Suretterden şınımen jan türşigedi – baspanasız erler, äyelder men balalar barar jer tappağan soñ molanı panalap kelgen. 50 şaqtı irandıq azamattıñ Tegerannıñ sırtındağı ziratta twrıp jatqanına birneşe jıl bolğan tärizdi.

Qayırşılıqtıñ şegine jetken jandardıñ qazulı kördegi [Iranda qabirdi aldın-ala qazıp qoyadı] tirligi jaylı qorqınıştı suretter qatardağı azamattardı da, biliktegi lauazım ielerin de şoşıttı, jwrt ükimettiñ şara qabıldauın talap etti.

Kündelikti şığatın Şahrvand (Shahrvand) gazetiniñ birinşi betinde jeltoqsannıñ 27-si küni jariyalanğan üysiz-küysiz jandar turalı maqalada Tegerannıñ sırtındağı Şahriyar kentinde twrıp jatqandardıñ köbi naşaqorlar dep sipattalğan. Olardıñ auır tağdırın beyneleytin suretter äleumettik jelige lezde tarap, qarapayım twrğındar men tanımal adamdar bwğan bey-jay qalmay, pikir bildirdi.

QOĞAM NARAZILIĞI

Iran prezidenti Hassan Rouhani ziratta ömir sürudi “ükimet pen halıq üşin öte öreskel jağday” dep atadı.

“Kedeyşilik, mwqtajdıq pen qiındıqtarğa ükimet te, halıq ta jauaptı. Batıs elderinde kedey adamdar köpir astında karton jastanıp nemese metro beketinde wyıqtaydı dep estigen edim, biraq beyitte ömir sürgender jaylı estimeppin” degen Rouhani jeltoqsannıñ 28-i küni.

Prezidenttiñ bwl sözi Oskar sıylığı iegeri, irandıq rejisser Asgar Farhadige jauap retinde estildi. Farhadi jeltoqsannıñ 27-si küni Rouhanige jazğan hatında “suıq tünderin molada ötkizip jatqan er, äyel jäne balalar üşin ökinip, wyalatının” aytqan. “Osı ökinişimdi sizben jäne eldegi jauapkerşilikti sezinetin basqa jandarmen bölissem deymin” dep jazğan rejisser.

Köpşilik jwrt aşu-ızasın äleumettik jelide bildirdi. Facebook qoldanuşı Kuhe Sefid ükimetti “siriyalıq Aleppo qalasın qalpına keltiru tärizdi şeteldik jobalarğa aralasqanşa eldegi äleumettik-ekonomikalıq mäselelerdi şeşpey me” dep ayıptadı.

Tegerannıñ sırtındağı ziratta twrıp jatqan adam. Irandıq Sharvand basılımındağı suret.

Tağı bir Facebook qoldanuşı Javad Siadat “Qwdayım-au, qanday swmdıqqa kuäger bolıp jürmiz?” dep jazdı.

Mohesen Eb esimdi azamat “abıroy, wyat pen qorqınıştan jwrday” dep bilikti ayıptağan.

Jeltoqsannıñ 28-i küni beyitte twratın jandar taqırıbın jalğastırğan maqalasında Shahrvand basılımı bilik şara qabıldauğa uäde etkennen keyin qauipsizdik küşteri üysiz adamdardı moladan mäjbürlep äketkeni jaylı jazğan. Gazet deregi boyınşa, keybireulerdiñ älgi beyitte twrıp jatqanına on jıldan asqan.

NAŞAQORLAR KÖBEYİP BARADI

ISNA jartılay resmi aqparattıq agenttigine bergen swhbatında Tegeran provinciyasınıñ gubernatorı Sayed Hoseyn Haşemi mola twrğındarın “esirtki diñkeletken jandar” dep sipattağan.

“Bwl adamdardıñ işerge ası bolmay aştıqtan bwralıp jürdi degen aqparat oylanbay, jönsiz jariyalanğan, öytkeni bwlar esirtkige äbden salınıp bitken kileñ naşaqor” degen gubernator jeltoqsannıñ 28-i küni. Ol sonımen birge älgi adamdar ziratqa jaqın mañdağı sauıqtıru lagerine ornalastırılğanı turalı habarlağan.

Iran resmi orındarınıñ mälimeti boyınşa, Tegeranda 15 mıñğa juıq üysiz adam bar, onıñ 5 mıñı – äyelder. Üysizderdiñ köbi – naşaqorlar. Resmi derek boyınşa, elde emdeu-sauıqtıru bağdarlamasına 1,4 million naşaqor tirkelgen, biraq belsendiler 80 million twrğını bar elde naşaqorlar sanı 2 millionnan asadı deydi.

Esirtkimen wstalğandarğa jazanıñ auır ekendigine qaramastan naşaqor sanı köbeyip keledi dep sanaladı. Onıñ negizgi sebepteriniñ biri – älemdegi geroin öndiruşi bastı el Auğanstannan esirtkiniñ Iran arqılı tasımaldanuımen baylanıstı. Qazan ayında BWW-nıñ esirtki jäne qılmıs jönindegi basqarması (UNODC) Auğanstanda apiın ösiru 201 mıñ gektarğa artıp, 2015 jıldan beri 10 payızğa köbeygeni turalı habarlağan.

Azat Europa / Azattıq radiosı