Teñgeni qwldıratqandar kimder?
kerey.kz
KEŞE QAZAQSTANNIÑ BANKTERI MEN AYIRBASTAU PUNKTERINDEGI DOLLARDIÑ TEÑGEGE ŞAQQANDAĞI BAĞAMI 300 TEÑGEDEN ASIP TÜSTI.
Qazaqstan qor birjasındağı tañerteñgilik sessiya nätijesinde dollar seysenbi künmen salıstırğanda tağı köterilip, 283,98 teñgege jetti. KASE-degi valyutalıq saudağa narıqtıñ 23 oyınşısı qatıstı. Al valyutalıq sauda kölemi bar-joğı 89 250 dollardı qwradı.
Soğan qaramastan, keybir bankterdegi dollardı satıp alu bağamı kündiz 300 teñgeden asıp tüsti. Bank centrkredit dollardı 301 teñgege satsa, Qazkommercbank bir dollardıñ qwnın 299,62 teñge şamasında belgilepti. Tüsten keyin bankter men ayırbastau punkterindegi dollar bağamı säl arzandadı. Tüski sağat üş şamasında Bank centrkredit dollardı 290 teñgege satıp, 288 teñgege satıp alıp jattı. Qazkommercbank bwl uaqıtta bir dollardı 285,56 teñgege satıp, satıp alu bağamın 282,11 teñge şamasında belgilepti. Basqa bankterde de osı şamalas ayırbastau bağamı ornatılğanımen, bwl meje sağat sayın özgerip otırdı.
Seysenbi küni Qazaqstan qor birjasındağı tañerteñgilik valyuta saudasınıñ kölemi 71 350 dollar köleminde ğana boldı. Sonıñ özinde dollardıñ teñgege şaqqandağı kölemi 3,28 teñgege qımbattap, bir dollardıñ qwnı 276,83 teñgege jetti. Al keşki sessiyada bir dollar 282,10 teñgege juıqtadı.
Bolmaşı ğana kölemde valyutalıq sauda jürgizip, teñgeni qwldıratıp otırğan qanday oyınşılar? Ekonomist Oljas Qwdaybergenov aqparat qwraldarına bergen swhbatında Wlttıq bankke KASE-de jürgizilip jatqan mämilelerdi jariya etudi wsınıptı. Rasında da, aynaldırğan jiırmağa jeter-jetpes oyınşı qatısatın valyutalıq saudada teñge kündelikti qımbattap otır. Halıq dollardı şarıqtatıp otırğan qor birjasınıñ qanday qatısuşıları ekenin bilui tiis. Bwl oyınşılar teñge bağamın qoldan tüsirip otırğan boluı mümkin. Äytpegende, bir künniñ işinde teñge qalayşa 11 teñgege arzandadı?
Qwdaybergenovtiñ bwl wsınısına Wlttıq bank äzirge jauap qatqan joq. Al bwğan qatıstı tüsindirme beruden bas tartqan Qarjı ministri Baqıt Swltanov dollar bağamı 300 teñgege jetse de, qazaqstandıqtardıñ ömir sürui bwdan özgermeytinin aytıptı. “Öytkeni jalaqı, satıp alu qabileti ekonomikadağı eñbek öndirisine baylanıstı boluı kerek”.
Ministr soñğı birneşe jıldıñ işinde jalaqını eki märte kötergenin auızğa alıp, “jalaqınıñ köterilui dollarğa emes, eñbek öndirisine baylanıstı boluı tiis. Azamattar teñgemen eseptesedi, importtıñ kölemi ülken ekeni tüsinikti. Biraq käsiporındarımızdıñ bäsekege qabilettiligi boyınşa jürgizilip jatqan jwmıstar nätijesin berui tiis”, – depti.
Qazaqstandıqtardıñ bükil swranısın ötey alatın otandıq öndiruşiler joq bolğandıqtan, sırttan tauar satıp alatındıqtan, dollardıñ şarıqtauı halıq twrmısına äser etpey qoymaytını anıq. Mwnı ministri de, basqası da jaqsı biledi. Äzirge teñge qwldırauınıñ şeti de, şegi de körinbeydi. Bir dollar üşin psihologiyalıq meje – 300 teñgemen ayaqtalmauı mümkin.
zhasalash.kz
Pikir qaldıru