مەملەكەت باسشىسى قازاقستان حالقىن تاۋەلسىزدىك مەرەيتويىمەن قۇتتىقتادى.

– تاۋەلسىزدىكتىڭ 25 جىلى – ءبىزدىڭ بۋىننىڭ ۋاقىت ولشەمىنە سىيمايتىن تەڭدەسسىز ەرلىگى. وسى مەرەيتويلىق جىلدا قازاقستاننىڭ بىرىككەن ۇلتتار ۇيىمى قاۋىپسىزدىك كەڭەسىنە سايلانۋىنىڭ سيمۆولدىق ءمانى بار. پارلامەنت قابىلداعان تاۋەلسىزدىكتىڭ 25 جىلدىعى دەكلاراتسياسى ءبىزدىڭ ۇلى جەتىستىكتەرىمىز بەن جەڭىسىمىزدى ايشىقتاعان ماڭىزدى ساياسي-قۇقىقتىق قۇجاتقا اينالدى، – دەدى قازاقستان پرەزيدەنتى.

نۇرسۇلتان نازارباەۆ تاۋەلسىزدىك كەزەڭىندەگى باستى جەتىستىكتەرگە توقتالىپ ءوتتى.

– جەتەكشى حالىقارالىق ساراپشىلاردىڭ پىكىرى بويىنشا، ەلىمىز الەمگە قازاقستاننىڭ «ەكونوميكالىق عاجايىبىنىڭ» جارقىن ۇلگىسىن كورسەتتى، – دەدى ەلباسى.

بۇدان بولەك، مەملەكەت باسشىسى قوعامنىڭ قارىشتاپ دامىعانىنا نازار اۋداردى.

– ءبىز بەيبىتشىلىك پەن كەلىسىمنىڭ بىرەگەي مودەلىن قالىپتاستىردىق. جالپى حالىقتىڭ قالاۋىمەن قۇرىلعان حالىق اسسامبلەياسى بارلىق ۇلتتى قاناتىنىڭ استىنا الىپ، باسىن بىرىكتىرە ءبىلدى. ەڭ باستىسى، كەز كەلگەن ادام «مەن – قازاقستاندىقپىن، بۇل – مەنىڭ ەلىم، مەن مۇندا باقىتىمدى تاپتىم!» دەپ ايتا الاتىن ادىلەتتى قوعامدى ورناتتىق، – دەدى قازاقستان پرەزيدەنتى.

نۇرسۇلتان نازارباەۆ قارقىندى دامىپ كەلە جاتقان مەگاپوليس، جاڭا ەلوردا – استانانىڭ قۇرىلۋىن باستى تابىستارىمىزدىڭ ءبىرى رەتىندە اتاپ ءوتتى.

ەلباسى ەكونوميكالىق جەتىستىكتەر ارقاسىندا حالىقتىڭ ءال-اۋقاتىنىڭ ناقتى ءوسىمىن قامتاماسىز ەتە العانىمىزدى ايتتى. مەملەكەت باسشىسى ۇكىمەتكە الەۋمەتتىك باعدارلامالاردى ىسكە اسىرۋ بارىسىندا 2017 جىلى زەينەتاقى مولشەرىن بيىلعى دەڭگەيدەن 20 پايىزعا، سونداي-اق بالا تۋعا بايلانىستى ءبىر جولعى مەملەكەتتىك جاردەماقى مولشەرىن دە 2017 جىلعى 1 شىلدەدەن باستاپ 20 پايىزعا ۇلعايتۋدى تاپسىردى.

قازاقستان پرەزيدەنتى ەلىمىزدىڭ حالىقارالىق ارەناداعى تابىستارىنا، سونىڭ ىشىندە ەۋرازيالىق ەكونوميكالىق ينتەگراتسيا سالاسىنداعى باستامالارىنا، جاھاندىق انتيادرولىق قوزعالىستاعى كوشباسشىلىعىمىزعا، بىتىمگەرشىلىك ماقسات جولىنا جۇمساعان كۇش-جىگەرىمىزگە ەرەكشە نازار اۋداردى.

– جاڭا ەلدىڭ ىرگەسىن قالاعان بۇگىنگى زامانداستاردىڭ ەرەن ەڭبەگى ۋاقىت وتە كەلە، ءتىپتى مىڭ جىلدان كەيىن دە ۇرپاقتارىمىزعا وتانىمىزدى ودان ءارى ىلگەرىلەتۋ جولىندا دەمەۋ بولىپ، سەپتىگىن تيگىزە بەرەدى، – دەدى مەملەكەت باسشىسى.

سوڭىندا نۇرسۇلتان نازارباەۆ بارشا قازاقستاندىقتاردى مەرەكەمەن تاعى دا قۇتتىقتاپ، حالقىمىزعا مول تابىس پەن زور جەتىستىكتەر تىلەدى.