داڭقتى باتىر، جازۋشى باۋىرجان مومىشۇلى ءوزىنىڭ فوتوسۋرەتتەرىن، كۇندەلىكتى ومىردە پايدالانعان ىدىستارىن، كىتاپتارىن، ماۋزەرىن، سونىمەن قوسا تەمەكى تارتاتىن مۇشتەگىن، كارتاسىن جانە قويىن داپتەرىن 1965 جىلى يالتادا جازعان وسيەت حاتىندا جامبىل وبلىستىق مۋزەيىنە قالدىرعانىن ايتقان. بۇگىنگى تاڭدا اتالعان تاريحي-ولكەتانۋ مۋزەيىنىڭ «جامبىلدىقتار – ۇلى وتان سوعىس جىلدارىندا» اتتى زالىندا باۋىرجان مومىشۇلىنىڭ جەكە زاتتارى ەكسپوزيتسيادا ورىن العان. تەك وتكەن جىلى باتىردىڭ سوعىستا پايدالانعان كارتاسى مەن قويىن داپتەرى استانا قالاسىنداعى «اسكەري مۋزەيگە» بەرىلگەن ەكەن.
مۋزەيدە وق پەن وتتىڭ كۋاسىندەي بولىپ تۇرعان ماۋزەر باتىردىڭ كوزى عانا ەمەس، ايبار-سەسى، رۋحى بولىپ اسقاقتايدى. «كۇندەي كۇركىرەپ وتكەن» سوعىستىڭ قايعىسى مەن قاسىرەتىن ماۋزەر دە بويىنا بۇگىپ، بولمىسىنا جاسىرىپ تۇرعانداي.
جادىگەردىڭ تۇسىندا «ماۋزەر پولكوۆنيكا باۋىرجانا مومىشۋلى» دەگەن جازۋ بار. بار ءومىرىن اسكەري قىزمەتكە ارناپ، ۇلى وتان سوعىسىنا قاتىسقان داڭقتى قولباسشى بۇل ماۋزەردى سول وتتى جىلدارى پايدالانىپ، كەيىننەن كوزىنىڭ تىرىسىندە اۋليەاتا مۋزەيىنە تاپسىرعان. مۋزەيدىڭ عىلىمي ەكسپوزيتسيالىق جۇمىس جانە قوردى ەسەپكە الۋ ءبولىمىنىڭ مەڭگەرۋشىسى ءمولدىر قىزداربەكوۆانىڭ ايتۋىنشا، باۋىرجان مومىشۇلى اۋليەاتا جەرىنە ءبىر كەلگەنىندە ءوزىنىڭ قىلىشى مەن دومبىراسىن دا جەرگىلىكتى مۋزەيگە سىيلايتىن ويى بار ەكەنىن ايتقان ەكەن. وكىنىشكە قاراي، الدەبىر كىسىدەن بەرىپ جىبەرگەن قۇندى جادىگەرلەر سول كۇيى مۇندا جەتپەگەن. ەگەر قۇندى قازىنا جامبىل جەرىنە جەتىپ، مۋزەي تورىنەن ورىن العاندا جۇرتشىلىق بۇگىندە تاعى ءبىر تاعدىرلى جادىگەردىڭ كۋاگەرى بولاتىن ەدى.
جامبىل وبلىستىق تاريحي-ولكەتانۋ مۋزەيى 1931 جىلى 25 تامىزدا اۋليەاتا ولكەتانۋ مۋزەيىن اشۋ تۋرالى قابىلدانعان شەشىم نەگىزىندە قۇرىلعان. بۇگىندە 85 جىلدىق تاريحى بار مۋزەيگە كەلۋشىلەردىڭ قاتارى قالىڭ. اسىرەسە، باۋىرجان مومىشۇلىنىڭ تۇتىنعان بۇيىمدارى جانە وزگە دە زاتتارى جاستاردى پاتريوتتىق رۋحتا تاربيەلەپ كەلەدى.
حاميت ەسامان،
«ەگەمەن قازاقستان»
جامبىل وبلىسى
پىكىر قالدىرۋ