پرەزيدەنت جارلىعىمەن 2016 جىلعى 28 ناۋرىزدا ءتيىستى كوميسسيا قۇرىلىپ، قازاقستان رەسپۋبليكاسى تاۋەلسىزدىگىنىڭ 25 جىلدىعىن مەرەكەلەۋدىڭ «بىرلىك پەن جاسامپازدىقتىڭ 25 جىلى»  تۇجىرىمداماسى، مەملەكەتتىك كوميسسيا تۋرالى ەرەجە مەن ونىڭ قۇرامى بەكىتىلدى.

گ.ابدىقالىقوۆا ءوز سوزىندە مەملەكەت باسشىسىنىڭ: «تاۋەلسىزدىك جىلدارى رەسپۋبليكامىز تاريحي دامۋ تۇرعىسىنان عاجايىپ سەرپىلىس جاسادى. ءبىزدىڭ قازاقستان – ۇلى دالا ەلى، جاڭعىرعان ۇلى دالا ەلى! بۇل ءبىزدىڭ اسقاق اڭسارىمىز ءارى ەرەكشە ماقتانىشىمىز!» دەگەن سوزىنە توقتالىپ ءوتتى.

مەملەكەتتىك حاتشى تاۋەلسىزدىكتىڭ 25 جىلدىعىن مەرەكەلەۋ مەملەكەتتىلىكتىڭ ودان ءارى نىعايۋىنا، حالىقتىڭ بىرلىگى مەن بارلىق قازاقستاندىقتىڭ «ماڭگىلىك ەل» قۇندىلىقتارى اياسىندا توپتاسۋىنا مۇمكىندىك بەرەتىندىگىن ايتتى.

سونداي-اق ول تاۋەلسىزدىك مەرەيتويىن مەرەكەلەۋ بوستاندىق، بىرلىك، تۇراقتىلىق، جاسامپازدىق، وركەندەۋ سياقتى «ارقاۋلى قۇندىلىقتارعا» نەگىزدەلەتىنىنە ەرەكشە ءمان بەردى. ءاربىر اي تاۋەلسىزدىكتىڭ جەتىستىكتەرى مەن «ماڭگىلىك ەل» قۇندىلىقتارىنىڭ بىرىنە  ارنالاتىن بولادى.

وتىرىس بارىسىندا تاۋەلسىزدىكتىڭ 25 جىلدىعىنا ارنالعان ءىس-شارالاردى دايىنداۋ جانە وتكىزۋ جونىندەگى ءوزارا ءىس-قيمىل مەن مەملەكەتتىك ورگانداردىڭ، جۇرتشىلىقتىڭ جانە بۇقارالىق اقپارات قۇرالدارىنىڭ جۇمىسىن ۇيلەستىرۋدىڭ نەگىزگى ماسەلەلەرى تالقىلاندى.

وتىرىس اياسىندا مەملەكەتتىك كوميسسيا مۇشەلەرى مەن شاقىرىلعان قوناقتار تاۋەلسىزدىكتىڭ 25 جىلدىعىنا ارنالعان «تاۋەلسىزدىك تاريحى: قازاقستان جولىنىڭ قارىشتى قادامدارى» اتتى دەرەكتى فوتوكورمەنىڭ اشىلۋ راسىمىنە قاتىستى.

وتىرىستى قورىتىندىلاعان مەملەكەتتىك حاتشى جوسپارلانىپ وتىرعان ءىس-شارالاردى ساپالى ءارى ۋاقتىلى ىسكە اسىرۋ قاجەتتىگىن ايتىپ، جۇمىستى ءارى قاراي ۇيىمداستىرۋعا بايلانىستى بىرقاتار ناقتى تاپسىرما بەردى.