الداعى ءتورت جىلدا اقش-تى ترامپ بيلەپ-توستەيدى. الەمگە ءسوزىن وتكىزىپ وتىرعان الپاۋىت ەلدىڭ سىرتقى ساياساتتاعى ءاربىر ارەكەتى قازاقستاندى دا اينالىپ وتپەيدى. ترامپتىڭ اۆس World News Tonight باعدارلاماسىنا بەرگەن سۇحباتىن اۋدارىپ باسۋىمىزعا دا وسى سەبەپ بولدى-دەپ جازدى kaz.365info.kz.
ءبىز عوي، تىڭداپ وتىردىق. وسى ارقىلى ونىڭ پسيحولوگيالىق پورترەتىن جاساۋعا تىرىستىق. نەنى بايقادىق؟
ترامپ «ءتىرى» ادام ەكەن. رەسميلىك اتىمەن جوق. جاساندىلىعىن دا كورمەدىك. كەرىسىنشە، اۋمەسەرلىگى بار.
ماقتاعان ەمەس، سونىسىمەن ۇنادى ءبىر جاعىنان. بىراق، امەريكاداعى دەموكراتيانىڭ شىن كورىنىسى سوندا جۋرناليست پرەزيدەنتتەن قورىقپايدى. وسى جولى دا سولاي بولدى. ترامپ ءجۋرناليستىڭ الدىندا اقتالدى. اعىنان جارىلدى. ايتقان سوزدەرى مەن بەرگەن ۋادەلەرى ءۇشىن جاۋاپ بەرۋىنە تۋرا كەلدى.
ۇزاق سويلەدى ول. اراسىندا ەڭ وزەكتى دەگەن ويلارىن ءتىلىپ الدىق. بالكىم، سىزگە دە قىزىق بولار، وقىپ كورىڭىزشى.
«قامال سوعامىن»
ءيا، سوعام. اقش پەن مەكسيكانىڭ اراسىندا قامال تۇرعىزام. بۇل قاجەتتىلىك. قالجىڭداپ تۇرعام جوق. سالۋىمىز كەرەك. اقش-قا اعىلىپ جاتقان ەسىرتكى تاسقىنىن توقتاتۋ ماقسات. بۇل مەكسيكادان كەلەتىن ادامدارعا دا قاتىستى. اينالىپ كەلگەندە، ءبارى اقش-تىڭ مۇددەسى ءۇشىن. اينالىپ كەلگەندە، ماسەلە مەكسيكادا ەمەس. مەكسيكا دەلدال. الەمدەگى ەڭ ارام، ەڭ لاس زاتتاردىڭ بارلىعى، الدىمەن وسى ەلگە كەلەدى. سوسىن بىزگە وتەدى. مەن بۇعان توسقاۋىل قويام. بىزگە دامىعان ءارى ساياسي-ەكونوميكالىق تۇرعىدان مىقتى مەكسيكا كەرەك.
قامالدى قاشان قالايتىنىمىزدى ءدال ايتا المايمىن. بالكىم، ەكى-ءۇش ايدان كەيىن…
مۇسىلماندار اقش-قا كىرە الماي ما؟
ايتايىن دەگەنىم… مۇسىلماندارعا ەلگە كىرۋگە تىيىم سالمايمىز. بۇل ەلىندە اتىس-شابىس ءجۇرىپ جاتقاندارعا قاتىستى. بۇلاردىڭ اتىن الداعى ۋاقىتتا اتايمىن. وسى ەلدەردەن كوشىپ كەلگەندەر اقش-تىڭ بەرەكەسىن كەتىرىپ وتىر. بۇلاردى كىرگىزبەيمىز. امەريكاعا كوشىپ كەلۋ بۇرىنعىداي وڭاي بولمايدى. باس اۋرۋىمىز ونسىز دا جەتىپ ارتىلادى. اقش-قا كەكتەنىپ كەلەتىن، كەيىن ءوشىن العىسى كەلەتىندەر كەرەگى جوق، بىزگە.
بۇلاردىڭ اتىن الداعى ۋاقىتتا اتايمىن. تىزىم ۇزىن. تانىسساڭىز، تاڭعالاسىز. بىراق، امال جوق. ءبىز قاۋىپسىز ەلدە ءومىر ءسۇرۋىمىز كەرەك. ەۋروپا قايتتى؟ قاتەلەستى. ميلليونداعان بوسقىن باتىسقا باسىپ كىردى. بۇل اپات! اپاتتىڭ كوكەسى الدا…
«ادەمى كەتپەدىك»
ەشنارسەگە كوڭىلىڭ تولمايتىن الەمدە تۇرامىز… يراكقا بەكەر كىردىك. يراكقا كىرمەۋىمىز كەرەك ەدى. كىردىك پە، ءدال سولاي كەتپەۋىمىز كەرەك ەدى.
