HAN KENENİÑ QOŞTASUI
kerey.kz
Äy, qırğızdar, qırğızdar,
Jinalıp bäriñ twrsıñdar,
«Noqtalı basqa bir ölim»,
Qazaqtıñ hanın jeñdik dep,
Ölgenimdi estirtip,
Alatau şığıp ırlañdar,
«Bolsadağı bas kespek,
Til kespek joq» dep azıraq,
Qoştasayın el jwrtpen,
Dauısımdı Qwday jetkizer,
Wşqan qws, aqşa bwltpenen.
Qoş bolıñdar kieli,
Sayalı baq tau tasım,
Özim jürgen jerlerim.
Men ölgen soñ toy toylap,
Manaptarıñ masayrar.
Jantay menen Ormanbet,
Sarnatar qobız, sırnayın,
Bastı kesip alsañdar.
Keudemde qalar qıl moyın,
Gorşakov talap etkendey,
Qiqalanbasın süyegi,
Orındalsın tilegi.
Öz qılışımmen şapqaysıñ,
Şıdasa eger qaymıqpay,
Jan alğıştıñ jüregi.
Qandarıñ köp tögildi,
Qızdarıñ öksip bwrımdı.
Soğıstıñ atı soğıs qoy,
Säbi de öldi twlımdı.
Azattıqqa şaqırğan,
Estimediñder ünimdi.
El bolsın dep kelip em,
Qazaq qırğız birigip.
Qarsı şığıp jau boldıñ,
Aq patşağa tığılıp.
Mwsılmandıqtan bezinip,
Mıltığınıñ dausınan,
Ayağına jığılıp.
Qayta aynalıp qan sasıp,
Körisersiñder qazaqpen,
Bügin adasıp ketkenmen,
Orıstan körgen zorlıqtan,
Bastarıña tüsken azappen.
Qazaqtıñ jauı qazaqta,
Sıpatay bastap qaşqan top.
Basın alar Ağıbay,
Mına jarıq düniede,
Satqındarğa orın joq.
Qoş bolıñdar, qazaqtar,
El ediñder qaharlı,
Bastarıñdı qosa almay,
İşimde ketti qan qatıp.
Tisteude ketti barmağım,
Orındalmay armanım.
Sıpataydıñ qılğanı,
Wmıtılmas kek boldı.
Batırlarımnıñ basına,
Ajal tönip, bwlt qondı.
«Men sendikpin, han iem,»
Degenine ilanıp,
Senip qaldım qayteyin.
Kuäge tartıp Bayzaqtı,
Bas igenin qimadım.
Üysindegi bauırlas,
Bölem edi, sıylasım.
Nısanbayday jıraudıñ,
Jazığı joq qırğızğa,
Ölerdegi tilegim,
Bosatıñdar ekeuin,
Menen qaytsın kekteriñ.
Hannıñ basın alsañdar,
Maqsattarıña jetkeniñ.
Ağıbay tüsse esime,
Sarıarqa kirer tüsime.
Jauınıñ apay tösine,
Nayzasın qarıs qadağan.
Ağıbayday er qayda?
Sarı qımız işkizip,
Mıñdap jılqı örgizgen,
Sarıarqaday jer qayda?
Közime ıstıq jas keler,
Sarı belder tüsse oyğa.
Qorğay almay men seni,
Twtqın bop tüstim qırğızğa.
Ajaldan äste qaşpaymın,
Ölemin dep saspaymın.
Mağan da keldi bir näubet,
Talaydıñ aldım bastarın,
Köziniñ tögip jastarın.
Külip qarsı alar ölimdi,
Tük basqan meniñ jüregim
Basım şarlap ketse de,
Peterbor, Ombı jerlerin.
Denem qalar qara jer,
Qoyınında kömilip.
It jese de rizamın,
Süyegimdi kemirip.
Jeti qaznanıñ biri ğoy,
Joldas bolğan ömirlik.
