قازاقستان تاريحىن كورسەتۋگە ۇكىمەت تاپسىرىس بەرگەن ءارى كوپ جارنامالانعان «قازاق ەلى» سەريالى ءتۇسىرىلىم باستالماي جاتىپ قارجىدان قىسىلعان ەدى. اۋەلى بيىل 16 جەلتوقساندا – قازاقستان تاۋەلسىزدىگى كۇنى كورسەتۋگە ۋادە ەتكەن، ەندى سەريالدىڭ ءتۇسىرىلىمىن تاعى ءبىراز ايعا سوزباق. جوسپارلانعان سومانى 5 ميلليون دوللارعا دەيىن كەمىتىپ تاستاعان سوڭ سەريالدى 10 سەرياعا دەيىن قىسقارتۋعا تۋرا كەلگەن.

بىراق پروديۋسەر ارمان اسەنوۆتىڭ ايتۋىنشا، سالىق سياقتى شىعىنداردى تولەگەننەن كەيىن ءتۇسىرىلىم توبىنا بيۋدجەتتەن بولىنگەن سومانىڭ تەك 2 ميلليون دوللارى عانا جەتكەن. ارمان اسەنوۆتىڭ ايتۋىنشا، سەريالعا مەملەكەتتەن بولىنگەن اقشا تاۋسىلعان، سەريال ءتۇسىرىلىمىن تامىزداعى تەڭگە دەۆالۆاتسياسى «اياقتان شالعان». ال ءتۇسىرىلىمدى ءالى جالعاستىرۋ كەرەك.

«قازاق ەلى» سەريالىنىڭ رەجيسسەرى ءارى جۇرتقا قازاقستان پرەزيدەنتى نۇرسۇلتان نازارباەۆتى دارىپتەگەن كوركەم فيلمدەردىڭ رەجيسسەرى رەتىندە تانىلعان رۇستەم ابدىراشەۆتىڭ سوزىنشە، سەريالدىڭ شامامەن 40 پايىزى تۇسىرىلگەن. ​

بولاشاق كورەرمەننەن ازىرشە 666 دوللار تۇسكەن

«قازاق ەلى» تەلەسەريالى سوۆەتتىك قازاقستان جازۋشىسى ءىلياس ەسەنبەرليننىڭ «كوشپەندىلەر» تريلوگياسىنىڭ ءبىرىنشى ءبولىمى نەگىزىندە ءتۇسىرىلىپ جاتىر. فيلم جەلىسىنە 15-عاسىرداعى وقيعالار ارقاۋ بولعان. ءبىر كەزدەگى قۋاتتى يمپەريا – التىن وردانىڭ ىدىراۋ ءداۋىرى، ودان كەيىن قازىرگى قازاقستان تەرريتورياسىندا ءابىلحايىر باستاپ قۇرعان حاندىقتاردىڭ ءبىرى كورسەتىلەدى. كەيىنگى سيۋجەتتەرگە بولاشاق كورەرمەندەرگە جەرگىلىكتى وقۋلىقتاردان بەلگىلى تاريحي وقيعالار مەن رەسەي پرەزيدەنتى ۆلاديمير ءپۋتيننىڭ «قازاقتاردا بۇرىن مەملەكەتتىلىك تە، مەملەكەت تە بولماعان» دەگەن مالىمدەمەسىنەن كەيىن ەل بيلىگى قازاق حاندىعىنىڭ 550 جىلدىعى ناۋقانىن جاريالاعان سوڭ جارىق كورگەن كوپتەگەن ماقالا، كوركەم شىعارمالارداعى جايتتار ارقاۋ بولعان.

«قازاق ەلى» تەلەسەريالىنىڭ رەجيمسسەرى رۇستەم ابدىراشەۆ. الماتى وبلىسى، 4 قاراشا 2015 جىل.

قازىر سەريال بيزنەسمەندەر مەن جەكەلەگەن ادامداردىڭ ينۆەستيتسياسىنىڭ ارقاسىندا ءتۇسىرىلىپ جاتىر. قازاقستان نارىعىنا جۋىردا «كىرگەن» رەسەيلىك قارجى كومپانياسى العاشقىلاردىڭ ءبىرى بولىپ كومەكتەسكەن. تەلەسەريال اۆتورلارىنىڭ ايتۋىنشا، ول كومپانيا بىردەن 100 ميلليون تەڭگە بەرگەن. قازىر تەلەسەريالدى قوسىمشا قارجىلاندىرۋ ماسەلەسىن قازاقستان مادەنيەت جانە سپورت مينيسترلىگى دە قاراستىرىپ جاتىر.

