الماتى وبلىسىندا كاسىپكەر توتەنشە جاعدايعا بايلانىستى تابىسسىز قالعان، كۇنكورىسى تومەن 500 وتباسىن ازىق-تۇلىكپەن قامتاماسىز ەتتى، دەپ حابارلايدى Azattyq Rýhy تىلشىسى. «قايىرىمدىلىق كەرۋەنى» اتتى اۋىر جۇك كولىكتەرى ازىق-تۇلىكتى وبلىستىڭ ءۇش اۋدانىنا ءبىر اپتا بويى تاسىدى. العاشقى كومەك شالعايداعى اقسۋ اۋدانىنىڭ الەۋمەتتىك تۇرعىدا ءالجۋاز 200 وتباسىنا تەڭدەي ءبولىپ بەرىلدى.

«باسقا تۇسكەن قيىنشىلىق كەزىندە اۋىلدان شىققان ازاماتتار ەلىن ۇمىتپاي، حالىققا كومەگىن بەرىپ جاتىر. مۇنشا ازىق-تۇلىكتى ساتىپ الۋعا  اركىمنىڭ جاعدايى كەلمەيدى. سوناۋ الماتىدان وسىنشاما مول دۇنيە كەلەدى دەپ ويلاماپپىن. كومەك جىبەرگەن مولديار نۇرباەۆ دەگەن ازاماتقا اۋىل تۇرعىندارىنىڭ اتىنان العىس بىلدىرەمىز»، – دەدى بيكەن باەتوۆا.

قوس كولىككە تيەلىپ جەتكەن ونىمدەر ءار وتباسىنا بىرنەشە ايعا جەتەدى. ءار وتباسىنا جالپى جيىنتىعى 116 كەلىدەن استام ازىق-تۇلىك تاراتىلدى. الىستان جەتكەن اماناتتى العان ادامنىڭ ءبىرى جاسى 90 اسقان بيعايشا ماشانوۆا.

«جاستار مۇنداي قاۋىپتى، قيىندىقتى كورمەسىن. دەرت كەلمەسىن. قازىر مىنا اۋرۋ قيىن بولىپ جاتىر. كۇندىز-ءتۇنى حالقىم امان بولسىن دەپ ۋايىمدايمىن. جاستار جۇمىس تاپپاي قالعاندا بۇل ەلگە اجەپتاۋىر كومەك بولادى. ەلىن ويلاعان ازاماتتار امان بولىن»، – دەپ باتاسىن بەردى قارت اجە قايىرىمدىلىق جاساعان جاندارعا.

الماتىدان جەتكەن ازىق-تۇلىكتى اۋدان اكىمدىگى قابىلداپ، وزدەرى جاساعان ءتىزىم بويىنشا تۇرعىندارعا تاراتتى. اقسۋلىقتار اۋىلدان 25 جىل بۇرىن كەتسە دە، ارتىنداعى ەلىن ۇمىتپاعان ازاماتقا ريزاشىلىق ءبىلدىردى. اتىمتاي جومارتتىعىمەن اتى شىققان مولديار نۇرباەۆ بىلتىر 54 جىل كۇردەلى جوندەۋ كورمەگەن اتاقتى مامانيا مەكتەبىن تولىقتاي جاڭارتىپ، قاجەتتى تەحنيكالىق جابدىقتاردان بولەك وقۋ ورىنىنا سۋ جاڭا اۆتكولىك تە الىپ بەرگەن ەدى.

«وتكەن جىلى اۋىل حالقى باۋ-باقشاسىن سۋارسىن، قينالماسىن دەپ مولديار قىلشىقۇلى حالىققا 7 شاقىرىم جەردەن سۋ ارناسىن تارتىپ بەردى. بىلتىر الاشتىڭ ارداقتىسى ءىلياس جانسۇگىروۆتىڭ 125 جىلدىعىنا وراي اۋدان ورتالىعىنان اقىننىڭ الىپ ەسكەرتكىشىن تۇرعىزدى. بۇگىن، مىنە، توتەنشە جاعداي كەزىندە حالىققا تاعى قول ۇشىن بەردى. ۇلكەن-كىشىنىڭ اتىنان العىس ايتامىز»، – دەدى اقسۋ اۋدانى ارداگەرلەر القاسىنىڭ توراعاسى ارناي امانتاەۆ.

قايىرىمدىلىق كومەك جامبىل  مەن تالعار اۋداندارىنىڭ حالقىنا دا جىبەرىلدى. كۇن كورىسىن الماتىدان تاۋىپ جۇرگەن تۇرعىندار قازىر كارانتينگە بايلانىستى قالاعا كەلە الماي، تابىسىنان ايىرىلعان. اۋدان ورتالىعىنان 100 شاقىرىمداي جەردە تۇراتىن ايناگۇل ەسىمدى انانىڭ 8 بالاسى بار. ءسۇت ساتۋمەن عانا كۇن كورىپ جۇرگەن كوپ بالالى وتباسى قۋانىشتارىن جاسىرا الماي، العان ازىق-تۇلىك وزدەرىنە بىرنەشە ايعا جەتەتىنىن ايتتى.

