Jeltoqsannıñ 19-ı küni Ankaradağı Qazirgi zaman öner ortalığında “Türikter körgen Resey” attı fotokörmeni aşuğa barğan Reseydiñ Türkiyadağı elşisi Andrey Karlov qastandıqtan qaza boldı. Elşini tapanşamen atıp öltirgen adam policiyamen atıs kezinde oqqa wştı dep habarlandı. Türkiya biligi şabuıl jasauşınıñ “Ankara policeyi Mevlyut Mert Altintaş” ekenin mälimdedi. Jergilikti BAQ taratqan videolarda qara tüsti kostyum-şalbar men aq köylek kiip, qara galstuk taqqan qastandıq jasauşı er adam “Allahu äkbar!” dep ayğaylap, “Siriya men Aleppodağı jağday üşin kek alğanın” aytadı. Öner galereyasında jasalğan şabuıl kezinde birneşe adam jaralanğan. Bir kün bwrın Türkiyada Reseydiñ Siriya prezidenti Başar Asadtı qoldağanın ayıptağan qoğamdıq narazılıq akciyası ötken edi.

Resey sırtqı ister ministrligi äueli Andrey Karlovtıñ şwğıl türde auruhanağa jetkizilgenin rastap, keyin diplomattıñ mert bolğanı turalı resmi mälimet jariyaladı.

Öner ortalığındağı is-şarağa barğan Qırğızstannıñ Türkiyadağı elşisi Ibragim Junusov qastandıq äreketiniñ kuäsi bolğan. Azattıqqa bergen swhbatında Junusov: ” Men, Özbekstannıñ elşisi men [Andrey] Karlov üşeumiz birge äñgimelesip twrğanbız. Oğan (Karlovqa – red.) söz berildi, biz minberdiñ qasında twrdıq. Qasında bir jigit ärli-beri jürdi. Küzetşi dep oylağam. Karlovqa söz berilgen soñ eki minut ötpey jatıp, ata bastadı. Oq atqan adam: “Allahu Äkbar!” dep ayqayladı da, bärimizge “Jerge jatıñdar!” dep bwyırdı. Adamdar qaşa bastadı. Qayta atıs bastaldı. Oğı tausılğanın bayqap, ketuge ıñğaylandım. [Birazımız] köşege şığıp ülgerdik, işte qalğandardı ol jibermey twrdı” dedi.

Junusovtıñ sözinşe, mädeni is-şarağa jüz şaqtı adam jinalğan.

Qastandıqtan soñ ile-şala Türkiya prezidentiniñ äkimşiligi “Tayıp Erdoğan Resey prezidenti Vladimir Putinmen telefon arqılı söylesti” dep mälimdedi.

Türkiya prezidenti Tayıp Erdoğan men Resey prezidenti Vladimir Putin. Stambul, 10 qazan 2016 jıl

Diplomattıñ denesi jetkizilgen auruhana aldında jurnalisterge swhbat bergen Ankaranıñ meri Melih Gokçek “qastandıq jasauşınıñ Türkiya men Reseydiñ qarım-qatınasın bwzudı közdegenin” ayttı.

Elşi Andrey Karlovqa jasalğan qatıgez qastandıqtı AQŞ, Wlıbritaniya, Germaniya men Franciya bastağan Batıs elderi jappay ayıptap şıqtı.

Resey men Türkiya – Siriyadağı azamattıq soğısqa aralasqan elder. Bes jarım jıldan astam uaqıtqa sozılğan soğıs kezinde Resey Siriyanıñ avtokrat prezidenti Başar Asadtı qoldap, bıltır oppoziciyalıq köterilisşilerge qarsı äsker kirgizdi. Türkitildes az sandı etnostardıñ qauipsizdigin saqtau degen jeleumen Türkiya da Siriyağa äsker kirgizip, şekaranıñ eki betindegi kürd jasaqtarına qarsı operaciya jürgizip jatır. Elden eki million siriyalıq bosıp ketti. Olardıñ bir böligi Batıs Europağa jetuge tırısqanımen köpşiligi Türkiyadağı bosqındar lagerin panalap jatır.

Bıltır Siriyadağı reseylik wşaqtı türkiyalıq äsker “şekara bwzdı” degen ayıppen atıp tüsirgen soñ Mäskeu men Stambuldıñ arası kürt suığan. Resey birqatar Türkiya tauarların importtauğa tıyım salğan bolatın.

Biılğı mausımda Tayıp Erdoğan wşaqtı atıp tüsiruge baylanıstı “ökiniş bildirip”, Putinge hat jazğan. Şildeniñ 15-inde Türkiyada “bolmay qalğan äskeri töñkeristen” soñ 230 adam qaza tauıp, bilik Erdoğannıñ qarsılastarın jappay qudalay bastağan. Bwl äreketti Batıs elderi sınap şıqqan. Soñğı jıldarı Türkiyanıñ ekonomikalıq damuı da bayaulap qaldı. Bwdan soñ Ankara “äskeri töñkeristi jasauşılar men wşaqtı atıp tüsiruşiler Türkiya men Reseydiñ qarım-qatınasın ädeyi naşarlatpaq boldı” dep mälimdegen.

Tamızdıñ 9-ında Sankt-Peterburgte kezdesken Resey prezidenti Vladimir Putin men Türkiya prezidenti Tayıp Erdoğan “wşaq dauına” baylanıstı jeti ayğa sozılğan diplomatiyalıq teke-tiresten soñ qaytadan qarım-qatınastarın jaqsartu turalı uağdalasqan. Sodan beri Ankara men Mäskeudiñ arası salıstırmalı türde jaqsarıp, eki tarap tek Siriya prezidenti Başar Asadqa qatıstı kelispey qalıp jürdi. Resey Asadtıñ bilik basında qala beruine müddeli bolsa, Türkiya Asad twrğanda eldegi azamat soğısı men jikşildik bitpeydi dep sanaydı.                                                                                                                                                                          Azattıq radiosı