Алматыда көліктердің дөңгелегін ер кісідей жөндейтін бойжеткен бар. Көлік жүргізушілердің көпшілігі алғашында оған таңырқап қарайды екен. NUR.KZтілшісі көлік жөндеуші аруды жұмыс орнынан іздеп тауып, сұхбаттасып қайтты.

Бойжеткен дөңгелек жөндейді деген темір вагонның қасына келгенімізде онда ешкім болмады.

Көршілес дүңгіршектің ішіне кіріп, атын білмесек те “Осындай іспен айналысатын бойжеткенді танисыздар ма?”, – деп сұрадық. Екі қыз таң қалып, бірі “Ол менмін. Жай іздедіңіз бе?” деп сұрақ қоя бастады.

Журналистер екенімізді түсіндірген кезде “Өзім жайлы мағлұмат беруге қарсы емеспін. Тек сайтыңыздан түрімді көрсетпеуіңізді сұраймын. Себебі туыстарым “ауыр жұмыс істеме” деп қарсылық білдіруі мүмкін” деген өтінішін айтты.

Марина жұмысы жайлы өз пікірімен бөлісті.

“Менің жасым 27 де. Осы жерде жұмыс істегеніме үш жылға жақындап қалды. Табысым жақсы. Мен бұл жұмысты ауыр деп ойламаймын. Тек бастапқы кезде жақсылап түсініп алсаңыз болғаны. Сіз де істеп кетесіз”, – дейді ару.

Ол жастайынан ауылда қара жұмыстың барлық түрін істегенін айтты. Мал бағып, жер аудару, егін салып, жинап алу, барлығын отбасында өзі істепті. Маринаның алдында екі әпкесі болғандықтан, әкесі оны өзімен ертіп жүріп, осындай еңбекке баулыпты.

“Мен негізі бала күнімнен қысқа шашты ұл сияқты өстім. Менен кейін інім дүниеге келді. Оны кішкентай, жалғыз ұл деп күнге шығармауға тырысатынбыз. Қазір ол қайта меннен нәзік”, – деп күлді бойжеткен.

Маринаның сөзіне сенсек, ол ауылда жүріп, ауыр көліктерді жүргізіп үйренген. Тіпті әкесімен еріп жүріп, оларды қалай жөндеуге дейін түсініп алған.

“Мен барлық қыздар сияқты алғаш Алматыға келген кезімде асханаларда даяршы болып жұмыс істедім. Одан қалса тұшпара түйдім. Дүкенде сатушы да болдым. Қазір ондай жұмыстарды қайта барып, істегім келмейді. Себебі мұнда өзіме өзім қожайынмын. Табысым тұрақты болмаса да өзіме, ата-анама жетеді. Қыс басталғанда бір ай, көктемде бір ай күніне жоқ дегенде 15-20 мыңдап табамын. Әрине маңдай теріммен”, – дейді Марина.

Маринаны алғаш естігенде әдеттегі дөңгелек жөндейтін жігіттер сияқты қолы қара май шығар деп елестеткен едік. Алайда барып көрген кезімізде мүлде басқаша болды.

“Мен еркек шора емеспін. Тек өмірдің талабы бойынша осы жұмыстамын. Әрі одан намыстанбаймын. Сыныптастарым, өзімнен кіші іні-сіңлілерім осы жұмыста екенімді біледі. Мен де қонаққа шықсам шашымды сәндеп, түрлі көйлектер мен өкшелі аяқ киім киіп шығамын. Міндетті түрде тырнағымның етін алдырып, сән салонына барып, боятып жүремін. Онсыз өзімді сенімді сезіне алмаймын”, – дейді Марина.

Ал нәзік жанды дөңгелек жөндеушінің көмегіне жүгінетін жүргізушілер “Марина дөңгелекті жамаса да, ауыстырса да ұқыпты істейді. Қызығы дөңгелекке қатыстының бәрін біліп алған. Қолынан келмейтіні жоқ. Тіпті  түрлі аппараттарына дейін түгендеп алған”, – деп мақтады.

Марина өзінің тұрмысқа шықпағанын айтып, “Жігіт шын сүйсе, жұмысы кедергі болады деп ойламайтынын” да жасырмады.

Өзі БАҚ-қа ән шырқап, әнші ретінде шығуды бала күнінен армандапты. Тіпті бір жылы “Қазақстан дауысы” жобасында бағын сынаған екен.

“Мен ол жерге дайындықсыз бардым. Сосын мына жұмысым дауысымның таза шығуына кедергі болып жатыр екен. Ауыр затты көтеремін. Тыныс жолдарына салмақ түседі. Мүмкіндігім болып жатса, жақсылап дайындалып, сол жобаға тағы да қатысамын деп отырмын”, – дейді бойжеткен.

Дереккөз: Nur.kz