىمدىلىكتىڭ، بۇكىل قازاقستاندىقتاردىڭ ءبىر بىرىنە دەگەن دوستىعى مەن ماحابباتىنىڭ جارقىن مەرەكەسى بولا الار ەدى»، – دەگەن بولاتىن.
وسى كۇن تاعدىر توعىستىرعان قازاقستاننىڭ كوپەتنوستى حالقىنىڭ ورتاق تاريحىن قۇرمەتتەۋ كۇنى بولادى. العىس ايتۋ كۇنى – قايىرىمدىلىق داستۇرلەرىن، الەۋمەتتىك ىنتىماقتى جانە ءوزارا كومەك كورسەتۋدى قولداۋ كۇنى. بۇل – رەپرەسسيا مەن جەر اۋدارۋ جىلدارىندا ءبىزدىڭ حالىق كورسەتكەن مەيرىمدىلىك پەن اق كوڭىلدىك، قولدا بارمەن ءبولىسۋ، كومەك كورسەتۋ سىندى رۋحاني داستۇرلەر كۇنى.
العىس ايتۋ كۇنى قازاقستاندىق ءپاتريوتيزمنىڭ، دوستىق پەن بىرلىگىمىزدىڭ، مادەني سانالۋاندىعىمىزدىڭ جارقىن كۇنى، سەبەبى ەلباسى 100-دەن اسا ەتنوستىڭ ارقايسىسى ءوزىنىڭ قايتالانباس ورنەگىن سالۋىنىڭ ناتيجەسىندە ءبىزدىڭ ءبىرتۇتاس ۇلتىمىز بىرەگەي ارتىقشىلىقتار يەسىنە اينالعانىن اتاپ وتكەن ەدى.
العىس ايتۋ كۇنى – قازاقستان حالقىن ماڭگىلىككە بىرىكتىرۋگە باعىتتالعان «ماڭگىلىك ەل» جالپىۇلتتىق پاتريوتتىق يدەياسىنىڭ، قازاقستاندىق بىرەگەيلىكتىڭ نەگىزگى ارقاۋى – ەلىمىزدەگى بارلىق ۇلت پەن ۇلىستى ءبىر شاڭىراق استىنا توپتاستىراتىن قازاقستان حالقى اسسامبلەياسىنىڭ كۇنى.
el.kz عى
پىكىر قالدىرۋ