«جامبىل اۋدانىنا قاراستى تاۋدىڭ تۇبىندەگى سۇڭقار دەگەن 5-6 عانا ءۇيى بار بولىمشەدە تۇرامىز. بۇل ازىق-تۇلىك بىزگە بەس-التى اي ازىق بولادى. ۇلكەن بالامىز ەندى عانا 18 جاسقا تولسا، كىشىمىز نەبارى 5 جاستا. ورازا ايىندا وسىنداي يگى ءىس جاساعان مولديار اعاعا العىسىمىز شەكسىز»، – دەدى شىنىباي مەن ايناگۇل ەسىمدى كوپ بالالى اتا-انا.

تۇرعىندار ءبىر جارىم ايدان اسا كارانتيندە جاتقان قينالا باستاعانىن ايتادى. ال مەتسەنات وسىنداي قيىن ساتتە عانا ەمەس، ەل بىرلىگى ءۇشىن ازاماتتار پرەزيدەنتىڭ باستاماسىن قولداپ، كومەك قولىن سوزۋ قاجەت دەپ سانايدى.

«پرەزيدەنتىمىز قاسىم-جومارت توقاەۆ كارانتين كەزىندە حالىققا بىرنەشە رەت ۇندەۋ جاسادى. ۆيرۋستىڭ قاۋىپتى ەكەنىن، حالىققا قيىن سوعىپ جاتقانىن ءتۇسىندىردى. مەملەكەتتى دامىتۋ جولىندا ەل ازاماتتارىنا ءۇمىت ارتاتىنىن العاشقى جولداۋىندا دا ايتتى. سوندىقتان بۇنداي ساتتە قولىندا قارجىسى بار ءار ازامات ءوزىن ويلاي بەرمەي، ەلگە، حالىققا شاماسىنشا كومەك قولىن سوزۋ كەرەك دەپ ويلايمىن. 60 توننا ازىق-تۇلىكتى الىپ، تاراتىپ بەرۋدى ءجون سانادىم. مەملەكەت باسشىسى قانداي تاپسىرما بەرسە دە، ورىنداۋعا تىرىسامىز. شىن مىقتى مەملەكەتتەن كومەك سۇراي بەرمەي، ەلگە قىزمەت قىلۋ كەرەك»، – دەدى الماتى وبلىسى «گاز شارۋاشىلىقتارىنىڭ قاۋىمداستىعى» زاڭدى تۇلعالار بىرلەستىگىنىڭ توراعاسى مولديار نۇرباەۆ.

بۇگىندە جاسى 70-تەن اسسا دا، اتتان تۇسپەگەن كاسىپكەر وڭىرگە اتىمتاي جومارتتىعىمەن تانىلعان. وبلىستان بولەك الماتىنىڭ ناۋرىزباي اۋدانىنداعى جانە قالاعا ىرگەلەس جاتقان ەلدىمەكەندەردەگى تاعى ءجۇز وتباسىعا دا قولۇشىن سوزدى. قايىرىمدىلىق جاساۋدان قايتپاعان مولديار نۇرباەۆ جامبىل، تالعار، قاراساي جانە نارۋىزباي اۋداندارىن كوگىلدىر وتىنمەن قامتاماسىز ەتىپ كەلەدى. الدىنا كەلگەن جاننىڭ ماسەلەسىن شەشۋگە قاشاندا قول ۇشىن سوزاتىن ازامات الماتى وبلىسىنىڭ، سونداي-اق اقسۋ، جامبىل سىندى بارلىعى ءتورت اۋداننىڭ قۇرمەتتى ازاماتى اتانعان. «التىن جۇلدىز» يەگەرى، «قۇرمەت» وردەنى، «پاراسات» وردەنى سىندى كوپتەگەن اتاقتاردىڭ يەسى اتانعان مولديار نۇرباەۆ رامازان ايىندا حالىققا جەڭىلدىكپەن گاز تارتۋ جۇمىستارىن ءارى قاراي جالعاستىرماق. ءوزى باسقاراتىن كومپانياداعى  الەۋمەتتىك جاعدايى ناشارلاۋ 117 جۇمىسشىنىڭ ارقايسىسىنا 45 مىڭ تەڭگەدەن تاعى دا اقشالاي كومەك بەرگىزدى. ايتپاقشى، حالىقتى گازبەن قامتاماسىز ەتىپ كەلە جاتقان كومپانياداعى 300-گە جۋىق جۇمىسشى كۇندەلىكتى تەگىن تۇستەنەدى ەكەن.

ءامىربولات قۇسايىنۇلى، الماتى