AQŞ-tıñ bedeldi äskeri akademiyası Vest-Poyntta tört jıl bilim alğan Maqsat Nwğmanov pen aviaciya akademiyasına bilim aluğa endi bara jatqan Vladislav Gogulyağa mausımnıñ 15-i küni Qazaqstandağı AQŞ-elşisi Djordj Krol arnayı sertifikattar tapsırdı. Qorğanıs ministrliginiñ mamandarı AQŞ-tan kelgen jastardıñ endi jwmıssız qalmaytının aytadı.

Aqtöbe oblısınıñ tuması Maqsat Nwğmanov Vest-Poynt akademiyasına 17 jasında tüsken. Oğan deyin Astanadağı Nazarbaev ziyatkerlik mektebinde oqığan. Matematikanı öte jaqsı körgendikten Vest-Poynt akademiyasında injenerlik tärtip (disciplina) boyınşa bilim alğan. Injenerlik jüyege qatıstı qosalqı avtorlıqpen jazğan ğılımi jwmısı da jariyalanğan. Maqsat Azattıqqa AQŞ-ta oquğa tüsu, bilim alu qiın bolğandıqtan osı eldi ädeyi tañdağanın, sol qiındıqtı jeñip şıqqısı kelgenin ayttı.

Qazaqstandağı AQŞ elşisi Djordj Krol Vest-Poynt akademiyasına tüsu öte qiın ekenin, biraq, oqu ornınıñ bedeli joğarı ekenin atap ötti. Elşiniñ aytuınşa, eki jüz jıldıq tarihı bar osı akademiyanıñ tülekteri işinde AQŞ-tıñ eki prezidenti (Uliss Grant pen Duayt Eyzenhauer) jäne de basqa elderdiñ jetekşileri bar.

AQŞ-tıñ Vest-Poynt äskeri akademiyasın bitirgen Maqsat Nwğmanov (sol jaqta) pen AQŞ äskeri akademiyasına oquğa tüsken Vladislav Gogulya sertifikat tabıstau saltanatında. Astana, 15 mausım 2015 jıl.

Djordj Krol Maqsat Nwğmanovtıñ alğan bilimi men täjirbiesi Qazaqstan üşin paydalı boladı dep ümittenedi. Al Qorğanıs ministrliginiñ bilim jäne ğılım departament jetekşisi Aygül Tölembaeva “ötkennen sabaq alğandarın” aytadı. Onıñ meñzep otırğan «sabağı» AQŞ-ta äskeri bilim alıp kelip, elde basqa salada jwmıs istep ketkenderge qatıstı. Osı künge deyin AQŞ-tıñ joğarı äskeri bilim ordasında 7 adam (Maqsat Nwğmanovtı qosa eseptegende) oqıp kelgen. Biraq, onıñ bäri Qazaqstandağı äskeri salada qızmet etpeydi eken.

– Qorğanıs salasına qızmet etpeytinder bar. Olar (AQŞ-ta oqıp kelgender) öte bilimdi. Tildi (ağılşın tilin) biledi, matematikalıq, injenerlik mamandıqtı meñgergen. Wlttıq, şeteldik kompaniyalar olarğa öte jaqsı aylıq wsınadı. Sol jerlerde elge paydasın tigizip jatır. Qorğanıs ministrligi mwnday jastardı wstap qaluğa barlıq jağdaydı jasap jatır,– deydi Tölembaeva.

Al elge juırda ğana oralğan Maqsat Nwğmanov qorğanıs ministrligi özine qanday jwmıs wsınatınınan äzirge beyhabar.

AQŞ-tıñ äskeri aviaciya akademiyasında 4 jılğa bilim aluğa bara jatqan Vladislav Gogulya elge oralğanda «qajetti maman» bolatınına senimdi. Almatıdağı «Arıstan» arnaulı liceyinde oqığan Vladislav Gogulya jaqın jerdegi Resey emes, alıstağı AQŞ-tağı oqu ornın tañdau arqılı bilim sapasın küşeytip, ağılşın tilin üyrengisi kelgenin ayttı.

Qorğanıs ministriniñ orınbasarı bolğan general Ämirbek Toğısov jastardıñ AQŞ, Türkiya, Franciya men Qıtay siyaqtı elderde äskeri bilim alğanı paydalı degen pikirde.

– Bizdegi äskeri jattığular men taktika, äskeri instituttardıñ qwrılımı Reseydikinen aumaydı. Birdey dese de boladı. Jastardı özge de sırt elderde oqıtıp, jinağan bilimi men täjirbielerin paydalanıp, qorğanıs salasın jetildire beru kerek, – deydi Toğısov.

AQŞ-tağı äskeri akademiyalar 1983 jıldan bastap şeteldik studentterdi qabılday bastağan. Är äskeri akademiyada bir jılda şeteldik 60 student qana oqi aladı. Jäne bir memleketten kelgen student sanı törtten aspauı tiis. Oqu merzimi – tört jıl. Bilim aqısı –tegin. Qazir AQŞ-tıñ äskeri akademiyalarında qazaqstandıq 10 student bilim alıp jatır. Onıñ ekeui – qız bala.

Azattıq radiosı