ҰҚК басшысы Алматыдағы шабуылға күдіктіні ұстау жайлы айтты
kerey.kz
ҰҚК төрағасы Владимир Жұмақанов пен Қазақстан президенті Нұрсұлтан Назарбаев.
Ұлттық қауіпсіздік комитетінің (ҰҚК) төрағасы Владимир Жұмақанов Астанада өткен Қауіпсіздік кеңесінің шұғыл жиынында Алматыдағы ішкі істер бөлімі мен ҰҚК департаментіне жасалған шабуылға күдіктінің ұсталғаны туралы айтты.
Жұмақановтың сөзінше, ұсталған күдікті – 1990 жылы Қызылорда облысында туған Руслан Күлекбаев есімді азамат. ҰҚК мәліметінше, күдікті соңғы уақытта Алматының Іле ауданындағы Ынтымақ ауылында тұрған. Ұялы телефон сатумен айналысқан.
“2010 жылы 27 тамызда Шымкенттің Еңбекші аудандық соты оны қылмыстық кодекстің 178-бабының 2-тармағы бойынша (“зорлық-зомбылық қолданып кісі тонау”) соттаған. 2012 жылы 8 мамырда Қызылорда қалалық соты оны 251-бап бойынша (“атыс қаруын заңсыз иеленіп, сақтады”) деген айыппен екі жыл 11 айға соттаған” деді Жұмақанов. Ол Күлекбаевтың түрмеде “салафиттермен жақын болғанын” да айтты.
Бүгін таңертең Алматыда Алмалы аудандық ішкі істер бөлімі мен ҰҚК департаментіне шабуыл жасалған. Ішкі істер министрлігінің мәліметінше, шабуылдан үш полиция қызметкері мен екі бейбіт тұрғын қаза тапқан. Сегіз адам жараланып ауруханаға түскен.
Қазақстан президенті Нұрсұлтан Назарбаев шабуылды теракт деп атады.
Назарбаев: Алматыдағы шабуыл – теракт
Нұрсұлтан Назарбаев.
Қазақстан президенті Нұрсұлтан Назарбаев Алматыда болған шабуылдарды террорлық акт деп атады.
Бүгін түстен кейін Ақордада Назарбаевтың төрағалығымен қауіпсіздік кеңесінің жиыны өткен. Ақорданың баспасөз қызметінің хабарлауынша, жиында ішкі істер министрі Қалмұханбет Қасымов пен ұлттық қауіпсіздік комитетінің төрағасы Владимир Жұмақановтың және қауіпсіздік кеңесінің өзге де мүшелерінің есебі тыңдалған.
Назарбаев шабуылдан құрбан болғандардың туыстары мен зардап шеккендерге көңіл айтып, оларға психологиялық және материалдық қолдау көрсету қажетін айтқан.
“Қазір құқық қорғау органдары зұлым ниеттілердің кім екені, қандай мақсаты болғанын анықтап жатыр. Адам қарасы көп жиналатын жерлерді қорғап, жаралыларға жедел медициналық көмек көрсету, қылмыскерлердің жеке басын жедел түрде толық анықтау керек. Сонымен бірге Алматы тұрғындарын тұрақты түрде ақпараттан құлағдар етіп, жалпы қоғамдық тыныштықты қамтамасыз ету керек” деді Назарбаев.
Ол сонымен қатар “барлық сыбыстың алдын алып, арандатушыларды анықтау керек” екенін де айтқан.
Террормен күрес штабы: Алматыдағы жағдай тұрақтанды
Абылай хан және Қазыбек би көшелері қиылысындағы атыс орны. Көшені жауып тексеру жүріп жатыр. Алматы. 18 шілде, 2016 жыл.
Алматыдағы шабуылдан кейінгі жағдай қалпына түсті деп хабарлады Алматыдағы террормен күрес жедел штабының ресми өкілі Салтанат Әзірбек. Оның айтуынша, қаладағы жағдай құқық қорғау органдарының бақылауында, қауіп жоқ.
Шабуылға қатысты қылмыстық кодекстің 99-бабының 2-тармағы (“кісі өлімі”), 269-бабының 2-тармағы (“ғимараттарға, құрылыстарға, қатынас және байланыс құралдарына шабуыл жасау немесе оларды басып алу”) және 380-бабының 2-тармағы (“билік өкіліне қатысты күш қолдану”) бойынша қылмыстық істер қозғалып, тергеу жұмыстары жүргізіліп жатыр.
Алматыда бүгін түске дейін Алмалы аудандық ішкі істер бөлімі (ІІБ) мен ҰҚК департаментіне белгісіз адам шабуыл жасаған. Ресми мәлімет бойынша, шабуылдан үш полицей мен екі бейбіт тұрғын жараланып, жеті адам жараланған.
Салтанат Әзірбектің сөзінше, шабуылға күдікті адам ұсталып, қамауға алынған. Қазір басқа күдіктілер тексеріліп жатыр.
Алматыда қаза тапқан полицейлердің аты-жөндері жарияланды
Алматыда шабуылда қаза тапты делінген полиция қызметкерлері (солдан оңға қарай) Мақсат Сәлімбаев, Аян Ғалиев және Бауыржан Нұрмағамбетов. Сурет 24.kz сайтының ресми сайтынан алынды.
Алматыдағы шабуылдан қаза тапқан полиция қызметкерлерінің аты-жөндері жарияланды деп хабарлайды жергілікті агенттіктер. Қалалық ішкі істер департаменті таратқан ақпаратта шабуылда полиция капитаны Бауыржан Нұрмаханбетов (1988 жылы туған), кіші сержант Мақсат Сәлімбаев (1991 жылы туған) және полиция старшинасы Аян Ғалиев (1974 жылы туған) қаза тапқаны айтылады.
Алматыда бүгін түске дейін белгісіз қарулы адамдар Алмалы аудандық ішкі істер бөлімі мен ҰҚК департаментіне шабуыл жасаған. Ресми ақпарат бойынша, шабуылдан полиция қызметкерлерінен өзге бір бейбіт тұрғын қаза тапқан, жеті полицей жарақаттанған.
Полиция “шабуыл жасады” делінген екі адамның ұсталғанын хабарлады.
Республикалық антитеррорлық орталық шабуылға байланысты Алматы аумағында террорлық қауіп-қатердің “қызыл” деңгейін жариялаған.
Қазақстан президенті Нұрсұлтан Назарбаев шабуылға байланысты қауіпсіздік кеңесінің жиынын өткізіп, Алматыдағы шабуылды теракт деп атады.
Азат Еуропа / Азаттық радиосы
Пікір қалдыру