Janaşır azamat Moldiyar Nwrbaev Mamaniya mektebin qayta jañaladı
kerey.kz
Elimizdiñ är aymağındağı auıldarda tozığı jetip qañırap qalğan nısandar jeterlik. Sodan ba kezinde tirşiliktiñ qız-qız qaynağan ordasına aynalğan ölkeler bwl künde swrqay tartıp, suıqtanıp bara jatır. Ärine, onı qayta tiriltu, öñi qaşqan ölkeniñ şırayın kirgizu – biz ben sizdiñ, el azamattarınıñ mindeti. «Elim mağan ne beredi emes, men elime ne beremin» degen wstanım, osı jolı da aldan şığadı. Memleket qamqorlığı jetpey jatqan şalğay auıldarğa sol jerden şıqqan, büginde käsibi men näsibi tasığan azamattar kömek qolın sozıp jatsa, bwl älbette, qwptarlıq is.
Elbası «Bolaşaqqa bağdar: ruhani jañğıru» bağdarlamasında «qazaq «Tuğan jerge tuıñdı tik» dep beker aytpağan. Patriotizm kindik qanıñ tamğan jeriñe, ösken auılıña, qalañ men öñiriñe, yağni tuğan jeriñe degen süyispenşilikten bastaladı. Sol sebepti, men «Tuğan jer» bağdarlamasın qolğa aludı wsınamın» degen edi. Elbasınıñ osınau wsınısın tu etken käsipker Moldiyar Nwrbaev Aqsu audanı Aqsu auılındağı 55 jıldan beri jöndeu körmegen mektepti kürdeli jöndeuden ötkizip berdi. Äri qaray mektep janınan sport keşenin salu da josparında bar. Oquşılar da biıl jaña oqu jılın azıp-tozğan eski ğimaratta emes, eñsesi biik jaña mektepte qarsı alıp jadırap qaldı. – Osı jerde tuıp-östim. Ata-babalarım da osında jerlengen. Özim osı mektepte oqıp, 1967 jılı bitirip şıqtım. Bizdiñ kezde mıñğa juıq bala oqitın. Keyin uaqıt öte kele auıldan adamdar köşip, jağday tipti müşkildengen. Birde audan äkimimen söylesip qalıp, mektep jağdayınıñ naşar ekenin estidim. Sodan oylana kele tuğan auılıma, özimiz oqığan mektepke az da bolsa kömek bereyik degen baylamğa keldik. Eñ birinşi balalarğa jağday jasaluı kerek. Olarğa kömektesu, solardıñ keleşegi üşin qızmet etu – bizdiñ azamattıq mindet. Joldıñ naşarlığına qaramay, qwrılıs materialdarın Almatıdan tasıdıq. Jalpı alğanda, mekteptiñ qasbeti tolıq özgerip, şatırı, edeni, terezeleri, jılu qwbırları tügeldey jañartıldı. Mwnda şükir, auızsu bar. Biraq auızsu mäselesi qiındau eken. Sonı da rettestirip, su tarttıq. Atqarılatın şarua äli de köp, – deydi Moldiyar Qılşıqwlı. 
Käsipker mektepke arnap jaña kölik te satıp alıp beripti. Odan bölek oquşılarğa on komp'yuter, interaktivti taqta, türli oqu qwraldarı da sıyğa tartılğan. Mwnday sıy-siyapattan wstazdar da kende qalğan joq. Olarğa da birneşe noutbuk berilip, äkimşilik kabinetteri zamanğa say jasaqtaldı. – Tört balam da osı Mamaniya mektebinde oqidı. Ülken eki balam oquşı bolsa, kişileri balabaqşağa barıp jür. Mektep suıq bolğandıqtan balalardıñ densaulığın oylap sabaqqa jii jibermey qalatınbız. Men ğana emes, köbi solay isteytin. Sabaqqa bara qalsa, kiimderin şeşpey, baskiimderin kiip otıratın. Jañbır jausa, töbeden su ağa ma dep qorqatın edik. Qazir sonıñ bärinen ada boldıq. Ağamız mektepti tolıqtay jañalap, balalardıñ eş alañsız bilim aluına jağday jasap otır. Alğısımız zor, – deydi ata-ana Aray Serikqızı. 
Audan basşılığınıñ aytuınşa, tuğan jerine kelip däl mwnday jaqsılıq jasau – ülken märttik, dara degdarlıqtıñ körinisi. Jerlesteriniñ jaqsılığına riza bolğan auıldıqtar öz kezeginde Moldiyar Nwrbaevtıñ keudesine arnayı tösbelgi tağıp, alğısın jetkizdi. Mamaniya mektebin Jetisudiñ ataqtı bayı Mamannıñ balaları Twrısbek, Seyitbattal jäne Esenqwl qajılar XX ğasırdıñ basında saldırğan. Onıñ arhitekturası men oqu jüyesi Ufadağı «Ğaliya medresesine» wqsatılğan eken. Alaş qayratkeri, aqın İliyas Jansügirov te – osı Mamaniya mektebiniñ tülegi. 1940 jıldardıñ bas kezinen mektepke Ibıray Altınsarin esimi berildi. – Moldiyar ağamız mektepke jaña kölik sıyladı. Bau-baqşa jayqalsın dep su tartqızıp berdi. Kelesi jılı sport keşenin aşsam dep josparlap otır. Osınıñ bäri, ärine, igilikti şarua. Kömek qolın sozğan azamattardıñ arqasında jaña oqu jılına 100 payız dayın boldıq, – dedi mektep direktorı Alpamıs Qazbanbetov. Käsipkerdiñ özi «auıl körkeyse, el-jwrt qayta oralar, suı-nuı jayqalğan bayağı däureni qayta keler» dep ümit etedi. Bir aydan soñ öziniñ tikeley bastamasımen Aqsu audanında äygili aqın İliyas Jansügirovtiñ eskertkişi boy kötermek. Audan äkimdiginiñ deregine süyensek, qazir audandağı 41 mekteptiñ 11-i äbden eskirgen. Bir sözben aytqanda, däl osınday jomart jandardıñ kömegine mwqtaj degen söz. Al demeuşi qolın tilep twrğan oqu ordaları elimiz boyınşa qanşama deseñizşi?! «Tuğan jerge tuıñdı tik» wstanımın serik etken azamattar öz auıldarına kömektesse, elimiz jayqalıp-aq keter edi. Al Mamaniya mektebiniñ oquşıları men wstazdarı jaña oqu jılına tıñ serpinmen kiriseri sözsiz.
Kerey.kz
Pikir qaldıru