Елімізде сүт тағамдарын өзгеше түрде өңдейтін ірі зауыт іске қосылды
kerey.kz
Зауыт жылына 110 мың тонна сүт өңдейді
Солтүстік Қазақстан облысында «Eurasian Milk» ірі сүт зауыты іске қосылды. Eurasian Milk зауыты тарихы 1928 жылы басталған Петропавл қаласының сүт кәсіпорнының базасында ашылады. Бір ғасырға жуық уақыттан кейін аймақтағы тамақ өнеркәсібінің тарихы терең кәсіпорындарының бірі мүлдем жаңа технологиялық деңгейде қайта жанданды. Жаңа зауытта шығарылған сүт өнімдерінің алғашқы партиясы сауда желілеріне 2020 жылдың желтоқсанында түседі. Ауқымды жобаны іске қосу ел экономикасын тұрақтандыруға үлес қосады. Eurasian Foods Corporation (EFC) холдингі ірі салық төлеушілердің қатарына кіреді, өткен жылы мемлекеттік бюджетке 9 млрд.теңгеден астам салық төледі.
Зауытты жаңғыртуға $12 млн. жұмсалды. Зауытта бірнеше желі орнатылған: Германия өндірісі бойынша сүтті қабылдау және өңдеу, сары май өндіру бойынша швейцариялық желі, ірімшік өндіру бойынша австриялық желі және «моцарелла» типті ірімшіктер шығару үшін арнайы италиялық желі. Зауыттың мұндай құрылымы Қазақстандағы алғашқы және жалғыз зауыт саналады. Бұл бастаманы СҚО әкімдігі де қолдады.
Алайда, отандық сүт өңдеу кәсіпорындары үшін өнеркәсіптік өңдеуге жарамды сапалы сүттің жетіспеушілігі бар. Оның себебі шикізат жеткізілімінің едәуір бөлігін құрайтын ұсақ фермалардың бытыраңқылығы мен әлсіздігінде, олардың сапалы жемшөп базасына қол жетімділігі мен малға ветеринариялық күтімнің болмауында. Сарапшылар атап өткендей, шикі сүт – бұл сақтау мерзімі өте қысқа және сапаны жақсарту мен өндіріс көлемін ұлғайту ұшін өте ұзақ уақыт аралығын және қымбатшылықты қамтитын өнім.
Eurasian Milk басшылығы кәсіпорынға шаруа қожалықтарынан жеткізілетін шикі сүтті қабылдаудың ең қатаң талаптарына сай болуын қамтамасыз етуге ұмтылады. Сондықтан компания фермерлік өнімдерге кепілдендірілген және ұзақ мерзімді сұранысты ұсына отырып, жергілікті шаруашылықтармен ынтымақтастық орнатуды жоспарлап отыр. Кәсіпорындағы негізгі міндеттердің бірі – фермерлермен серіктестік қарым-қатынас орнату, олармен алдын-ала бірнеше жылға келісім-шарттар жасасу. Eurasian Milk фермерлік шаруашылықтарды несиелендіруде кепілгер болуға, сондай-ақ қажет болған жағдайда фермерлерге керекті жабдықтарды ұсынуға ниетті.
Осылайша, Eurasian Milk басшылығы өз тарапынан сүт саласын дамыту бойынша өңірлік биліктің күш-жігерін қолдайды. Солтүстік Қазақстанда қазірдің өзінде сүттің сапалық сипаттамаларын жақсартуға, сала кәсіпорындары үшін шикізат жеткізудегі ірі шаруашылықтардың үлесін арттыруға бағытталған сүт-тауар фермаларын дамыту жөніндегі бағдарлама жұмыс істейді. Сондай-ақ, мемлекет инвестицияларды субсидиялау тетігі арқылы салаға қолдау көрсетеді.
«Eurasian Foods Corporation» АҚ басқарма төрағасының орынбасары Иван Колесниковтың айтуынша, Қазақстан нарығындағы позициясын күшейтуге мүмкіндік береді, сондай-ақ қазақстандықтарды сапалы және қолжетімді сүт өнімдерімен қамтамасыз етуге көмектеседі.
«Кәсіпорынның міндеті – шикізаттан бастап, бәрінде максималды сапада ең төменгі өзіндік құнды қамтамасыз ету. Дегенмен, бұл заманауи технологиялардың, тиімді ұйымдастырудың және жоғары өнімділіктің үйлесімімен ғана мүмкін. Шағын зауыттар, сондай-ақ заманауи жабдықтары, сапалы мал басы мен жемшөп базасы жоқ шағын фермалар, өкінішке қарай, беларусьтік, украиналық немесе Балтық жағалауы компанияларымен бәсекелесе алмайды. Өз кезегінде біздің өндіріс жылына кем дегенде 110 мың тонна сүт өңдеуге бағытталған, бұл – оңтайлы деңгей. Біз сүт саласының бәсекеге қабілеттілігін арттыру үшін қолымыздан келгеннің бәрін жасауды жоспарлап отырмыз, фермерлермен ұзақ мерзімді сенімді қарым-қатынастар орнатамыз, алайда олар экономикалық тұрғыдан ақталуы тиіс. «Аз өндіреміз, қымбат сатамыз» қағидатынан «көп өндіреміз, экономиканың осы сегментінде көшбасшы елдермен бәсекелі баға бойынша сатамыз» қағидатына көшуіміз керек», – деді Иван Колесников.
Eurasian Foods Corporation – Қазақстан мен Орталық Азия елдері тамақ өнеркәсібінің жетекші кәсіпорындарының бірі, май өнімдерін өндірушілер арасында республиканың танымал көшбасшысы. 2019 жылы холдинг құрамына Петропавл қаласындағы «Eurasian Milk» ЖШС кәсіпорны кірді. Бүгінгі таңда Eurasian Foods Corporation холдингі 3 400-ден астам адамды жұмыспен қамтамасыз етеді.
Компанияның қоржынында «3 желания», «Шедевр», «Золотой стандарт», «Златые горы», «Иртыш» брендтерімен өндірілетін 200-ден астам атаулы сапалы өнімдер – майонездер, кетчуптар, тұздықтар, дәмдеуіштер, сары және өсімдік майлары, маргариндер, тамаққа қоспалар, маринадтар және т.б. бар.
Әмірболат Құсайынұлы, Алматы
Пікір қалдыру