ءبىز حاوستا ءومىر سۇرەمىز. الەپپودا نە بوپ جاتىر، قاراڭىز. موسۋلداعى جاعداي شە؟ تاياۋ شىعىستاعى احۋال قانداي؟ ول جاقتاعى جۇرت باتىس پەن اقش-قا بەزدى. سولاي، قازىرگى الەم – حاوس، دوستىم.
«اتتەڭ…»
يراكتان كەتكەن كۇننىڭ وزىندە بۇل جاقتا مۇنايدى باقىلاپ قالۋ كەرەك ەدى. مۇنايدى باقىلاۋدان ايىرىلماعاندا… اشىعىن ايتايىن «يسلام مەملەكەتى» دە پايدا بولماس ەدى. ولار مۇنايدىڭ ارقاسىندا ءوسىپ، ءونىپ جاتىر. ولاردى مۇناي اسىراپ وتىر. ءبىز كەتىپ قالدىق، مۇنايدى قاراۋسىز قالدىردىق. ءبىز كەتكەندە، سەنەسىز بە، يراكتا ۇكىمەت بولعان جوق (قازىر دە جوق). قاي بەتىمىزبەن كەتتىك؟
ءبىز ەكى ۇلتتان قاۋىپ كۇتتىك. يراك پەن يراندى ايتام. اسكەري كۇشى جاعىنان تەڭ ەدى بۇلار. ەكەۋى وسى كۇنگە دەيىن سىيىسقان جوق. سوعىسىپ كەلدى. سوعىس ولاردىڭ ءومىر داعدىسىنا اينالىپ كەتتى. ءبىز يراكتىڭ باسىن الدىق. سول كەزدەرى مەن: «يران يراكتى بيلەپ توستەيتىن بولادى» دەگەم. ايتقانىم ايداي كەلدى.
ديالوگ
اڭگىمەنى وسى ارادان ۇزەيىك. سەبەبى، ءدال وسى ارادا جۋرناليست ترامپتىڭ ءسوزىن بولەدى.
– ءسىزدىڭ سىنشىلارىڭىز، بوتەن ەلدىڭ مۇنايىن باقىلاۋعا الۋ — زاڭ بۇزۋ دەيدى…
— كىم، كىم دەيسىز؟ بۇلار كىم ءوزى؟ بۇلاي كىم ايتادى؟ ءاي، اقىماقتار…
– سوندا قالاي؟
— سولاي. ولار سىنشى ەمەس، اقىماقتار.
نەگە؟
– قالاي نەگە؟ مۇنايدى باقىلاۋعا الۋ كەرەك ەدى! مۇنايدى باقىلاۋعا الساق، «يسلام مەملەكەتى» دە بولمايدى. بۇدان ۇتار ەدىك. ءبىز قايتتىك؟ وسى ۋاقىتقا دەيىن تاياۋ شىعىسقا 6 تريلليون دوللار شىعىندادىق! ويلاپ كورشى! ال اقش قيراۋدىڭ الدىندا تۇر.
ولاردا دا جولدىڭ جىرى كوپ ەكەن
ءبىزدىڭ جولداردى قاراڭىز. جول دەپ ايتۋعا اۋزىڭ بارمايدى. كوپىرلەردى، مەكتەپتەردى قاراڭىز. قۇلاعالى تۇر. تاياۋ شىعىسقا 6 تريلليون دوللاردى توگە سالدىق. ال وزىمىزدە، مەكتەپ سالۋعا اقشا جوق. اقشانىڭ ءبارى، سىرتقا سۋداي اعىپ جاتىر. جەتەر! ءبىز ۇزاق سوعىستىق. 15-16 جىلىمىزدى وزىمىزگە ەمەس، الەمگە ارنادىق. جەتەر، جەتەر…
P.S. ترامپ وسىلاي دەدى. وزدەرىنە قاتىستى باسقا دا دۇنيەلەردى ايتتى. ءار ءسوزى «امەريكا ءۇشىن، امەريكالىقتاردىڭ مۇددەسى ءۇشىن» دەگەنمەن اياقتالىپ جاتتى.
كورەلىك، ءسوزى مەن ءىسى سايكەسە مە ەكەن؟
kaz.365info.kz
پىكىر قالدىرۋ