ءشامشى اتىنداعى كوشەنىڭ اتاۋى اكىمنىڭ اكەسىنىڭ اتىنا وزگەرتىلە مە؟
kerey.kz
ەلىمىزدىڭ ءانۇرانى اۆتورلارىنىڭ ءبىرى، ءۆالستىڭ پاديشاسى اتانعان اتاقتى سازگەر ءشامشى قالداياقوۆتى بىلمەيتىن قازاق جوق دەسەك تە بولاتىن شىعار. ءبىراز ەلدى مەكەندەردە ول كىسىنىڭ اتى بەرىلگەن كوشەلەر بار. ال تاياۋدا سونداي كوشەلەردىڭ ءبىرىنىڭ اتاۋى باسقاشا بولىپ وزگەرمەكشى ەكەن. بۇل جونىندە بىزگە سارىاعاش اۋدانىنداعى قىزىلجار اۋىلدىق وكرۋگىنەن حابارلاسقان جامال رامازانوۆا ەسىمدى ازاماتشا بىلاي دەدى:«اۋداندىق «سارىاعاش» گازەتىنىڭ وتكەن ءنومىرىن وقىپ وتىرىپ شاعىن حابارلاماعا كوزىم ءتۇستى. وندا: «6-ماۋسىم كۇنى ساعات 11.00-دە ب.مايلين اتىنداعى مەكتەپتە جاسكەشۋ اۋىلىنداعى ءشامشى قالداياقوۆ اتىنداعى كوشەنىڭ اتاۋىن وزگەرتىپ، وعان جۇپاربەك ۇمبەتتىڭ ەسىمىن بەرۋ تۋرالى ۇسىنىس تالقىلانادى» دەپ جازىلىپتى. سوندا ءشامشى كىم، جۇپاربەك كىم؟ مەن ءشامشىنى بىلەمىن، ال جۇپاربەك دەگەن ادام تۋرالى مۇلدە ەستىمەپپىن دە. مەن سەكىلدى ادام مىڭداپ سانالادى. پرەزيدەنتتىڭ ءوزى بىرەۋدىڭ كوكەسىنىڭ اتىن كوشەگە بەرۋدى توقتاتىڭدار دەگەن جوق پا؟ ءتىپتى بەرگىسى كەلسە باسقا كوشە قۇرىپ قالدى ما؟ اتاۋى جوق كوشەلەر كوپ ەمەس پە؟ جاڭادان اشىلعان كوشەلەرگە بەرسىن، نەگە قالداياقوۆتىڭ ەسىمىن كوشەدەن الىپ تاستاۋ كەرەك؟»
بۇدان كەيىن ءبىز قىزىلجار اۋىلدىق وكرۋگىندەگى ءىس باسقارۋشى عازيز مايريحوۆقا حابارلاسقانىمىزدا ول كىسى بىلاي دەدى: «جۇپاربەك ۇمبەت – بۇرىنعى اكىم جاپپاربەك ۇمبەتتىڭ اكەسى. سول كىسى قالداياقوۆ كوشەسىن اكەسىنىڭ اتىنا وزگەرتۋ تۋرالى بىرنەشە ۇسىنىس بەردى. ەندى ءبىز ونى تۇرعىنداردىڭ تالقىسىنا سالۋعا مىندەتتىمىز. ش.قالداياقوۆتى بىلەمىز، ءانۇراننىڭ اۆتورى، سازگەر. ال جۇپاربەك ۇمبەت – سوعىس ارداگەرى. نە بولاتىنىن ەندى تۇرعىندار شەشەدى». ارينە، قىزىلجارعا كورشى قۇركەلەس اۋىلىنا جاپپاربەك ۇمبەتتىڭ اكىم بولعانىن بىرەۋ بىلسە، بىرەۋ بىلە قويماس. بىراق بۇرىنعى اكىمنىڭ بۇل اۋىلعا ىقپالى ءجۇرمەيدى، بەدەلى جوق دەپ ەشكىم ايتا المايدى. سوندىقتان مەكتەپتە وتەتىن جيىن كەزىندە جەرگىلىكتى تۇرعىندار ش.قالداياقوۆ تۋرالى مۇلدە ۇمىتىپ، رۋشىلدىق پەن جەرشىلدىككە سالىنىپ كەتپەسىنە كىم كەپىل؟ سوندىقتان ءبىز بۇل ماسەلەدە اۋدان اكىمىنىڭ ورىنباسارى قۇدىرەت قىستاۋباەۆتىڭ پىكىرىن بىلمەك بولىپ ول كىسىگە دە حابارلاستىق. «بۇل ماسەلەدەن از-كەم حابارىم بار، – دەدى اكىمنىڭ ورىنباسارى. – ج.ۇمبەت سوعىس ارداگەرى بولعاندىقتان ۇرپاقتارى كوشەگە اتىن بەرگىسى كەلەتىن شىعار. ونى تۇرعىندار شەشەدى. بىراق تۇرعىنداردىڭ توقسان پايىزى ج.ۇمبەتتىڭ تۋىسقانى، اعايىن-جەكجاتتارى بولىپ شىعاتىنىن دا ەسكەرۋ كەرەك. نەگىزى كوشە مەن اۋىل اتاۋلارىنا ادامنىڭ اتىن بەرمەۋ تۋرالى موراتوري بار ەدى. بىراق جۋىردا ۇكىمەت باسشىسىنىڭ ورىنباسارى بەردىبەك ساپارباەۆتان سوعىس ارداگەرلەرىنىڭ ەسىمىن كوشەلەرگە بەرۋگە بولاتىنى تۋرالى نۇسقاۋ بولدى. بۇل كىسىلەر سوعان سۇيەنىپ وتىرسا كەرەك». مىنە، سارىاعاش جاقتا وسىنداي ءبىر جاي ورىن الىپ تۇر. جالپى، ءشامشى قالداياقوۆ اتىنداعى كوشەگە جۇپاربەك ۇمبەتتىڭ ەسىمىن بەرۋ ماسەلەسى ازىرگە تولىق شەشىلگەن جوق. دەگەنمەن الداعى ۋاقىتتا كوشە اتاۋى وزگەرمەيدى دەپ ايتۋعا دا بولمايتىن سەكىلدى. بۇعان باسقالار نە دەر ەكەن؟ ۇ. ۇمبەت. zamana.kz |
پىكىر قالدىرۋ