تەڭىزدى اۋەزوۆتەي سۋرەتتەگەن قازاق جازۋشىسى جوق.
kerey.kz
مۇحتار ماعاۋين اتامىزبەن سوڭعى رەت جولىققاندا مۇحتار اۋەزوۆتىڭ “ينديا وچەركتەرىن” وقىپ وتىر ەكەن. “نەگە” دەپ سۇراپ ۇلگەرگەم جوق، ءوزى بىردەن ايتتى. “بۇرىندارى بىرنەشە رەت وقىعان نارسە ەدى. تەڭىزدى اۋەزوۆتەي سۋرەتتەگەن قازاق جازۋشىسى جوق. جالپى مۇحيت پەن تەڭىز دەگەن قازاققا سونشالىقتى تانىس دۇنيە ەمەس قوي. اۋەزوۆ مىنا جازباسىندا ءۇندى مۇحيتىنىڭ ادەمى پەيزاجدارىن جاساعان. سول تۇسىن قايتارا وقىپ وتىرمىن” دەدى. ۇيگە كەلە سالا باياعىدا ءبىر بۋكينيستەن ساتىپ العان 1958 جىلى باسىلعان الگى كىتاپتى تاۋىپ الىپ كوز جۇگىرتىپ ەم، مىناداي عاجاپ سۋرەتتەردىڭ ۇستىنەن ءتۇستىم:
“تەڭىز سۋى كۇن باردا جاسىل-كوكشىل جاقسى ءبىر كوڭىلدى رەڭدى بولاتىن. تولقىن كوز تارتاتىن. تەڭىزدىڭ ۇلى تولقىندارى ۇزىن جال بوپ، كەزەكتەپ جاقىنداي بەرەتىن. بايسالدى اۋىر سالماقپەن جاعاعا، تاس جاعاعا وقتىن-وقتىن كۇرس-كۇرس بەرىپ ۇرىلىپ جاتىر. تەڭىز سۋىنىڭ ءدامىن تاتىپ كورىپ ەم، تۇزدىق دەگەن از ءسوز، ودان الدەقايدا اششى. ءوزى گلاۋبەر تۇزى دەسە بولعانداي…” (79-بەت)
“…وسى كۇيدى ويلاي وتىرا كەشكى تەڭىز كورىنىسىنە كوز، كوڭىل قاداۋمەن بولىپ ەك. كۇن باتا بەرە تەڭىزدىڭ ءتۇسى دە ەرتەرەك جانە تەزىرەك سۋىي بەردى. كۇندىز جاسىل-كوكشىل كورىنگەن سۋ ەندى اسپان رايى سۇرلانۋىمەن قاتار بوزعىلت-سارعىش تارتقانداي. ال الىستاعى “ۇشان-تەڭىز” دەيتىن قىيىرسىز، شەكسىز شالقىعان ءورى قورعاسىن رەڭدەنىپ، اۋىرلاي سۇرلاندى. انىق قورعاسىن تەڭىز بەتىندەي. جاقىننان جىراققا دەيىن تەك ءار تۇستان تۋعان ءالسىن-ءالسىن اق كوبىكتەر جۋعان سالماقتى تولقىن كوپىرشىپ بارىپ بۇرق-بۇرق ەتە قالادى. ەندى اڭعارساق ءتۇن تاستاي قاراڭعى تارتىپتى. اندا-ساندا جىراقتا نايزاعاي جارقىلدايدى. تەڭىزدىڭ ءتۇسى تۇندە دە قىزىق وزگەردى. ول كوبىنشە قورعاسىن تارىزدەنسە، كەيدە قالايى، كەيدە كۇمىس اتىپ قالعانداي دا بولادى. الىستان جاقىن جاعاعا قاراي جەدەل كەلە جاتقان تولقىنداردىڭ اقشىل جالىنداي كوبىكتەرى، كەيدە الدەقالاي وت جارىعى جالت ەتكەندەي جارقىراعان كۇمىستەي رەڭدەر، اجارلار اتىپ قالادى. سىيقىرلى سۋىق تولقىندى سۋىق مۇحيت جۇرەككە ىستىق سەزىمدەر تولقىنىن ۇرادى. سۇلۋلىق كوكسەگەن سەزىمدەر تولقىنى…” (81-بەت).
عالىم بوقاشتىڭ facebook پاراقشاسىنان الىندى
پىكىر قالدىرۋ