Almatı oblısında käsipker tötenşe jağdayğa baylanıstı tabıssız qalğan, künkörisi tömen 500 otbasın azıq-tülikpen qamtamasız etti, dep habarlaydı Azattyq Rýhy tilşisi. «Qayırımdılıq kerueni» attı auır jük kölikteri azıq-tülikti oblıstıñ üş audanına bir apta boyı tasıdı. Alğaşqı kömek şalğaydağı Aqsu audanınıñ äleumettik twrğıda äljuaz 200 otbasına teñdey bölip berildi.

«Basqa tüsken qiınşılıq kezinde auıldan şıqqan azamattar elin wmıtpay, halıqqa kömegin berip jatır. Mwnşa azıq-tülikti satıp aluğa  ärkimniñ jağdayı kelmeydi. Sonau Almatıdan osınşama mol dünie keledi dep oylamappın. Kömek jibergen Moldiyar Nwrbaev degen azamatqa auıl twrğındarınıñ atınan alğıs bildiremiz», – dedi Biken Baetova.

Qos kölikke tielip jetken önimder är otbasına birneşe ayğa jetedi. Är otbasına jalpı jiıntığı 116 keliden astam azıq-tülik taratıldı. Alıstan jetken amanattı alğan adamnıñ biri jası 90 asqan Biğayşa Maşanova.

«Jastar mwnday qauipti, qiındıqtı körmesin. Dert kelmesin. Qazir mına auru qiın bolıp jatır. Kündiz-tüni halqım aman bolsın dep uayımdaymın. Jastar jwmıs tappay qalğanda bwl elge äjeptäuir kömek boladı. Elin oylağan azamattar aman bolın», – dep batasın berdi qart äje qayırımdılıq jasağan jandarğa.

Almatıdan jetken azıq-tülikti audan äkimdigi qabıldap, özderi jasağan tizim boyınşa twrğındarğa tarattı. Aqsulıqtar auıldan 25 jıl bwrın ketse de, artındağı elin wmıtpağan azamatqa rizaşılıq bildirdi. Atımtay jomarttığımen atı şıqqan Moldiyar Nwrbaev bıltır 54 jıl kürdeli jöndeu körmegen ataqtı Mamaniya mektebin tolıqtay jañartıp, qajetti tehnikalıq jabdıqtardan bölek oqu orınına su jaña avtkölik te alıp bergen edi.

«Ötken jılı auıl halqı bau-baqşasın suarsın, qinalmasın dep Moldiyar Qılşıqwlı halıqqa 7 şaqırım jerden su arnasın tartıp berdi. Bıltır alaştıñ ardaqtısı İliyas Jansügirovtıñ 125 jıldığına oray audan ortalığınan aqınnıñ alıp eskertkişin twrğızdı. Bügin, mine, tötenşe jağday kezinde halıqqa tağı qol wşın berdi. Ülken-kişiniñ atınan alğıs aytamız», – dedi Aqsu audanı ardagerler alqasınıñ törağası Arnay Amantaev.

Qayırımdılıq kömek Jambıl  men Talğar audandarınıñ halqına da jiberildi. Kün körisin Almatıdan tauıp jürgen twrğındar qazir karantinge baylanıstı qalağa kele almay, tabısınan ayırılğan. Audan ortalığınan 100 şaqırımday jerde twratın Aynagül esimdi ananıñ 8 balası bar. Süt satumen ğana kün körip jürgen köp balalı otbası quanıştarın jasıra almay, alğan azıq-tülik özderine birneşe ayğa jetetinin ayttı.

«Jambıl audanına qarastı taudıñ tübindegi Swñqar degen 5-6 ğana üyi bar bölimşede twramız. Bwl azıq-tülik bizge bes-altı ay azıq boladı. Ülken balamız endi ğana 18 jasqa tolsa, kişimiz nebäri 5 jasta. Oraza ayında osınday igi is jasağan Moldiyar ağağa alğısımız şeksiz», – dedi Şınıbay men Aynagül esimdi köp balalı ata-ana.

Twrğındar bir jarım aydan asa karantinde jatqan qinala bastağanın aytadı. Al mecenat osınday qiın sätte ğana emes, el birligi üşin azamattar Prezidentiñ bastamasın qoldap, kömek qolın sozu qajet dep sanaydı.

«Prezidentimiz Qasım-Jomart Toqaev karantin kezinde halıqqa birneşe ret ündeu jasadı. Virustıñ qauipti ekenin, halıqqa qiın soğıp jatqanın tüsindirdi. Memleketti damıtu jolında el azamattarına ümit artatının alğaşqı Joldauında da ayttı. Sondıqtan bwnday sätte qolında qarjısı bar är azamat özin oylay bermey, elge, halıqqa şamasınşa kömek qolın sozu kerek dep oylaymın. 60 tonna azıq-tülikti alıp, taratıp berudi jön sanadım. Memleket basşısı qanday tapsırma berse de, orındauğa tırısamız. Şın mıqtı memleketten kömek swray bermey, elge qızmet qılu kerek», – dedi Almatı oblısı «Gaz şaruaşılıqtarınıñ qauımdastığı» zañdı twlğalar birlestiginiñ törağası Moldiyar Nwrbaev.

Büginde jası 70-ten assa da, attan tüspegen käsipker öñirge atımtay jomarttığımen tanılğan. Oblıstan bölek Almatınıñ Naurızbay audanındağı jäne qalağa irgeles jatqan eldimekenderdegi tağı jüz otbasığa da qolwşın sozdı. Qayırımdılıq jasaudan qaytpağan Moldiyar Nwrbaev Jambıl, Talğar, Qarasay jäne Naruızbay audandarın kögildir otınmen qamtamasız etip keledi. Aldına kelgen jannıñ mäselesin şeşuge qaşanda qol wşın sozatın azamat Almatı oblısınıñ, sonday-aq Aqsu, Jambıl sındı barlığı tört audannıñ qwrmetti azamatı atanğan. «Altın Jwldız» iegeri, «Qwrmet» ordeni, «Parasat» ordeni sındı köptegen ataqtardıñ iesi atanğan Moldiyar Nwrbaev Ramazan ayında halıqqa jeñildikpen gaz tartu jwmıstarın äri qaray jalğastırmaq. Özi basqaratın kompaniyadağı  äleumettik jağdayı naşarlau 117 jwmısşınıñ ärqaysısına 45 mıñ teñgeden tağı da aqşalay kömek bergizdi. Aytpaqşı, halıqtı gazben qamtamasız etip kele jatqan kompaniyadağı 300-ge juıq jwmısşı kündelikti tegin tüstenedi eken.

Ämirbolat Qwsayınwlı, Almatı