الەۋمەت

قورشاعان ورتانى قورعاۋ – ءار ادامنىڭ پارىزى!

kerey.kz

 |  Oct 15, 2017

"رۋحاني جاڭعىرۋ" باعدارلاماسى اياسىندا كاسپي تەڭىزى جاعالاۋىن ءتۇرلى
قوقىستاردان تازارتۋ ماقساتىندا، حالىق اۋزىندا "گولۋبايا بۋحتا" اتانىپ
كەتكەن جەردە ەكولوگيالىق سەنبىلىك ءوتتى دەپ حابارلايدى، وڭىرلىك
كوممۋنيكاتسيالار قىزمەتىنىڭ ءباسپاسوز قىزمەتى.
15.10.2017ج. اقتاۋ قالاسى
"كۇزگى تازالاۋ" اتتى سەنبىلىك جۇمىستارى "ەكو ماڭعىستاۋ" ۇكىمەتتىك ەمەس
ۇيىمىنىڭ باستاماسىمەن ۇيىمداستىرىلدى. شارانىڭ وتۋىنە تۇپقاراعان جانە
ماڭعىستاۋ وبلىسىنىڭ اكىمدىگى قولداۋ كورسەتتى.
ال سەنبىلىكتى وتكىزۋدەگى نەگىزگى ماقسات – كۇندەلىكتى ەكولوگيالىق مادەنيەتتى
قالىپتاستىرۋ بويىنشا كۇش-جىگەردى بىرىكتىرۋ، تۇرعىندار نازارىن قورشاعان
ورتانى قورعاۋ ماسەلەلەرىنە اۋدارۋ جانە ەكولوگيالىق احۋالدى جاقسارتۋ. تازالىق
شاراسىنا كەز-كەلگەن ادامعا قاتىسۋعا مۇمكىندىك الدى.
"ەكو ماڭعىستاۋ" ۇكىمەتتىك ەمەس ۇيىمىنىڭ ديرەكتورى كيريلل
وسيننىڭ ايتۋىنشا، "كۇزگى تازالاۋ" ايلىعى رەسپۋبليكالىق "رۋحاني جاڭعىرۋ"
جانە وڭىرلىك "تازا ايماق" باعدارلاماسى اياسىندا وتكىزىلىپ وتىر. ال، سەنبىلىككە ەڭ
بەلسەندى قاتىستقان مەكەمەلەر قاتارىندا ايسۇلۋ دۋتباەۆا باستاعان ماڭعىستاۋ
وبلىسى وڭىرلىك كوممۋنيكاتسيالار قىزمەتى، "قوعامدىق كەلىسىم" كوممۋنالدىق
ۇيىمى، وبلىستىق پروكۋراتۋرا، ماڭعىستاۋ تۋريزم كوللەدجى، "ADVER"
كومپانياسى جانە تابيعاتقا جاناشىر تۇرعىندار بولدى.
"كاسپي تەڭىزى جاعالاۋىن جينالىپ قالعان قوقىستان تازارتۋ جۇمىستارى
تۇراقتى تۇردە جۇرگىزىلەدى. ماسەلەن، "گولۋبايا بۋحتا" اۋماعىندا ەكولوگيالىق
دەسانت وسىدان 4 اي بۇرىن بولعان ەدى. قاراپ وتىرساق ايتارلىقتاي كوپ ۋاقىت
وتكەن جوق. مۇنداعى جاعدايدى كورىپ، كوڭىل-كۇيىمىز ءتۇسىپ كەتتى. قالايشا تۋعان
ولكەگە دەگەن وسىنداي جاۋاپسىزدىقپەن قاراۋعا بولادى؟ بۇل جاعدايدان كەيىن
ادامدارىڭ وزدەرىنە دەگەن قۇرمەتىنىڭ جوق بولعانى ما دەگەن ويعا قالادى ەكەنسىڭ.
ونىڭ ۇستىنە ايماقتا ءتۋريزمدى دامىتقىمىز كەلەدى. مۇنداي كورىنىستەن كەيىن
تۋريزم تۋرالى ايتۋدىڭ ءوزى ارتىق. وسىنداي دەمالىس ورىندارىنا كەلۋشىلەر
قاتارى كوپ ەكەندىگى ءسوزسىز، بىراق ولار قاراپايىم تازالىق ەرەجەلەرىن
ساقتامايتىنى كوڭىلگە قاياۋ تۇسىرەدى"، – دەيدى ول.
"گولۋبايا بۋحتا" تۇپقاراعان اۋدانىنا بارا جاتقان جولدىڭ 63 شاقىرىمىنان
بۇرىلعان اۋماقتا ورنالاسقان، ال سەنبىلىككە قاتىسۋشىلار بولسا اۆتوبۋستارمەن
جەتكىزىلدى. تازالىق ساقشىلارى بارلىق قاجەتتى قۇرال-سايماندارمەن قامتاماسىز
ەتىلدى. تەڭىز جاعالاۋى پلاستيكالىق، شىنى جانە باسقا دا قوقىستاردان تازارتىلدى.
سەنبىلىكتىڭ قورىتىندىسى بويىنشا بارلىعى 200-دەن استام قاپشىق قوقىس
جينالعان.
ء"بىزدىڭ ۇجىم تازالىق اكتسياسىن ءبىر اۋىزدان قولدادى جانە كومەككە كەلدى.
بارلىعىمىز دەمالىس كۇنىمىزدىڭ وسىنداي پايدالى شارۋاعا جۇمساعاندى ءجون
سانادىق. ايتا كەتەيىن، تەڭىز جاعالاۋىنان وسىنشاما كوپ قوقىس شىعادى دەپ

