قولدان تىگىلگەن بەتپەردە 350  تەڭگە تۇرادى

الماتىلىقتار ءدارىحانالاردا جوعالىپ كەتكەن ماسكالاردى ۇيدە تىگىپ، ساتاتىن بيزنەستى قولعا الدى  دەپ حابارلايدىAzattyq Rýhyءتىلشىسى.

قىز-كەلىنشەكتەر قولدان ماسكا تىگىپ، ونى ينستاگرام ارقىلى جارنامالاپ جاتىر. قوروناۆيرۋستان قورىققان ادامدار قولدان تىگىلگەن ماسكانىڭ ساپاسى مەن باعاسىنا  مان بەرمەي ساتىپ الىپ جاتقان كورىنەدى. ءوزىن اراي دەپ تانىستىرعان كەلىنشەكتىڭ ايتۋىنشا، تاپسىرىس وتە كوپ.

«ماسكانىڭ ءبارى ماقتادان تىگىلگەن. كوپ رەت قولدانۋعا بولادى. جۋىپ، ۇتىكتەپ قايتا تاعا بەرەسىز. بۇگىن 500 دانا ماسكاعا تاپسىرىس الدىم، ۇلگەرە الماي جاتىرمىن. ءبىر داناسى 300 تەڭگەدەن. ءبىر-ەكى كۇندە دايىنداپ ۇلگەرە المايمىز، تاپسىرىس كوپ، كەزەككە قويىپ جاتىرمىز. دايىن بولعاندا، ءوزىمىز حابارلاسامىز»، – دەدى سۇراقتارعا ساقتانا جاۋاپ بەرگەن ول.

ماسكا تىگەتىندەر باعانى تۇسىرە المايتىندارىن ايتتى. دوللاردىڭ قىمباتتاۋىنا بايلانىستى  بازاردا ماتا باعاسى وسكەن. ءۇيدى شاعىن  تىگىن تسەحىنا اينالدىرعان قىز-كەلىنشەتكەر بالالارعا، ەرەسەكتەرگە دەپ جەكە-جەكە ماسكا تىگەدى.

«قازىر تاپسىرىس كوپ، راس ايتامىن، ۇلگەرمەي جاتىرمىز.  ءۇش كۇننەن سوڭ حابارلاسىڭىز. تاپسىرىستى ازدان قابىلدامايمىن، 10 داناسى 3500 تەڭگە تۇرادى. دوللار كوتەرىلسە دە، ءبىز ماسكانىڭ باعاسىن  ءالى قىمباتتاتپادىق. دايىن بولعاندا بورالدايدان كەلىپ الىپ كەتىڭىز. كەزەككە قويىپ، الدىن الا اقىسىن تولەگەندەرگە دايىندايىمىز. ماسكا ماقتا مەن ماتادان ەكى قاباتتالىپ تىگىلگەن.  مۇرىندى تىرەمەيدى»، – دەدى ءوز ءونىمىنىڭ ماقتاۋىن اسىرعان نۇرگۇل ەسىمدى كەلىنشەك.

ال كادىمگى مەديتسينالىق ماسكالار ءدارىحانالاردا جوق بولعانمەن، عالامتوردا تولىپ تۇر. ءبىر داناسى 150-250 تەڭگە ارالىعىندا جارنامالانعان ءۇش قاباتتى مەديتسينالىق  ماسكالاردى كەمى ءجۇز مىڭ دانادان  عانا ساتىپ الۋعا بولادى. تۇرعىندار دارىحانالارعا بارۋدان شارشاعاندىقتان جەكە ادامدارعا تاپسىرىس بەرىپ جاتقاندارىن ايتادى.

«وي، قانشا كۇن بولدى، باياعىدا ساتىپ العان ماسكالاردى تاستاماي، جۋىپ-جۋىپ قولانىپ ءجۇرمىز عوي.  ءدارىحانالاردا جوق قوي مۇلدەم. WhatsApp توپتاردان سۇراستىرىپ ءجۇرىپ، قولدان تىگەتىن اماداردى تاپتىق. قايتەمىز ەندى، قورىققان سوڭ ساقتىق شاراسىن جاساعان بولىپ جاتىرمىز»، – دەدى بالالارىنا ماسكا تاپپاي جۇرگەن تۇرعىن ۋبايدوللا سالىمباەۆ.

الماتى قالالىق قوعامدىق دەنساۋلىق ساقتاۋ باسقارماسىنىڭ باسشىسى جەتىسپەي جاتسا، قولدان تىگىپ قولدانۋدىڭ ەش ابەستىگى جوق ەكەنىن ايتتى.

«بىرىنشىدەن مەن قولدان تىگىلگەن ماسكالارعا جاۋاپ بەرەتىن مامان ەمەسپىن. ونداي قۇزىرەتىم جوق. وعان ارنايى ماماندار جاۋاپ بەرۋى كەرەك. بىراق، كەڭەس وداعى كەزىندە تاقتىق. سول زاماندا داكەدەن، ماتادان تىگىپ، تاعىپ جۇرە بەرەتىنبىز. جوقتان گورى وسى جاقسى»، -  دەدى  باسقارما باسشىسى تىلەۋحان ابىلداەۆ.

ءامىربولات قۇسايىنۇلى، الماتى