«مەن بۇرىن دا ايتقانمىن، تاعى دا ايتامىن، دەپۋتاتتىق ساۋالدى تەك قازاقشا جولدايمىن، كەرەك ادام اۋدارماشى ارقىلى (قۇلاققا سالاتىن ارنايى قۇرىلعىمەن) اۋدارىپ تىڭداي جاتار. بۇعان باس قاتىرعىم كەلمەيدى. مەن ءتىل ماسەلەسىن كوتەرۋدە جالعىز بولمايمىن دەپ ويلايمىن. باقىتبەك سماعۇل، نۇرتاي ءسابيليانوۆ، بەكبولات تىلەۋحان سەكىلدى كوپتەگەن ازاماتتار ءماجىلىس تورىندە ۇنەمى قازاق تىلىنە باسىمدىق بەرىپ ءجۇر عوي. بۇل تۇرعىدا مەنىڭ ايتارىم احمەت بايتۇرسىنوۆتىڭ «ءتىلى جوعالعان ەلدىڭ ءوزى جوعالادى» دەگەن سوزىمەن سارىنداس. قازاق حالقىن ۇيىتىپ، ىنتىماعىن ارتتىرىپ وتىرعان — قاسيەتتى انا ءتىلى! ونى سول ورتادا ءوسىپ، جەتە تۇسىنگەن مەن ايتپاعاندا كىم ايتادى؟»، — دەيدى جاس دەپۋتات.

سونىمەن بىرگە حالىق قالاۋلىسى سۇحباتقا شاقىرعان تەلەارنالارعا قويار باستى تالابى — مەملەكەتتىك ءتىل ەكەنىن دە باسا ايتتى.

«سۇحباتقا شاقىرعان تەلەارنالارعا قويار باستى تالابىم — مەملەكەتتىك ءتىل.

ساۋالعا سول تىلدە عانا جاۋاپ بەرۋگە دايىنمىن دەپ ەسكەرتەمىن. بۇل جەردە ءوزىمنىڭ انا ءتىلىم — ورىس ءتىلىن اياققا جىعىپ بەرىپ وتىرعام جوق، كەرىسىنشە، ورىستاردىڭ دا قازاقشا سويلەي الاتىنىن، سول تىلدە ويلانىپ-تولعانۋعا ولاردىڭ دا شاما-شارقىنىڭ جەتەتىنىن كورسەتۋ. وزگە قانداستارىما ۇلگى بولۋ. قازاقتىڭ ءتىلىنىڭ وركەندەۋىنە وزىمشە ۇلەس قوسۋ. قازاقتىڭ دالاسىندا تۋىپ، سول جەردى باسىپ جۇرگەننەن كەيىن، بارلىق ەتنوس وكىلدەرى مەملەكەتتىك ءتىلدى بىلۋگە مىندەتتى! «شىن جىلاسا سوقىر كوزدەن جاس شىعادى» دەگەن ءسوز بار قازاقتا. ءتىل ماسەلەسى، شىنداپ كەتسەك، ار-ۇياتتىڭ ولشەمى عوي! ءدال قازاقتاي مەيىربان، قوناقجاي، اقىلدى، مومىن حالىق جەر بەتىندە وتە از. ءوزىم سونى قاتتى سەزىنەمىن. جەتىمدىكتىڭ تاقسىرەتىن تارتقاندا ماڭدايىمنان سيپاعان قازاق ۇلتىنا قارىزدارمىن. سوندا قازاق ۇلتىنىڭ ءبىر قاجەتىنە جارايمىن دەپ انت ەتكەنمىن. قازىر سول ۇستانىمدى سەرىك ەتىپ كەلەمىن. ەلباسىنىڭ ءوزى حالىققا جولداۋىندا 2020 جىلعا قاراي بارشا قازاقستاندىقتار قازاق تىلىندە سويلەيتىن بولادى دەگەن وي ايتتى. وعان دا ساناۋلى جىل قالدى. سوندىقتان ءتىل ماسەلەسىندە تالاپتى كۇشەيتىپ، ەلباسىنا قولداۋ كورسەتۋدى ازاماتتىق پارىزىم دەپ ۇعىنامىن»، — دەپ قورىتىندىلادى گەننادي شيپوۆسكيح.

ايتا كەتەيىك، گەننادي شيپوۆسكيح قازاقستان حالقى اسسامبلەياسىنىڭ ءححىى سەسسياسىندا ەلباسى الدىندا مەملەكەتتىك تىلدە ءسوز سويلەپ، وزگە ەتنوس وكىلدەرىنە قازاق ءتىلىنىڭ قادىر-قاسيەتىن تانىتىپ، ونى قۇرمەتتەۋگە شاقىرىپ، ەلدىڭ ريزاشىلىعىنا بولەنگەن بولاتىن. قازاقتىڭ ءتىلىن ماقال-ماتەلمەن ورنەكتەپ، استارلاپ سويلەۋگە دەگەن شەبەرلىگى جاس دەپۋتاتتىڭ مەرەيىن وسىرگەندەي كورىنەدى.