Teñizdi Äuezovtey surettegen qazaq jazuşısı joq.
kerey.kz
Mwhtar Mağauin atamızben soñğı ret jolıqqanda Mwhtar Äuezovtiñ “Indiya oçerkterin” oqıp otır eken. “Nege” dep swrap ülgergem joq, özi birden ayttı. “Bwrındarı birneşe ret oqığan närse edi. Teñizdi Äuezovtey surettegen qazaq jazuşısı joq. Jalpı mwhit pen teñiz degen qazaqqa sonşalıqtı tanıs dünie emes qoy. Äuezov mına jazbasında Ündi mwhitınıñ ädemi peyzajdarın jasağan. Sol twsın qaytara oqıp otırmın” dedi. Üyge kele sala bayağıda bir bukinisten satıp alğan 1958 jılı basılğan älgi kitaptı tauıp alıp köz jügirtip em, mınaday ğajap suretterdiñ üstinen tüstim:
“Teñiz suı kün barda jasıl-kökşil jaqsı bir köñildi reñdi bolatın. Tolqın köz tartatın. Teñizdiñ wlı tolqındarı wzın jal bop, kezektep jaqınday beretin. Baysaldı auır salmaqpen jağağa, tas jağağa oqtın-oqtın kürs-kürs berip wrılıp jatır. Teñiz suınıñ dämin tatıp körip em, twzdıq degen az söz, odan äldeqayda aşı. Özi glauber twzı dese bolğanday…” (79-bet)
“…Osı küydi oylay otıra keşki teñiz körinisine köz, köñil qadaumen bolıp ek. Kün bata bere teñizdiñ tüsi de erterek jäne tezirek suıy berdi. Kündiz jasıl-kökşil köringen su endi aspan rayı swrlanuımen qatar bozğılt-sarğış tartqanday. Al alıstağı “wşan-teñiz” deytin qıyırsız, şeksiz şalqığan öri qorğasın reñdenip, auırlay swrlandı. Anıq qorğasın teñiz betindey. Jaqınnan jıraqqa deyin tek är twstan tuğan älsin-älsin aq köbikter juğan salmaqtı tolqın köpirşip barıp bwrq-bwrq ete qaladı. Endi añğarsaq tün tastay qarañğı tartıptı. Anda-sanda jıraqta nayzağay jarqıldaydı. Teñizdiñ tüsi tünde de qızıq özgerdi. Ol köbinşe qorğasın tärizdense, keyde qalayı, keyde kümis atıp qalğanday da boladı. Alıstan jaqın jağağa qaray jedel kele jatqan tolqındardıñ aqşıl jalınday köbikteri, keyde äldeqalay ot jarığı jalt etkendey jarqırağan kümistey reñder, ajarlar atıp qaladı. Sıyqırlı suıq tolqındı suıq mwhit jürekke ıstıq sezimder tolqının wradı. Swlulıq köksegen sezimder tolqını…” (81-bet).
Ğalım Boqaştıñ facebook paraqşasınan alındı
Pikir qaldıru