باس تارتۋدىڭ تاريحى
kerey.kz
قازاق حالقى قۇرمەتتەگەن قوناعىنا قويدىڭ باسىن تارتادى. مۇنداي كادە تەك قازاقتا عانا بار. قىرعىزدار دا باس تارتادى، بىراق ولار ونى سىيلى قوناعىنا ەمەس، بالاعا بەرەدى. باس پەن جامباس سۇيەك ەش ۋاقىتتا اجىراتىلماعان، ەكەۋى بىرگە جۇرەدى. ويتكەنى باستىڭ ءوزىن اياقپەن جالعاپ كوتەرىپ تۇرعان ەڭ بۋىندى جالپاق جىلىك – جامباس. ەتى ءارى قوڭدى، ءارى جۇمساق. باستىڭ قۇيقاسىن كۇيدىرىپ الماي ءۇيىتىپ، قىلشىعىن قالدىرماي جۋىپ، جىگىن قۋالاي ايىرىپ، كەڭسىرىگىن سىلكىپ، كوزىنىڭ شەلىن اعىزىپ، ءتىسىن قاعىپ، بولەك قازانعا سۋىق سۋعا سالىپ اسادى. تۇزىن تاتىتىپ، قاندى كوبىگىن الىپ تاستاپ، بۇلكىلدەتە قايناتىپ، قۇيقاسىن سىلىپ الماي بىلبىراتىپ ءپىسىرۋ – اس ازىرلەۋشىدەن ەداۋىر شەبەرلىكتى تالاپ ەتەدى. جۇمساق بولىپ، ءارى تەزىرەك ءپىسۋ ءۇشىن سورپاعا ءبىر اس قاسىق سۋ ارالاسقان سىركە سۋىن نەمەسە ليمون شىرىنىن، ءتىپتى بولماسا ءبىر شاي قاسىق اس سوداسىن قوسىپ جىبەرۋگە بولادى. دۇرىس پىسكەن باستىڭ قۇيقاسىنىڭ شىرىنى قولعا جابىسپايدى. الدىنا باس كەلگەن ادام ونى جايدان-جاي جەي بەرمەيدى. قۇرمەتتەۋ بار دا، قۇرمەتكە لايىق بولۋ بار. باستى جونىمەن ءبولىپ، ۇلەستىرە ءبىلۋدىڭ ءوزى – ۇلكەن سىن. سىننان سۇرىنسە – كىسىلىگىڭە تاعىلعان ءمىن. دەمەك، باس ۇستاۋعا دا باس كەرەك. ءبىر ەسكەرتە كەتەتىن جاعداي، قانشاما جولى ۇلكەن بولسا دا، اكەسى بار كىسى، كۇيەۋى ءتىرى ايەل باس ۇستامايدى.
www.bmtv.kz
پىكىر قالدىرۋ