قر پرەزيدەنتى ن. نازارباەۆقا قر ءبىلىم جانە عىلىم ءمينيسترى ە. ساعاديەۆقا سەنات جانە ءماجىلىس دەپۋتاتتارىنا باق وكىلدەرىنە ءبىلىم جۇيەسى، قازاق ەلىنىڭ مەكتەپ جاسىنداعى ۇرپاعىنا كەزەكتى ەكسپەريمەنت جۇرگىزبەكشى. سوراقىسى وسى جولعىسى ءتىلىمىزدىڭ مۇلدە وشۋىنە (بۇل ۇلت ءوشۋىنىڭ العىشارتى ەكەنى ءسوزسىز) قويىلعان توتە جول. سەبەبى مەكتەپتەردە ەندى 2 ءپان عانا قازاقشا – قازاقستان تاريحى جانە قازاق ءتىلى، قالعان بارشا جاراتىلىستانۋ پاندەرى اعىلشىنشا وتپەك، ورىس ءتىلى جانە دۇنيە ءجۇزى تاريحى ورىسشا وتپەك. بۇل – ۇلتقا دەگەن قارۋسىز، اشتىقسىز، ت.ب. فيزيكالىق تۇرمەن ەمەس، بىراق ناقتىلى رۋحاني گەنوتسيد دەپ باعالاۋعا ابدەن بولاتىن جاھاندىق شارا. ويتكەنى بارشا ماماندار، وتە جۋىق بولاشاقتا (قازاق ءتىلى مەن قازاقستان تاريحى ماماندارىنان باسقالارى) اعىلشىن ءتىلدى بولماق. بارلىق عىلىمنىڭ العىشارتى جاراتىلىستانۋ پاندەرى ەكەنى بەلگىلى. بۇل قازاق ءتىلى عىلىمنان ىعىسادى، العاشقىدا قولدانۋ اياسى مۇلدە تارىلىپ، سوڭىنان تاريح قويناۋىنا كەتەدى دەگەن ءسوز. ويتكەنى قوعامداعى قاتىناس – سول قوعامدى قۇراپ وتىرعان مامانداردىڭ تىلىندە وتەتىنى انىق. وسى ورايدا، بۇنىڭ قر كونستيتۋتسياسىنا مۇلدەم قايشى ەكەنىن، جانە ەلباسىمىزدىڭ 2 جولداۋىن: (- 2012-جىلعى:: «قازاق ءتىلى 2025-جىلعا قاراي ءومىردىڭ بارلىق سالاسىندا ۇستەمدىك ەتىپ، كەز كەلگەن ورتادا كۇندەلىكتى قاتىناس تىلىنە اينالادى. وسىلايشا، تاۋەلسىزدىگىمىز بۇكىل ۇلتتى ۇيىستىراتىن ەڭ باستى قۇندىلىعىمىز – تۋعان ءتىلىمىزدىڭ مەرەيىن ۇستەم ەتە تۇسەدى. تىلگە دەگەن كوزقاراس شىنداپ كەلگەندە ەلگە دەگەن كوزقاراس ەكەنى داۋسىز. سوندىقتان وعان بەي-جاي قاراي المايمىز»، – 2014-جىلعى: «قازاق ءتىلى عىلىم مەن ءبىلىمنىڭ، ينتەرنەتتىڭ تىلىنە اينالدى. ەندى ەشكىم وزگەرتە المايتىن ءبىر اقيقات بار. انا ءتىلىمىز ماڭگىلىك ەلىمىزبەن بىرگە ماڭگىلىك ءتىل بولادى»), ەسكە سالا وتىرىپ، قر بارلىق مەكتەپتەردەگى باستاۋىش سىنىپتاردىڭ مەملەكەتتىك تىلدە بولۋىن، ورتا مەكتەپتىڭ 70 پايىزىنان كەم ەمەسى مەملەكەتتىك، قالعانى سۇرانىس تىلىندە بولۋىن تالاپ ەتەمىز. شەتەل تىلدەرى: اعىلشىن، نەمىس، ت.ب. تىلدەر ءپان رەتىندە، قاجەتتىلىك بويىنشا، گۋمانيتارلىق جانە جاراتىلىستانۋ باعىتتارى بويىنشا وقىتىلسىن. قازاق تىلىنە، ادەيى، ۇركىتۋ پيعىلمەن جاسالىپ وتىرعان قاستاندىق – حالىقارالىق تەرميندەردى قازاقىلاۋ دوعارىلسىن. ويتكەنى ءار دامىعان تولىققاندى ءومىر سۇرە الاتىن تىلدەر – ءجۇمىس ءتىلى، ياعني زاماناۋي تەحنيكا مەن تەحنولوگيالار ءتىلى، – بۇنداي تىلدەردىڭ بەلگىلى قۇرامى، بۇل كوپ بولۋى دا مۇمكىن، حالىقارالىق تەرميندەگى كىرمە سوزدەر. تەك وسى جولمەن جۇرسەك قانا، تاريحتا، ءوز ۇلتىن ءتىلى ارقىلى جويعان مەملەكەت رەتىندە قالمايتىنىمىزعا، كەرىسىنشە ۇلتىمىزدىڭ الدىنداعى پارىزىمىزدى ءار ازامات سەزىنىپ، دامىعان مەملەكەتتەردىڭ ورتاسىنان ورنىمىزدى ويىپ ورنىعاتىنىمىزعا سەنىمدىمىز. 1 بەيسەنباي تەگى ر.ز. پاۆلودار ق.، تەلەفون 8701-182-52-65