Ruhım jeter elime,
Sarıarqa, Kökşe törine.
Aman bolsa wrpağım,
Tartpay qoymas tegine.
Azttıq üşin alısıp,
Jetpey qoymas sertine.
Qol bastar wl tabılar,
Dünie jinap bas wrmas,
Altın menen kümiske.
Qoş bol, meniñ, Sarıarqam,
Küres jolın bastağan.
Abılaylap wran sap,
Elin, jerin qorğağan.
Qol bastatıp Bögenbayğa,
Dañq pen erlik jaylağan.
Jalğastıra almay isiñdi,
Igere almay küşimdi,
Öz kinämdi tüsinip,
Ölimge bastı bayladım,
Aq adal isim mort ketip,
Süyegim qaldı dalada.
Tilin şaynap jür edi,
Satqındıq jasap wstattı,
Sıpatayday jieniñ.
Jabılıp qırğız qarğaday,
Arqamnan taspa tilersiñ,
Oyıña kelgendi istersiñ.
Qoş bol, jazira tuğan jer,
Kök oray şalğın jasıl bel.
Orındalmağan armanım,
Amanat bolsın senderge.
Qoştaspaymın armanmen,
Sender teñdikke jetkenşe
Ruhım meniñ oyatar,
Qara jer-besik, terbetse.
Sendermen birge jüregim,
Azattıq üşin alısıp,
Batırlıq bolsın tiregiñ.
Qoş bolıñdar, qazağım,
Han köterip Abılaylap,
Qiyağa meni salıp eñ,
Qayırıldı qanatım,
Şıqsamdağı wrandap.
Meniñ arman mwñımdı,
Jetkizer jırau Nısanbay.
Swrap aldım bas tigip,
Bayzaq datqa ekeuin.
Jekpe jekte ölmedim,
Almas qılış mayırlıp,
Alısıp jürip ölmedim,
Qiqalanıp şabılıp.
Nısanbay, Bayzaq serigim,
Qoş, esen sau bolıñdar,
Jolıñdı Alla oñğarsın,
Elge sälem ayta bar,
Täptiştep jırlap berersiñ,
Hanıñnıñ qalay ölgenin.
Namazın oqıp besinniñ,
Taqtağa bastı qoyayın,
Batırmay künin jwmanıñ,
Qırğızdar şıqsın qwmardan.
Aq patşadan alatın,
Alsın 3000 sıylığın.
Renişsiz kütip alayın,
Qwdaydıñ jazğan bwyrığın.
En jaylatsam dep edim,
Qazaq penen qırğızğa,
Alatau, Istıq kölderdi.
Edil menen Jayıqtıñ,
Altay, Ertis, Şu boyı,
Arasındağı jerlerdi.
Türkistan bolıp bas qalañ,
Saltanattı sarayğa,
Ornatıp hannıñ ordasın.
Baqıtın tapqan mäñgilik,
Qazaq qırğız qosılğan,
Handıq bolsın dep edim.
Qayta oralıp Nauanım,
Ağıbay tilin almadı-au.
Nauan sırtta jürgende,
Tiise almas edi mağan jau.
Bwğıbay, Iman, Jolaman,
Janaydar, Jäuke, Tolıbay,
Bwqarbay, Dulat, Naurızbay,
Bwyırmas jerden bwyırdı,
Topırağı qırğızdıñ.
Amal bar ma, Qwdayğa,
Ağıp tüsti jwldızıñ.
Tausılğan jeri osı eken,
Qırıq bes jasta däm twzım.
Qosa almay kettim qayteyin,
Üş jüzdiñ basın ardaqtap,
Şapağatı şalqar, meyirli,
Aman bolsın, qazağım,
Tüzeler äli-aq zamanıñ.
Ämin, Allahu äkbar!
HAN KENE
Jolımbet Mäkiştiñ facebook paraqşasınan alındı
Pikir qaldıru