ۆاتيكان تەرەزا انانى اۋليە دەپ جاريالاماق.
kerey.kz
قىركۇيەكتىڭ 4-ءى كۇنى ۆاتيكان تەرەزا انانى اۋليە دەپ جاريالاماق. تەگى ماكەدونيالىق كاتوليك تاقۋا بۇكىل ءومىرىن (1910 – 1997) الەمنىڭ ەڭ كەدەي ەلدەرىندە قايىرىمدىلىق قىلۋعا سارپ ەتتى. كەزىندە نوبەل سىيلىعى بەرىلگەن ءدىنداردىڭ ءوز باسى مەن قۇرعان ۇيىمىن سىناۋشىلار دا جەتەرلىك. “جۇرەكسىز بيۋروكراتيالىق مەكەمە”، “كەدەيلەر ءۇشىن اشقان پانالاۋ ورتالىقتارى مەن اسحانالارىندا تازالىق جوقتىڭ قاسى”، ء“دىني كوزقاراستارى فۋندامەنتاليزمگە بەيىم” دەگەن سياقتى پىكىرلەر ايتىلىپ جاتادى. البەتتە، كەز-كەلگەن پاسسيونار تۇلعانىڭ سوڭىنان ەرۋشىلەر كوپ بىلىق جاسايدى، سەنىمدى دوگماعا، عيباداتحانانى ينستيتۋتقا اينالدىرىپ جىبەرەدى. بىراق ماعان تەرەزا انانىڭ ءوز ءومىرى، يدەالدارى مەن پرينتسيپتەرى قىزىق. تومەندە ءوزىم وقىعان ‘Mother Teresa: Essential Writings’ توپتاماسىندا (قۇراستىرعان – Jean Maalouf) قاتتى ۇناتقان كەيبىر سوزدەرىن اعىلشىننان اۋدارىپ ءتىزىپ جازدىم.
1. ەلدىڭ بارىنە تەگىس جاقسىلىق جاساۋ مىندەتىم دەپ قارامايمىن. جەكە ادامعا جاقسىلىق قىلام. جاقسى كورۋدى ءبىر ادامنان باستايمىن. ءبىر ادامنىڭ قارنىن تويدىرۋعا تىرىسام. تەك ءبىر عانا ادام، سوسىن جانە بىرەۋى، سوسىن جانە بىرەۋى…
2. ەگەر كەدەي-كەپشىككە قۇدايدىڭ راقىمشىلىعىن كورسەتكىمىز كەلسە، ەڭ اۋەلى ءوزىمىز سول كەدەي-كەپشىكتىڭ بويىنداعى قۇدايدىڭ راقىمشىلىعىن كورە ءبىلۋىمىز كەرەك.
3. بارلىق زاماندا بارشا دىندەگى زەيىندىلەر مەن تاقۋالار قۇدايدى ءۇنسىز عانا ءشول دالا مەن ورمان-تاۋدا وڭاشالانۋ ارقىلى ىزدەگەن.
4. مەديتاتسياسىز، قۇلشىلىقسىز جانە رۋحاني ءومىرسىز ارەكەت قىلۋ – ءدىننىڭ ءسۋيتسيدى.
5. ءار زاتتان، ءار ادامنان، ءار تاراپتان ارقاشان قۇدايدىڭ ءجۇزىن ىزدە.
6. كەدەي ادامدار قايدا بولسىن بار، بىراق ناعىز تاقىر كەدەيلەر – ەشكىم جاقسى كورمەيتىن جاندار.
7. الىستاعى ادامدى ساعىنا جاقسى كورۋ وڭاي، ۇنەمى قاسىڭدا جۇرگەن جاندى باعالاپ جاقسى كورۋ قيىن. بەيتانىس مۇقتاج ادامعا جاردەم قىلا قويۋ وڭاي، ءوز ۇيىڭدەگى جاقىن جاندى جالعىزدىقتان قۇتقارۋ قيىن… ماحاببات ۇيدە باستالادى. تاۋلىگىنە 24 ساعات كورەتىن قاسىمىزداعى ادامداردى جاقسى كورە الماساق، اندا-ساندا ءبىر كورەتىندەردى قايتىپ جاقسى كورمەكپىز؟
8. بۇگىنگى الەمدەگى قايعى-قاسىرەتتىڭ ءبىر سەبەبى – پاك ءسابي، جاڭا تۋعان نارەستە، ءتىپتى ءالى تۋماعان ءپىنا كەرەكسىز بولىپ جاتادى. ءسابي – قۇدايدىڭ وتباسىنا، مەملەكەتكە، الەمگە تارتقان ۇلى سىيى.
9. قۇدىرەتى كۇشتى قۇدايدىڭ ءوزى ەگەر دە الدەكىم ونى قالاماي تۇرسا، ءوزىن وعان كۇشپەن مويىنداتا المايدى. يمان دەگەن – سيرەك تارتۋ.
Galym Bokashتىڭ facebook پاراقشاسىنان الىندى
پىكىر قالدىرۋ