ҚАЗАҚСТАНҒА ҚАЗАҚ ЛОББИЫ ҚАТТЫ ҚАЖЕТ….
kerey.kz
Қазір биліктегілер әлдебір өзекті жәйтқа байланысты елдің көзқарасын білгісі келсе, орыстілді сайттардағы комменттерді оқи салады. Телеарналар мен әкімдік қызметкерлері де үнемі осындай төрт-бес сайтта жарық көрген ақпараттарды шұқшиып шолып отыратынын білемін. Елімізде орыстілді ортаның пікірін бәрінен артық санап, солардың қалауын қош көретін құлдық психология қалыптасқан. Ал, ондай интернет порталдардағы пікір жазатындардың көбі – орыстың жалдамалы тролдары. Мемлекеттік маңызы бар мәселені талқылайтын кезде, олар ресей идеологияcының ыңғайына келетін комменттер ғана жазып, қазақстандықтардың атынан сөйлеп, өздерінше қоғамдық пікір қалыптастырғансып отырады. Басшылықтағы космополиттер солардың шатпағына шынымен де сеніп, санасатын сияқты әсер қалдырады. Қазақстандағы ұлттық идеология деп жүргені, ұлтсыздық идиотизмі екеніне осындайда анық көзің жетеді екен. Бізде мұндай өте маңызды істердің барлығын ресейліктерге сеніп тапсырып қойған. Қазақстандағы бос тұрған идеологиялық вакуумды солардың саяси сандырағы үсті-үстіне толтырып жатыр. Құдайға шүкір, қазір қазақ жастарының арасында ұлттық проблемаларды батыл айтып жүрген журналистер көп. Ең өкініштісі, олардың әрқайсысы жеке-жеке жазып жүр. «Жалғыздың шаңы шықпас» дегендей, солардың басын қосып, қазақ блогерлері мен журналистерінің лоббилық тобын құрсақ деген ұсыныс білдіргім келеді. Өздеріңіз білесіздер, қазір қазақ қоғамының тамырын басып, ұлтқа қарсы жымысқы саясат жүргізетін “информационный выбростар” жиі жарияланып жүр. Осындайда ұлтшыл азаматтар әлгіндей тақырыпты іліп әкетіп, бір-бірімен бөлісіп, қазақ мүддесіне сай келетін қоғамдық пікір туғызып жатса, қандай жақсы! Фейзбук соңғы жылдары ұлтшылдардың ұжмағына айналды ғой. Біздікі, әлеуметтік желіде әлімжеттікпен бірлесіп күресіп, қолымыздан келгенше халқымызға қызмет етсек деген ой ғана еді…
Пікір қалдыру