مۇلدەم ويلاماپپىن. نەگىزىنەن سىنىق شىنىلار، سپيرتتىك ىشىمدىك قۇيىلعان
بوتەلكەلەر سولايىمەن شاشىلىپ جاتىرعانىن كەزدەستىردىك، سونىمەن قاتار
تەمەكى تۇقىلدارى، پاكەتتەر مەن تاعام قالدىقتارى كوپ. قازىر تەڭىزدە شومىلۋ
ماۋسىمى رەسمي تۇردە جابىق بولعانىمەن، وسىنداي دەمالىس ورىندارىنا
كەلىشۋلەر قاتارى ءالى دە بار. سول دەمالۋشىلار وزدەرىنىڭ سوڭىن جيناماي كەتەتىنى
وكىنىشتى. مەن تۇسىنبەيمىن، قالايشا مۇنداي سۇلۋ جەرلەردى قوقىسقا تولتىرىپ
كەتۋگە بولادى؟! بۇل جاعداي وسىلاي جالعاسا بەرەتىن بولسا، ەكولوگيالىق
احۋالدىڭ ناشارلاي تۇسەتىنى انىق. قورشاعان ورتانى قورعاۋ ماسەلەسىنە ۇلكەن
جاۋاپكەرشىلىكپەن قاراۋىمىز كەرەك"، – دەيدى ماڭعىستاۋ وبلىسى وڭىرلىك
كوممۋنيكاتسيالار قىزمەتىنىڭ ديرەكتورى ايسۇلۋ دۋتباەۆا.
ەكولوگيالىق سەنبىلىك بارىسىندا ءبىر توننادان استام قوقىس جينالدى. ايتا
كەتۋ كەرەك، ايماقتا مۇنداي تازالىق جۇمىستارى كوپ جىلدار بويى تۇراقتى تۇردە
جۇرگىزىلەدى. سونىمەن قاتار، ماڭعىستاۋ وبلىسىندا "گولۋبايا بۋحتا" سەكىلدى
دەمالىس ورىندارى وتە كوپ جانە دەمالۋشىلار قاتارى كوبەيمەسە، ازايماي
وتىرعاندىعى ءسوزسىز. ءبىر وكىنىشتىسى، تازالىقتىڭ ساقتالماي وتىرعاندىعى.
بۇل رەتتە، دەمالىس كۇنى وتكەن ەكولوگيالىق سەنبىلىك "Face book" الەۋمەتتىك
جەلىسىن پايدالانۋشىلار اراسىندا قىزۋ تالقىلادى. باسىم بولىگى قورشاعان ورتانى
قورلاماي، كەرىسىنشە قورعاۋ ءۇشىن ءالى دە بولسا اۋقىمدى شارالاردى ۇيىمداستىرۋ
كەرەك ەكەندىگىن ايتسا، ەندىرى ءبىرى تارتىپكە باعىنباعاندارعا قاتىستى ءتيىستى شارالار
قابىلداۋدى كۇشەيتۋ كەرەكتىگىن العا تارتتى.
ماسەلەن، تاۋەلسىز ەكولوگ ادىلبەك قوزىباقوۆتى مازالاعان سۇراق نەلىكتەن
جەرگىلىكتى پوليتسيا قىزمەتى ءتارتىپ بۇزعاندارعا ايىپپۇل سالمايدى دەدى. ونىڭ
ويىنشا، ماڭعىستاۋ تابيعات قورعاۋ پروكۋرورىنىڭ اتىنا، ءتارتىپ ساقشىلارى زاڭ
بۇزاتىنداردى جاۋاپقا تارتۋ جونىندە تالاپ قويۋ ءۇشىن ارنايى حات جولداۋ قاجەت.
ايتا كەتۋ كەرەك، ەلباسى ن.نازارباەۆتىڭ "بولاشاققا باعدار: رۋحاني جاڭعىرۋ"
باعدارلاماسى اياسىندا "ساكرالدى قازاقستان" جوباسى جۇزەگە اسىرىلۋدا. ونىڭ
اياسىندا ەكولوگيالىق احۋالدى جاقسارتۋ مەن ەلدى مەكەندەردى اباتتاندىرۋ
جۇمىستارى جۇرگىزىلۋدە. ماڭعىستاۋلىقتار اتالمىش جوبانى جۇزەگە اسىرۋعا
بەلسەندى كىرىسىپ كەتتى.
سوندىقتان دا، مۇنداي شارالاردىڭ ماڭىزدىلىعىن ەسكەرە وتىر، ماڭعىستاۋ
وبلىسى وڭىرلىك كوممۋنيكاتسيالار قىزمەتى مەن "ەكو ماڭعىستاۋ" ۇكىمەتتىك ەمەس
ۇيىمى قورشاعان ورتانى قورعاۋعا جانە ونى جاقسارتۋعا ۇمتىلىپ، ەكولوگيالىق
سەنبىلىك سياقتى ۇيىمداستىرىلعان ءتۇرلى ءىس-شارالاردان تىس قالماۋعا شاقىرادى.

دايىنداعان نۇربول وقۋوۆ
قر جۋرناليستەر وداعىنىڭ مۇشەسى
ماڭعىستاۋ وبلىسى، اقتاۋ قالاسى