بەيسەنبى كۇنى كەشكە الماتىنىڭ الاتاۋ اۋدانىنداعى «جىبەك جولى» بازارىندا پوليتسيانىڭ كۇدىكتى ەكى ادامدى ۇستاۋ وپەراتسياسى كەزىندە اتىس بولىپ، ءبىر كۇدىكتىنىڭ وققا ۇشىپ قازا تاپقانى حابارلانعان.

ازاتتىق ءتىلشىسى وقيعا بولعان جەرگە – الماتى قالاسىنداعى رايىمبەك داڭعىلىنىڭ قالادان باتىس باعىتقا شىعا بەرىستەگى تۇسىندا تۇرعان «جىبەك جولى» بازارىنا بۇگىن تاڭەرتەڭ باردى.

جۇمىستارىنا ەندى كەلىپ جاتقان ساتۋشىلاردىڭ كوبى كەشە قانداي وقيعا بولعانىن بىلمەيدى. ولاردىڭ سوزىنە قاراعاندا، بازار كەشكى ساعات 5-تەن وتە جابىلا باستايدى، ال كەشەگى اتىس كەشكى ساعات 6:30 شاماسىندا بولعان.

ازاتتىق تىلشىسىمەن سويلەسكەن ساتۋشىلاردىڭ كەيبىرى وقيعانى سىرتتاي كورگەنىن ايتادى. باسىم كوپشىلىگى اۆتوكولىكتىڭ قوسالقى بولشەكتەرىن ساتۋعا ارنالعان «جىبەك جولى» بازارىنىڭ شەت جاعىندا قۇرىلىس ماتەريالدارىن ساتاتىن بىرەر قاتار بار. ساتۋشىلاردىڭ سوزىنە قاراعاندا، پوليتسيا مەن بەلگىسىز ادامداردىڭ اراسىنداعى اتىس وسى قاتارلاردىڭ الدىنداعى كولىك قوياتىن تۇراقتا بولعان. اتىس كەزىندە بازارداعى كەيبىر ساۋدا ورىندارى ءالى جابىلىپ ۇلگەرمەگەن. ساۋداگەرلەر «العاشىندا فەيەرۆەرك اتىلىپ جاتىر دەپ ويلاپ جاقىنداپ بارماق بولعانىمىزدا ارناۋلى جاساق قىزمەتكەرلەرى قۋىپ جىبەردى، اتىس بولىپ جاتقانىن كەيىن الىستان بايقادىق» دەيدى. ولاردىڭ سوزىنە قاراعاندا اتىس 15-20 مينۋتقا سوزىلعان.

“جىبەك جولى” بازارىنداعى اتىس بولعان ورىن. الماتى، 26 ماۋسىم 2015 جىل.

وقيعانى سىرتتاي كورگەندەردىڭ ايتۋىنشا، اتىس كەزىندە پوليتسياعا قارسىلاسقانداردىڭ ءبىرى وسى جەردە ولگەن، ەكىنشى قاتتى جارالانىپ قولعا تۇسكەن.

اتىس بولدى دەلىنگەن جەردە كولىك اينەگىنىڭ سىنىقتارى مەن رەزەڭكە قولعاپ، تاعى دا باسقا ۇساق-تۇيەكتەر شاشىلىپ جاتتى. بىراق تۇنىمەن جاۋعان جاڭبىردان كەيىن اسفالت سۋمەن شايىلىپ كەتكەن.

ساتۋشىلاردىڭ ءبىرىنىڭ سوزىنشە «پوليتسياعا قارسىلاسقان» دەلىنگەن ەكى جىگىت «جىبەك جولى» بازارىنداعى ساتۋشىلارعا كالكۋلياتور، قالامساپ سەكىلدى ۇساق-تۇيەك زاتتار اكەپ وتكىزىپ جۇرگەن.

– ءبىزدىڭ بىلۋىمىزشە، ولار – الماتى وبلىسى شەلەك اۋدانىنىڭ جىگىتتەرى. ءبىزدىڭ قاتارىمىزدا قۇرىلىس ماتەريالدارىن ساتاتىن ۇزىناعاش اۋىلىنىڭ ازاماتىنا كەلىپ، اڭگىمەلەسىپ تۇراتىن. ۇشەۋى دە ساقال قويعان. ەكى جىل بۇرىن «بەرەكە» بازارىندا دا ۇساق ساۋدامەن اينالىساتىن. ول كەزدە ساقالدارى جوق ەدى، – دەيدى اتى-ءجونىن ايتۋدان جانە ۆيدەوكامەراعا سويلەۋدەن باس تارتىپ، تەك ديكتوفونعا سويلەۋگە كەلىسكەن ساتۋشى ايەل.

ونىڭ سوزىنە قاراعاندا، كورشىلەس كونتەينەردەگى ۇزىناعاشتىق جىگىت سوڭعى اپتادا ءبىر ساعاتتاي عانا ساۋدا جاساپ، الگى ەكى جىگىتپەن بىرگە كەتىپ قالىپ جۇرگەن. ساتۋشى ايەل كۇنارا كەلىپ تۇراتىن ەكى جىگىتتىڭ كەشە كەشكە دەيىن بازاردا كىدىرىپ قالعانىن ايتادى. پوليتسيانىڭ ارناۋلى جاساعى كەلگەندە بازار ىشىندەگى اۆتوتۇراقتا تۇرعان Daewoo Damas ماركالى كولىكتە ەكى ادام وتىرعانىن كورگەنىن ايتقان كۋاگەر «ولاردىڭ ناقتى كىمدەر ەكەنىن، قولدارىندا قارۋ بولعان-بولماعانىن بىلمەيتىنىن» مالىمدەدى.

“جىبەك جولى” بازارىنداعى اتىس (وقىرمان جولداعان ۆيدەو)

ءىىد سايتىنداعى دەرەككە قاراعاندا، «كاسىپكەردى توناۋدى جوسپارلادى» دەگەن كۇدىككە ىلىنگەن ەكى ادام – شىعىس قازاقستان وبلىسىنىڭ تۋمالارى. ولار كەشە كەشكە پوليتسياعا وق اتىپ قارسىلىق كورسەتكەن. اتىس كەزىندە كۇدىكتىلەردىڭ ءبىرى وققا ۇشىپ قايتىس بولعان، ەكىنشىسى تىرىدەي قولعا تۇسكەن. ءىىد دەرەگىنشە، كۇدىكتىلەر مىنگەن كولىكتەن «كارابين، رەۆولۆەر مەن تراۆماتيكالىق تاپانشا تابىلعان». دەپارتامەنت بۇل وقيعاعا قاتىستى تەرگەۋ-تەكسەرۋ شاراسى ءجۇرىپ جاتقانىن ايتتى.