Aldağı tört jılda AQŞ-tı Tramp bilep-tösteydi. Älemge sözin ötkizip otırğan alpauıt eldiñ sırtqı sayasattağı ärbir äreketi Qazaqstandı da aynalıp ötpeydi. Tramptıñ  AVS World News Tonight bağdarlamasına bergen swhbatın audarıp basuımızğa da osı sebep boldı-dep jazdı kaz.365info.kz.

Biz ğoy, tıñdap otırdıq. Osı arqılı onıñ psihologiyalıq portretin jasauğa tırıstıq. Neni bayqadıq?

Tramp «tiri» adam eken. Resmilik atımen joq. Jasandılığın da körmedik. Kerisinşe, äumeserligi bar.

Maqtağan emes, sonısımen wnadı bir jağınan. Biraq,  Amerikadağı demokratiyanıñ şın körinisi sonda jurnalist prezidentten qorıqpaydı. Osı jolı da solay boldı. Tramp jurnalistiñ aldında aqtaldı. Ağınan jarıldı. Aytqan sözderi men bergen uädeleri üşin jauap beruine tura keldi.

Wzaq söyledi ol. Arasında eñ özekti degen oyların tilip aldıq. Bälkim, sizge de qızıq bolar, oqıp köriñizşi.

«Qamal soğamın»

Iä, soğam. AQŞ pen Meksikanıñ arasında qamal twrğızam. Bwl qajettilik. Qaljıñdap twrğam joq. Saluımız kerek. AQŞ-qa ağılıp jatqan esirtki tasqının toqtatu maqsat. Bwl Meksikadan keletin adamdarğa da qatıstı.  Aynalıp kelgende, bäri AQŞ-tıñ müddesi üşin. Aynalıp kelgende, mäsele Meksikada emes. Meksika deldal. Älemdegi eñ aram, eñ las zattardıñ barlığı, aldımen osı elge keledi. Sosın bizge ötedi. Men bwğan tosqauıl qoyam. Bizge damığan äri sayasi-ekonomikalıq twrğıdan mıqtı Meksika kerek.

Qamaldı qaşan qalaytınımızdı däl ayta almaymın. Bälkim, eki-üş aydan keyin…

Mwsılmandar AQŞ-qa kire almay ma?

Aytayın degenim… mwsılmandarğa elge kiruge tıyım salmaymız. Bwl elinde atıs-şabıs jürip jatqandarğa qatıstı. Bwlardıñ atın aldağı uaqıtta ataymın. Osı elderden köşip kelgender AQŞ-tıñ berekesin ketirip otır. Bwlardı kirgizbeymiz. Amerikağa köşip kelu bwrınğıday oñay bolmaydı. Bas auruımız onsız da jetip artıladı. AQŞ-qa kektenip keletin, keyin öşin alğısı keletinder keregi joq, bizge.

Bwlardıñ atın aldağı uaqıtta ataymın.  Tizim wzın. Tanıssañız, tañğalasız. Biraq, amal joq. Biz qauipsiz elde ömir süruimiz kerek. Europa qaytti? Qatelesti. Milliondağan bosqın Batısqa basıp kirdi. Bwl apat! Apattıñ kökesi alda…

«Ädemi ketpedik»

Eşnärsege köñiliñ tolmaytın älemde twramız… Irakqa beker kirdik. Irakqa kirmeuimiz kerek edi. Kirdik pe, däl solay ketpeuimiz kerek edi.

Biz haosta ömir süremiz. Aleppoda ne bop jatır, qarañız. Mosuldağı jağday şe? Tayau Şığıstağı ahual qanday? Ol jaqtağı jwrt Batıs pen AQŞ-qa bezdi. Solay, qazirgi älem – haos, dostım.

«Ätteñ…»

Iraktan ketken künniñ özinde bwl jaqta mwnaydı baqılap qalu kerek edi. Mwnaydı baqılaudan ayırılmağanda… aşığın aytayın «Islam memleketi» de payda bolmas edi. Olar mwnaydıñ arqasında ösip, önip jatır. Olardı mwnay asırap otır. Biz ketip qaldıq, mwnaydı qarausız qaldırdıq. Biz ketkende, senesiz be, Irakta ükimet bolğan joq (qazir de joq). Qay betimizben kettik?

Biz eki wlttan qauip küttik. Irak pen Irandı aytam. Äskeri küşi jağınan teñ edi bwlar. Ekeui osı künge deyin sıyısqan joq. Soğısıp keldi. Soğıs olardıñ ömir dağdısına aynalıp ketti. Biz Iraktıñ basın aldıq. Sol kezderi men: «Iran Iraktı bilep tösteytin boladı» degem. Aytqanım ayday keldi.

Dialog

Äñgimeni osı aradan üzeyik. Sebebi, däl osı arada jurnalist Tramptıñ sözin böledi.

– Sizdiñ sınşılarıñız, böten eldiñ mwnayın baqılauğa alu — zañ bwzu deydi…

— Kim, kim deysiz? Bwlar kim özi? Bwlay kim aytadı? Äy, aqımaqtar…

– Sonda qalay? 

— Solay. Olar sınşı emes, aqımaqtar.

Nege?

– Qalay nege? Mwnaydı baqılauğa alu kerek edi! Mwnaydı baqılauğa alsaq, «Islam memleketi» de bolmaydı. Bwdan wtar edik. Biz qayttik? Osı uaqıtqa deyin Tayau Şığısqa 6 trillion dollar şığındadıq! Oylap körşi! Al AQŞ qiraudıñ aldında twr.

Olarda da joldıñ jırı köp eken

Bizdiñ joldardı qarañız. Jol dep aytuğa auzıñ barmaydı. Köpirlerdi, mektepterdi qarañız. Qwlağalı twr. Tayau Şığısqa 6 trillion dollardı töge saldıq. Al özimizde, mektep saluğa aqşa joq. Aqşanıñ bäri, sırtqa suday ağıp jatır. Jeter! Biz wzaq soğıstıq. 15-16 jılımızdı özimizge emes, älemge arnadıq. Jeter, jeter…

P.S. Tramp osılay dedi. Özderine qatıstı basqa da dünielerdi ayttı. Är sözi «Amerika üşin, amerikalıqtardıñ müddesi üşin» degenmen ayaqtalıp jattı.

Körelik, sözi men isi säykese me eken?

kaz.365info.kz