زايىرلى قوعامداعى ءدىندار ايەلدىڭ ورىنى
kerey.kz
قمدب-نىڭ وسكەمەن ايماقتىق وكىلدىگى «حاليفا -التاي» مەشىتىنىڭ ۇستازى، تەولوگ، شق وبلىستىق «ايەل -قىزدار» سەكتورىنىڭ جەتەكشىسى تالشىن قوجاحمەتوۆانىڭ قاتىسۋىمەن كۇرشىم اۋداندىق ورتالىق مەشىتتە «زايىرلى قوعامداعى ءدىندار ايەل تۇلعاسى» اتتى اۋداندىق سەمينار ءوتتى.
اتالمىش شاراعا، كۇرشىم اۋداندىق ىشكى ساياسات ءبولىمىنىڭ باستىعى اراي قاسىمباەۆا، كۇرشىم اۋداندىق جاستار رەسرۋستىق ورتالىعىنىڭ جەتەكشىسى شىراق دابىرباەۆا، مەشىت ۇستازى ايگۇل قانسەيىتوۆا قاتىستى.
ەستەرىڭىزگە سالاتىن بولساق، سەميناردىڭ وتۋىنە ورتالىق مەشىتتىڭ باس يمامى تىلەيبەك قاجى سويانۇلىنىڭ تاپسىرماسىنا سايكەس نايب يمامدارى اجى شامەرحان جانە جانىبەك ايدارحان ۇيتقى بولىپ وتىر.
وكىلدىكتەن ارنايى كەلگەن تەولوگ مامان، ءدىندار ايەلدىڭ زايىرلى قوعامداعى ورىنى مەن وتباسىنداعى اتقاراتىن مىندەتى، تۋىسقاندارىمەن قارىم-قاتىناسى، اتا-ەنەسىن سىيلاۋى قاتارلى تاقىرىپتارعا توقتالىپ، اسىل ءدىنىمىزدىڭ قۇندىلىعى، حانافي مازحابىنىڭ ارتىقشىلىعى، پايعامبارىمىزدىڭ (وعان اللانىڭ يگىلىگى مەن سالەمى بولسىن) حاديستەرىندەگى انا تۋرالى مازمۇنداردىڭ ەرەكشەلىگى جايىندا كەڭىنەن توقتالدى. ەكراننان تاقىرىپقا بايلانىستى بەينەروليك پەن سلايد كورسەتىلدى. قازاق حالقىنىڭ تۇرمىس تىرشىلىگى، سالت-ءداستۇرى مەن عۇرىپ ادەتى، عيبادات قۇلشىلىعىنىڭ ءبىر-بىرىنەن اجىرامايتىندىعىن تىلگە تيەك ەتتى. كۇندەلىكتى ومىردەجاڭادان باس قۇرايتىن جاستارعا نەكەنىڭ قاسيەتىن ءتۇسىندىرۋ كەرەكتىگىن اتادى.
بابالاردان جالعاسقان تاعىلىمدا ايەل اياۋلى انا، سۇىكتى جار، سۇيكىمدى قىز، يسلام كوزقاراسىمەن قارايتىن بولساق، پايعامبارىمىزدىڭ حاديسىندە: «ءجاننات انانىڭ تابانىنىڭ استىندا»، «سەندەردىڭ ەڭ جاقسىلارىڭ، ايەلدەرىڭە جاقسى قارىم-قاتىناستا بولعاندارىڭ»،- دەپ تۇسىنىكتەمە بەرەدى. پايعامبارىمىزدان (وعان اللانىڭ يگىلىگى مەن سالەمى بولسىن) كەيىن العاش يسلامدى قابىلداپ، ءدىن جولىندا بۇكىل مال-مۇلكىن سارپ ەتكەن ايەل كىسى حاديشا انامىز (ر.ا.) بولاتىن. سول سەبەپتى، اللانىڭ ەلشىسى (وعان اللانىڭ يگىلىگى مەن سالەمى بولسىن): «ەل مەنەن تەرىس اينالعان كەزدە حاديشا ماعان سەندى. ايتقاندارىمدى ەشكىم قابىلداماعاندا، مەنى العاشقى بولىپ راستاعان سول ەدى»- دەپ، ونى ءومىر بويى ۇمىتپاي، اركەز جاقسىلىقتارىن ەسكە الىپ وتىراتىن. ءتىرى كەزىندە جانناتتاعى ۇيىمەن سۇيىنشىلەنگەن ايەل كىسى ەدى. دالىرەك ايتقاندا، بىردە جەبىرەيىل پەرىشتە (ا.س.) پايعامبارىمىزعا (وعان اللانىڭ يگىلىگى مەن سالەمى بولسىن) كەلىپ: «راببىم حاديشاعا سالەم ايتتى. مەنەن دە سالەم ايتا بار. وعان ءجانناتتا شارشامايتىن، شالدىقپايتىن ءۇي تۇرعىزىلدى»،-دەيدى. بۇل قۋانىشتى اللا ەلشىسى (وعان اللانىڭ يگىلىگى مەن سالەمى بولسىن) حاديشا انامىزعا (ر.ا.) كەلىپ: «ۋا حاديشا! ساعان اللا مەن جەبرەيىل سالەم ايتتى»، دەپ حاباردى جەتكىزگەن كەزدە، حاديشا (ر.ا.) انامىز: «اللانىڭ ءوزى سالەم، ال، جەبىرەيىلگە سالەم بولسىن» – دەپ، اسقان كورەگەندىك تانىتادى. انالار قوعامنىڭ مەكتەبى، ولاردىڭ قۋانىشى الەمنىڭ قۋانىشى. ۇلى جازۋشى مۇحتار اۋەزوۆتىڭ: «ەل بولام دەسەڭ،بەسىگىڭدى تۇزە»،-دەگەن وتە تەرەڭ ءماندى،ناقىلى ايەل زاتىنىڭ قادىرىن مەڭزەپ تۇرعان بولسا كەرەك. ءدىن جولىنداعى نازىك جاندىلارعا اللا جەڭىلدىك بەرسىن!
اجى شامەرحان،
اۋداندىق مەشىتتىڭ نايب يمامى.
پىكىر قالدىرۋ