Уругвай – Португалия 2:1
kerey.kz
Төрт жыл бұрын Бразилияда өткен ӘЧ-тің 1/8 финалында Колумбиядан жеңілген Уругвай Ресейдегі чемпионатқа әбден шынығып келді. Негізгі құрамы да көп өзгерген жоқ. Қақпашылар Муслера мен Сильва (қосалқы), қорғаушылар Годин, Касерес, Хименес, Перейра мен Коатес (қосалқы), жартылай қорғаушы Родригес, шабуылшылар Суарес, Кавани мен Стуани. Бұлардың бәрі төрт жыл бұрын ардагер Форланмен бірге ойнағандар. Әсіресе, Годин, Суарес пен Каванидің финалға ұмтылатындер шағы. Төрт жылдан кейін бұлар кезіндегі Форлан құсап негізгі құрамаға ілінеді деп ойламаймын. Сол себепті осы шарықтап тұрған кезін пайдаланып қалса игі еді. Кавани әлемдегі мықты футболшылардың бірі екенін дәлелдеп екі тамаша гол соқты. Екеуі де күрделі гол. Біріншісін баспен соқты: қақпа түбіне өте қатты және биік әуелеп келген Суарестің пасын құлақ шекемен тоғыздыққа топ еткізді. Екіншісін айып алаңы сыртынан асқан дәлдікпен соқты. Сөйтіп Португалияның көп шабуылының бірі кезінде Пепенің теңестірген есебін қайта бұзды. Ойын соңына қарай ақсаңдап қалды да, ауыстыруды сұрады.
Ал екі жыл бұрын Еуропа чемпионы атанған құрамының жартысына жуығы жаңарып үлгерген Роналду және оның командасы бүкіл күшін сарқып ойнады. Португалиялық жұлдыздың ойыны жүрмеді. Бұл ойындағы ең есте қалған көрініс оның тепкен доптары емес, ақсаңдаған Каваниді джентельменше демеп, алаң сыртына дейін шығарып салған сәті. КриРо камера мен миллиондаған фанаттарының алдында қалай қимылдауды біледі ғой 
Бір ғана жайтқа ішім ашыды, Португалияның бас бапкері диспетчер Куарежманы алаңға тым кеш шығарған сияқты. Екінші таймның басынан қосу керек еді.
Қош, сонымен бұл жолғы болжап болмайтын өте қызық чемпионат “жұрт мақтаған, қыз жақтаған” қазіргі футболдың қос жұлдызы Месси мен Роналдусыз жалғасатын болды. Неймардың жайын дүйсенбі білеміз. Модрич, Мбапе, Азар мен Кейн сияқты жас шеберлер қуанта түсер деп үміттенем.
Пікір қалдыру