الماتىدا كولىكتەردىڭ دوڭگەلەگىن ەر كىسىدەي جوندەيتىن بويجەتكەن بار. كولىك جۇرگىزۋشىلەردىڭ كوپشىلىگى العاشىندا وعان تاڭىرقاپ قارايدى ەكەن. NUR.KZءتىلشىسى كولىك جوندەۋشى ارۋدى جۇمىس ورنىنان ىزدەپ تاۋىپ، سۇحباتتاسىپ قايتتى.

بويجەتكەن دوڭگەلەك جوندەيدى دەگەن تەمىر ۆاگوننىڭ قاسىنا كەلگەنىمىزدە وندا ەشكىم بولمادى.

كورشىلەس دۇڭگىرشەكتىڭ ىشىنە كىرىپ، اتىن بىلمەسەك تە “وسىنداي ىسپەن اينالىساتىن بويجەتكەندى تانيسىزدار ما؟”، – دەپ سۇرادىق. ەكى قىز تاڭ قالىپ، ءبىرى “ول مەنمىن. جاي ىزدەدىڭىز بە؟” دەپ سۇراق قويا باستادى.

جۋرناليستەر ەكەنىمىزدى تۇسىندىرگەن كەزدە ء“وزىم جايلى ماعلۇمات بەرۋگە قارسى ەمەسپىن. تەك سايتىڭىزدان ءتۇرىمدى كورسەتپەۋىڭىزدى سۇرايمىن. سەبەبى تۋىستارىم “اۋىر جۇمىس ىستەمە” دەپ قارسىلىق ءبىلدىرۋى مۇمكىن” دەگەن ءوتىنىشىن ايتتى.

مارينا جۇمىسى جايلى ءوز پىكىرىمەن ءبولىستى.

“مەنىڭ جاسىم 27 دە. وسى جەردە جۇمىس ىستەگەنىمە ءۇش جىلعا جاقىنداپ قالدى. تابىسىم جاقسى. مەن بۇل جۇمىستى اۋىر دەپ ويلامايمىن. تەك باستاپقى كەزدە جاقسىلاپ ءتۇسىنىپ الساڭىز بولعانى. ءسىز دە ىستەپ كەتەسىز”، – دەيدى ارۋ.

ول جاستايىنان اۋىلدا قارا جۇمىستىڭ بارلىق ءتۇرىن ىستەگەنىن ايتتى. مال باعىپ، جەر اۋدارۋ، ەگىن سالىپ، جيناپ الۋ، بارلىعىن وتباسىندا ءوزى ىستەپتى. مارينانىڭ الدىندا ەكى اپكەسى بولعاندىقتان، اكەسى ونى وزىمەن ەرتىپ ءجۇرىپ، وسىنداي ەڭبەككە باۋلىپتى.

“مەن نەگىزى بالا كۇنىمنەن قىسقا شاشتى ۇل سياقتى ءوستىم. مەنەن كەيىن ءىنىم دۇنيەگە كەلدى. ونى كىشكەنتاي، جالعىز ۇل دەپ كۇنگە شىعارماۋعا تىرىساتىنبىز. قازىر ول قايتا مەننەن نازىك”، – دەپ كۇلدى بويجەتكەن.

مارينانىڭ سوزىنە سەنسەك، ول اۋىلدا ءجۇرىپ، اۋىر كولىكتەردى جۇرگىزىپ ۇيرەنگەن. ءتىپتى اكەسىمەن ەرىپ ءجۇرىپ، ولاردى قالاي جوندەۋگە دەيىن ءتۇسىنىپ العان.

“مەن بارلىق قىزدار سياقتى العاش الماتىعا كەلگەن كەزىمدە اسحانالاردا دايارشى بولىپ جۇمىس ىستەدىم. ودان قالسا تۇشپارا ءتۇيدىم. دۇكەندە ساتۋشى دا بولدىم. قازىر ونداي جۇمىستاردى قايتا بارىپ، ىستەگىم كەلمەيدى. سەبەبى مۇندا وزىمە ءوزىم قوجايىنمىن. تابىسىم تۇراقتى بولماسا دا وزىمە، اتا-اناما جەتەدى. قىس باستالعاندا ءبىر اي، كوكتەمدە ءبىر اي كۇنىنە جوق دەگەندە 15-20 مىڭداپ تابامىن. ارينە ماڭداي تەرىممەن”، – دەيدى مارينا.

مارينانى العاش ەستىگەندە ادەتتەگى دوڭگەلەك جوندەيتىن جىگىتتەر سياقتى قولى قارا ماي شىعار دەپ ەلەستەتكەن ەدىك. الايدا بارىپ كورگەن كەزىمىزدە مۇلدە باسقاشا بولدى.

“مەن ەركەك شورا ەمەسپىن. تەك ءومىردىڭ تالابى بويىنشا وسى جۇمىستامىن. ءارى ودان نامىستانبايمىن. سىنىپتاستارىم، وزىمنەن كىشى ءىنى-سىڭلىلەرىم وسى جۇمىستا ەكەنىمدى بىلەدى. مەن دە قوناققا شىقسام شاشىمدى ساندەپ، ءتۇرلى كويلەكتەر مەن وكشەلى اياق كيىم كيىپ شىعامىن. مىندەتتى تۇردە تىرناعىمنىڭ ەتىن الدىرىپ، ءسان سالونىنا بارىپ، بوياتىپ جۇرەمىن. ونسىز ءوزىمدى سەنىمدى سەزىنە المايمىن”، – دەيدى مارينا.

ال نازىك جاندى دوڭگەلەك جوندەۋشىنىڭ كومەگىنە جۇگىنەتىن جۇرگىزۋشىلەر “مارينا دوڭگەلەكتى جاماسا دا، اۋىستىرسا دا ۇقىپتى ىستەيدى. قىزىعى دوڭگەلەككە قاتىستىنىڭ ءبارىن ءبىلىپ العان. قولىنان كەلمەيتىنى جوق. ءتىپتى  ءتۇرلى اپپاراتتارىنا دەيىن تۇگەندەپ العان”، – دەپ ماقتادى.

مارينا ءوزىنىڭ تۇرمىسقا شىقپاعانىن ايتىپ، “جىگىت شىن سۇيسە، جۇمىسى كەدەرگى بولادى دەپ ويلامايتىنىن” دا جاسىرمادى.

ءوزى باق-قا ءان شىرقاپ، ءانشى رەتىندە شىعۋدى بالا كۇنىنەن ارمانداپتى. ءتىپتى ءبىر جىلى “قازاقستان داۋىسى” جوباسىندا باعىن سىناعان ەكەن.

“مەن ول جەرگە دايىندىقسىز باردىم. سوسىن مىنا جۇمىسىم داۋىسىمنىڭ تازا شىعۋىنا كەدەرگى بولىپ جاتىر ەكەن. اۋىر زاتتى كوتەرەمىن. تىنىس جولدارىنا سالماق تۇسەدى. مۇمكىندىگىم بولىپ جاتسا، جاقسىلاپ دايىندالىپ، سول جوباعا تاعى دا قاتىسامىن دەپ وتىرمىن”، – دەيدى بويجەتكەن.

دەرەككوز: Nur.kz