Екіншіден, Қазақстан тәжірибесінде құқық қорғау органдары ақиқатты емес, тек өздеріне тиімді ақпараттарды ғана тарататынын ескерсек, мұндай оқыс әрекеттің әріде жатқан өзіндік себептері бар екендігі сезіледі. Сол себеп не? Ол неден туындады? Шындықты біз әдеттегідей үш-төрт жылдан соң ғана біліп жүрмесек болғаны.

Өз міндеттерін атқару үстінде қаза тапқан полиция қызметкерлері де, шабуыл жасаған топ мүшелері де Қазақстан азаматтары. Қаза болғандардың бәрінің отбасыларына қайғыларына ортақтасып көңіл айтамыз. Қазақстан заңдары бойынша сот дәлелдеп шыққанға дейін ешкімді қылмыскер, содыр деп атауға болмайды. Сондықтан ярлық тағуға асықпай, ол азаматтарды қарулы теке-тіреске итермелеген не нәрсе екенін, тетігі қайда жатқанын анықтау керек деп ойлаймын. «Теріс ағымдағы дін ұстанушылар», «Қазақстанды азат ету ұйымы» дегендердің ешқайсысы көкейге қонбайды. Мұның астарында бір құпия жатқаны анық. Халық ақиқатты білуге мұқтаж!