WQK basşısı Almatıdağı şabuılğa küdiktini wstau jaylı ayttı
kerey.kz
WQK törağası Vladimir Jwmaqanov pen Qazaqstan prezidenti Nwrswltan Nazarbaev.
Wlttıq qauipsizdik komitetiniñ (WQK) törağası Vladimir Jwmaqanov Astanada ötken Qauipsizdik keñesiniñ şwğıl jiınında Almatıdağı işki ister bölimi men WQK departamentine jasalğan şabuılğa küdiktiniñ wstalğanı turalı ayttı.
Jwmaqanovtıñ sözinşe, wstalğan küdikti – 1990 jılı Qızılorda oblısında tuğan Ruslan Külekbaev esimdi azamat. WQK mälimetinşe, küdikti soñğı uaqıtta Almatınıñ İle audanındağı Intımaq auılında twrğan. Wyalı telefon satumen aynalısqan.
“2010 jılı 27 tamızda Şımkenttiñ Eñbekşi audandıq sotı onı qılmıstıq kodekstiñ 178-babınıñ 2-tarmağı boyınşa (“zorlıq-zombılıq qoldanıp kisi tonau”) sottağan. 2012 jılı 8 mamırda Qızılorda qalalıq sotı onı 251-bap boyınşa (“atıs qaruın zañsız ielenip, saqtadı”) degen ayıppen eki jıl 11 ayğa sottağan” dedi Jwmaqanov. Ol Külekbaevtıñ türmede “salafittermen jaqın bolğanın” da ayttı.
Bügin tañerteñ Almatıda Almalı audandıq işki ister bölimi men WQK departamentine şabuıl jasalğan. İşki ister ministrliginiñ mälimetinşe, şabuıldan üş policiya qızmetkeri men eki beybit twrğın qaza tapqan. Segiz adam jaralanıp auruhanağa tüsken.
Qazaqstan prezidenti Nwrswltan Nazarbaev şabuıldı terakt dep atadı.
Nazarbaev: Almatıdağı şabuıl – terakt
Nwrswltan Nazarbaev.
Qazaqstan prezidenti Nwrswltan Nazarbaev Almatıda bolğan şabuıldardı terrorlıq akt dep atadı.
Bügin tüsten keyin Aqordada Nazarbaevtıñ törağalığımen qauipsizdik keñesiniñ jiını ötken. Aqordanıñ baspasöz qızmetiniñ habarlauınşa, jiında işki ister ministri Qalmwhanbet Qasımov pen wlttıq qauipsizdik komitetiniñ törağası Vladimir Jwmaqanovtıñ jäne qauipsizdik keñesiniñ özge de müşeleriniñ esebi tıñdalğan.
Nazarbaev şabuıldan qwrban bolğandardıñ tuıstarı men zardap şekkenderge köñil aytıp, olarğa psihologiyalıq jäne materialdıq qoldau körsetu qajetin aytqan.
“Qazir qwqıq qorğau organdarı zwlım niettilerdiñ kim ekeni, qanday maqsatı bolğanın anıqtap jatır. Adam qarası köp jinalatın jerlerdi qorğap, jaralılarğa jedel medicinalıq kömek körsetu, qılmıskerlerdiñ jeke basın jedel türde tolıq anıqtau kerek. Sonımen birge Almatı twrğındarın twraqtı türde aqparattan qwlağdar etip, jalpı qoğamdıq tınıştıqtı qamtamasız etu kerek” dedi Nazarbaev.
Ol sonımen qatar “barlıq sıbıstıñ aldın alıp, arandatuşılardı anıqtau kerek” ekenin de aytqan.
Terrormen küres ştabı: Almatıdağı jağday twraqtandı
Abılay han jäne Qazıbek bi köşeleri qiılısındağı atıs ornı. Köşeni jauıp tekseru jürip jatır. Almatı. 18 şilde, 2016 jıl.
Almatıdağı şabuıldan keyingi jağday qalpına tüsti dep habarladı Almatıdağı terrormen küres jedel ştabınıñ resmi ökili Saltanat Äzirbek. Onıñ aytuınşa, qaladağı jağday qwqıq qorğau organdarınıñ baqılauında, qauip joq.
Şabuılğa qatıstı qılmıstıq kodekstiñ 99-babınıñ 2-tarmağı (“kisi ölimi”), 269-babınıñ 2-tarmağı (“ğimarattarğa, qwrılıstarğa, qatınas jäne baylanıs qwraldarına şabuıl jasau nemese olardı basıp alu”) jäne 380-babınıñ 2-tarmağı (“bilik ökiline qatıstı küş qoldanu”) boyınşa qılmıstıq ister qozğalıp, tergeu jwmıstarı jürgizilip jatır.
Almatıda bügin tüske deyin Almalı audandıq işki ister bölimi (İİB) men WQK departamentine belgisiz adam şabuıl jasağan. Resmi mälimet boyınşa, şabuıldan üş policey men eki beybit twrğın jaralanıp, jeti adam jaralanğan.
Saltanat Äzirbektiñ sözinşe, şabuılğa küdikti adam wstalıp, qamauğa alınğan. Qazir basqa küdiktiler tekserilip jatır.
Almatıda qaza tapqan policeylerdiñ atı-jönderi jariyalandı
Almatıda şabuılda qaza taptı delingen policiya qızmetkerleri (soldan oñğa qaray) Maqsat Sälimbaev, Ayan Ğaliev jäne Bauırjan Nwrmağambetov. Suret 24.kz saytınıñ resmi saytınan alındı.
Almatıdağı şabuıldan qaza tapqan policiya qızmetkerleriniñ atı-jönderi jariyalandı dep habarlaydı jergilikti agenttikter. Qalalıq işki ister departamenti taratqan aqparatta şabuılda policiya kapitanı Bauırjan Nwrmahanbetov (1988 jılı tuğan), kişi serjant Maqsat Sälimbaev (1991 jılı tuğan) jäne policiya starşinası Ayan Ğaliev (1974 jılı tuğan) qaza tapqanı aytıladı.
Almatıda bügin tüske deyin belgisiz qarulı adamdar Almalı audandıq işki ister bölimi men WQK departamentine şabuıl jasağan. Resmi aqparat boyınşa, şabuıldan policiya qızmetkerlerinen özge bir beybit twrğın qaza tapqan, jeti policey jaraqattanğan.
Policiya “şabuıl jasadı” delingen eki adamnıñ wstalğanın habarladı.
Respublikalıq antiterrorlıq ortalıq şabuılğa baylanıstı Almatı aumağında terrorlıq qauip-qaterdiñ “qızıl” deñgeyin jariyalağan.
Qazaqstan prezidenti Nwrswltan Nazarbaev şabuılğa baylanıstı qauipsizdik keñesiniñ jiının ötkizip, Almatıdağı şabuıldı terakt dep atadı.
Azat Europa / Azattıq radiosı
Pikir qaldıru