2016 جىلى 10 ناۋرىزدا استانادا «قازاقستان رەسپۋبليكاسى-ەۋروپالىق وداق» ىنتىماقتاستىق كوميتەتىنىڭ 15-ءشى وتىرىسى ءوتتى. قازاقستاندىق دەلەگاتسياعا - سىرتقى ىستەر ءمينيسترىنىڭ ورىنباسارى رومان ۆاسيلەنكو، ال ەۋروپالىق وداق دەلەگاتسياسىنا - ەۋروپا سىرتقى ءىس-قيمىلدار قىزمەتى ورتالىق ازيالىق باسقارمانىڭ باسشىسى تويۆو كلاار جەتەكشىلىك ەتتى. ءىس-شاراعا قازاقستاننىڭ بىرقاتار مەملەكەتتىك ورگاندارى مەن ۇيىمدارىنىڭ وكىلدەرى، سونىڭ ىشىندە ۇلتتىق ەكونوميكا، ينۆەستيتسيالار جانە دامۋ، قورعانىس جانە مەملەكەتتىك قىزمەت ىستەرى مينيسترلىكتەرىنىڭ، جوعارعى سوتتىڭ، باس پروكۋراتۋرا مەن ادام قۇقىقتارى جونىندەگى ۇلتتىق ورتالىقتىڭ وكىلدەرى قاتىستى.
ىنتىماقتاستىق كوميتەتىنىڭ وتىرىسىنا قاتىسۋشىلار ساۋدا، ءوزارا ينۆەستيتسيالار، ەنەرگەتيكا مەن كولىك سالاسىن دامىتۋ، قورشاعان ورتانى قورعاۋدى قامتاماسىز ەتۋ جانە وڭىرلىك ىنتىماقتاستىق سياقتى وزەكتى ماسەلەلەردى تالقىلادى. تاراپتار جاڭا قاتەرلەرگە قارسى بىرلەسكەن ءىس-قيمىلدى كۇشەيتۋ جانە ادام قۇقىعىن قورعاۋدى قامتاماسىز ەتۋ ماسەلەلەرىنە دە نازار اۋداردى. ەو-تىڭ ورتالىق ازيا بويىنشا جاڭارتىلعان ستراتەگياسىن ىسكە اسىرۋ جانە استانادا وتكەن جىلدىڭ جەلتوقسان ايىندا وتكەن ەو-وا كونفەرەنتسياسىنىڭ قورىتىندىلارى جەكە ماسەلە رەتىندە تالقىلاندى.
2015 جىلعى 21 جەلتوقساندا استانا قالاسىندا قول قويىلعان قر مەن ەو اراسىنداعى كەڭەيتىلگەن ارىپتەستىك پەن ىنتىماقتاستىق تۋرالى كەلىسىمدى (كاىك) ىسكە اسىرۋ پەرسپەكتيۆالارىن تالقىلاۋعا ەرەكشە نازار اۋدارىلدى.
«جاقىندا ديپلوماتيالىق كورپۋس وكىلدەرى الدىندا ءسوز سويلەگەن قازاقستان رەسپۋبليكاسىنىڭ پرەزيدەنتى نۇرسۇلتان ءابىشۇلى نازارباەۆ ءىرى ينۆەستيتسيالىق جانە ساۋدا ارىپتەسى ەو-مەن كەڭەيتىلگەن ارىپتەستىك پەن ىنتىماقتاستىق تۋرالى كەلىسىم –- تاۋار اينالىمىن ارتتىرۋعا جانە ەۋروپالىق ينۆەستيتسيانى تارتۋعا نەگىز بولاتىنىن اتاپ وتكەن ەدى. سوندىقتان دا، ءبىز بۇگىن كەلىسىمنىڭ ساۋدا-ەكونوميكالىق جانە باسقا دا سالالارداعى الەۋەتىن ىسكە اسىرۋ پەرسپەكتيۆاسىنا ەرەكشە ءمان بەردىك»، –- دەي كەلە ر. ۆاسيلەنكو كاىك-ءنىڭ كۇشىنە ەنۋى قازاقستان مەن ەو اراسىنداعى جاڭا كەلىسىم ءوزارا قاتىناستاردىڭ دامۋىن جاڭا دەڭگەيگە شىعاراتىنىن اتاپ ءوتتى.
وسى تاريحي قۇجاتتىڭ ىسكە اسىرۋى ەكى تاراپتىڭ ەكىجاقتى ارىپتەستىگىنىڭ جاڭا كەزەڭىن ايعاقتاپ، ءوزارا قىزىعۋشىلىق تۋدىراتىن بارلىق سالالاردا ىنتىماقتاستىقتىڭ جاڭا مۇمكىندىكتەرىن اشۋعا جانە ءوزارا ءىس-قيمىلدىڭ اۋقىمىن اناعۇرلىم كەڭەيتۋگە ىقپال ەتەتىنى اتالدى.
«ءبىز ەكونوميكا، ينۆەستيتسيا، ەنەرگەتيكا، قورشاعان ورتانى قورعاۋ، كولىك، جاڭا تەحنولوگيالار سالالارىنداعى ءوزارا ءىس-قيمىلدى نىعايتۋ سونداي-اق ەكى جاقتى ساۋدانى دامىتۋ نىعايتۋ جونىندە ۋاعدالاستىق. كۇن تارتىبىندەگى ەرەكشە تاقىرىپ قازاقستان ازاماتتارى ءۇشىن ەو ەلدەرىنە ۆيزالىق رەجيمدى جەڭىلدەتۋ كەلەشەگىن تالقىلاۋ، سوداي-اق قازاقستانعا نارىقتىق ەكونوميكاسى بار ەل مارتەبەسىن بەرۋ ماسەلەسىن تالقىلاۋعا ەرەكشە كوڭىل اۋدارىلدى»، –- دەدى سىرتقى ساياسات ۆەدومستۆو باسشىسىنىڭ ورىنباسارى.
«قر مەن ەو اراسىنداعى كەڭەيتىلگەن ارىپتەستىك پەن ىنتىماقتاستىق تۋرالى كەلىسىم ەۋروپالىق وداق پەن ورتالىق ازيا مەملەكەتى اراسىندا جاسالعان قازىرگى كەزەڭنىڭ جاڭا جانە ەرەكشەلىگىبويىنشا العاشقى قۇجات بولىپ تابىلادى»، – دەپ ايتتى تويۆو كلاار. كەلىسىمدە قامتىلاتىن ءوزارا ءىس-قيمىل باعىتتارىنا ەكونوميكا مەن قارجى، كولىك، ەنەرگەتيكا، قورشاعان ورتانى قورعاۋ، ءبىلىم بەرۋ مەن زەرتتەۋ، دەرەكتەردى قورعاۋ، كوشى-قون، زاڭ ۇستەمدىگى مەن سىبايلاس جەمقورلىققا قارسى كۇرەس، حالىقارالىق قاۋىپسىزدىككە جانە تۇراقتىلىققا جاردەمدەسۋ سالالارى كىردى.
ەسكەرتۋ: ەۋروپالىق وداق قازاقستاننىڭ ءىرى ساۋدا جانە ينۆەستيتسيا ارىپتەسى بولىپ تابىلادى. قازاقستاننىڭ سىرتقى ساۋدا اينالىمىنىڭ 51,4% ەو ۇلەسىنە تيەسىلى. قر مەن ەو اراسىنداعى ساۋدا اينالىمى 2015 جىلدىڭ قورىتىندىسى بويىنشا 31 ملرد. اقش دوللارىنان اسقان.
پىكىر قالدىرۋ