سەريالعا اقشا جيناۋدى ۇيىمداستىرۋعا بىرەر اي بۇرىن قۇرىلعان قازاقستان كينوسىن قولداۋ قورى كومەكتەسىپ جاتىر. ونىڭ پرەزيدەنتى – «قازاق ەلى» سەريالىنىڭ رەجيسسەرى رۇستەم ابدىراشەۆ. كراۋدفاندينگ ءادىسى دە (حالىقتان جىلۋ جيناۋ) قولدانىلعان. كەز كەلگەن ادام شاماسى كەلگەن سومانى تەلەسەريال سايتى ارقىلى اۋدارىپ، جوباعا كومەكتەسە الادى. سايتتا قازىرگە دەيىن جينالعان اقشانىڭ كولەمى كورسەتىلگەن. وسى اپتانىڭ ورتاسىندا 200 مىڭ تەڭگەگە ءسال جەتپەيتىن سوما جينالعان. بۇل – شامامەن 666 دوللار.

كراۋدفاندينگ ءادىسىن قولدانار كەزدە «قازاق ەلى» اۆتورلارى حالىقتان اقشا جيناۋ كومەگىمەن 24 ميلليون 500 مىڭ رۋبل (قازىرگى ورتاشا باعاممەن ەسەپتەگەندە، شامامەن 547 مىڭ دوللار) جيناعانىن مالىمدەگەن رەسەيلىك «28 پانفيلوۆشى» ءفيلمى اۆتورلارىنان كەڭەس العان.

بلوگەر ءارى كينوسىنشى تولەگەن بايتۇكەنوۆ سەريال تۇسىرۋشىلەردىڭ «الەمدىك اۋقىمداعى» ساپالى ءونىم جاساۋ جايلى ۋادەلەرىنە كۇمانمەن قارايدى.

– جوبانىڭ اسىعىس جازىلىپ، بىرنەشە رەت قىسقارتىلعان ستسەناريىنە دەيىن قيسىنسىز تۇسى كوپ. كوپسەريالى جوبادا رەجيسسەر ءۇشىن ەڭ ماڭىزدىسى – ستسەناري. جاعدايدى بارلاعاندا «الەمدىك اۋقىم» تۋرالى ايتۋ ارتىق، – دەيدى ول.

سەريال شىعاتىن كۇن كەيىنگە قالدى

«قازاق ەلى» سەريالى تەلەەكرانعا 2015 جىلدىڭ جەلتوقسانىندا شىعادى دەپ جوسپارلانعان ەدى. بىراق دايىندىق جۇمىستارى سوزىلىپ كەتكەندىكتەن، سەريال شىعاتىن كۇن 2016 جىلدىڭ كوكتەمىنە اۋىستىرىلدى. «قازاق ەلى» سەريالىنىڭ رەجيسسەرى رۇستەم ابدىراشەۆ «ەكى-ءۇش جىل دايىندالعانىمىز ءجون ەدى» دەيدى.

«قازاق ەلى» تەلەسەريالىندا قازتۋعاننىڭ رولىندە ءانشى بەكبولات تىلەۋحان وينايدى. الماتى وبلىسى، 4 قاراشا 2015 جىل.

40 كۇن بۇرىن باستالعان ءتۇسىرىلىم پروتسەسى كەمى تاعى 50 شاقتى كۇنگە سوزىلاتىن سياقتى. سەريال الماتى مەن الماتى وبلىسىندا ءتۇسىرىلىپ جاتىر. قازىر ءتۇسىرىلىم توبى الماتى وبلىسى ۇيعىر اۋدانىنداعى شوشاناي اۋىلىنان بىرەر كيلومەتر جەردە جۇمىس ىستەپ جاتىر. بۇل جولى كوپشىلىك كورىنىستەردى تۇسىرۋگە 200-دەن اسا ادام، 150 جىلقى جانە 10 تۇيە پايدالانىلعان. سالت اتتىلار ساۋىت-سايمان كيىپ، قارۋ-جاراق اسىنعان. بىرنەشە جاۋىنگەر قولىنا قازاق رۋلارىنىڭ تاڭبالارى بەينەلەنگەن تۋلار ۇستاعان. جەتىسۋعا كوشىپ بارا جاتقان قازاقتاردىڭ كوشى جۇزدەگەن مەترگە سوزىلادى. كوشتەن تۇيە، اربا-كۇيمەگە جەگىلگەن ات، باقتاشى يتتەر قاۋمالاپ ءيىرىپ جۇرگەن بىرنەشە وتار قوي كورىنەدى. فيلمدە ەكى-ءۇش سەكۋندقا عانا سوزىلاتىن بۇل كادرلاردى تۇسىرۋگە تالاي ساعات كەتەدى ەكەن.

قوي مەن جىلقىنىڭ كوبىن جەرگىلىكتى تۇرعىنداردان جالعا العان. ءبىر وتار قويدى جالداۋعا كۇنىنە 70-100 مىڭ تەڭگە، ال ءبىر ات ءۇشىن 8-10 مىڭ تەڭگە تولەيدى. ءفيلمنىڭ باس كەيىپكەرلەرى مىنگەن سايگۇلىك اتتاردى كاسكادەرلەر توبى اكەلگەن. ءبىر قىزىعى، قورعانىس مينيسترلىگى ءتۇسىرىلىم توبىنا كومەككە سالت اتتىلار پولكىن ارنايى جىبەرگەن.

الەكسەي ازاروۆ

ازاتتىق راديوسى