Қаңтардың 17 күні Қытай астанасы Бейжіңде елді елеңдетіп, дүбірі жер жарған үлкен бір салтанатты шара өтті. «Байтақ алаптың ұландары – 2015 жылғы мемлекеттік 10 үздік диқанды бағалау сыйлық тарату салты» деп аталатын салтанатты жиынды Қытай орталық телевизиясының 7 арнасы ұйымдастырып, көрсетті. Барша жұрттың, миллиондаған көрерменнің назары бүкіл ел бойынша, 55 ұлттың арасынан сараланып шыққан, миллиардтың ішінен маңдайы жарқырап, сахна төрінде тұрған 10 үздік еңбек еріне ауды. Міне солардың қатарында Шыңжаңдағы Ерентаудың қойнауына қоныс тепкен Құтыби ауданы, Торғайты қалашығы, Торғайты ауылынан келген қазақ Бақытқан Қазезұлы да бар еді.
Үстіне қазақы үлгідегі зерлі шапан, басына оюлы тақия киген еңгезердей денелі, қызыл шырайлы азаматтың өзгелерден ерекшеленіп тұрғаны да шындық. Қасына үкілі тақия, оюлы костюьм киген немересін ерте шығыпты.
Бұл жолғы үздіктер Қытай Халық Республикасының Ауыл шаруашылық министрлігі тарапынан бағаланды. Ер еңбегін қадірлеген үкімет әр үздікке бағалы сыйлық, ерекше кәдесый, арнайы дипломмен бірге 50 мың юань нақ ақша табыс етті.
Бүкіл Шыңжаңнан жалғыз өзі қара үзіп шығып, Астанада сыйланған Бақықтан Қазезұлы бұл мәртебеге адал еңбек, ақ пейіл азаматтығымен жеткен жан. Оның басты ерекшелігі нарыққа ерте бейімделіп, кәсіптің көзін таба білгендігі.
Қандасымыз жайлы қысқаша тоқтала кетсек, Б.Қазезұлы ең алдымен ауылдағы қамдау-сауда коперативінің жүк машинасын жалға алып, тасымал жұмысымен айналысады. Сырт жерлерге барып, ел көрген азамат олардың жақсы тұрмыс-жағдайын қанығып, өз ауылын да осындай деңгейге жеткізсем деген мақсатқа құлшынады.
1994 жылы мал шаруашылығына ден қойған Бақаң көне сүрдекпен жүре бермей, ғылыми жолмен мал бағу арқылы 20 бас қой, 2 бас сиырын аз жылдың ішінде неше еселеп, ауқатты адамдардың бірі болып шыға келеді. Ең үлкен қасиеті ол – өзі байығанына емес, өзгелерге көмек қолын созып, ауылдастарын алға жетелей алатын мүмкіндігі пайда болғанына қуанады. Көмекке мұқтаж, қиыншылығы бар жарлы-жақпайларға қолынан келген көмегін аямайды. Ауылдағылардың «қиыншылығың болса Бақытқаны ізде» деген тәмсілді сөзі тегін айтылмаса керек.
Бақытқанның жомарт көңіл, жақсы тілекпен көмек көрсеткен ісін санамалап тауысу қиын. Ол 30 жылдан бері 150-дей отбасына әр түрлі жәрдем көретіп, 300 мың юаннан астам қаржысын жұмсаған. Көмектесу – ауылдастарының уақыттық қиыншылығын шешкенімен, олардың алдағы уақытта тұрмысын жақсартуына жол аша қоймайтынын аңғарған ол тың тәсіл қарастыра бастайды.
Оның үстіне малшы қауымы қолдағы малының санын арттыру, жайылымды дұрыс пайдалануға аса мән бермей, байырғы сүрдекпен жүріп келе жатыр еді. Бұл олардың жаңаша жолмен ауқаттануына, әрі күн сайын тұяқ кесті болып бара жатқан мал өрісін қалыпқа келтіруге себі тимейтін еді. Осыны ойлаған Бақытқан 2012 жылы жергілікті үкімет орнының қолдауымен 56 малшының басын қосып, Шыңжаңда тұңғыш рет жайылым мал-шаруашылық коперативін құрады.
Бұл қадам малшылардың өзара селбесіп ауқаттануына, жайылымды тоздырмай сақтауына, малды ғылыми жолмен қолда бағып, сапасын жақсартуға бағытталған еді. Осындай үлкен бастамаларға мұрындық болып, ауылдастарына соны жол, жаңа тәсіл нұсқаған Бақытқанның алдағы жоспарлары да көп. Ол коперативті әлі де кеңейтіп, тұрмысы төмен, еңбеккүші аз отбасыларды демеп, жағдайын жақсартуды ойлайды.
Заманға сай ұмтылыс жасап, өзін ғана емес, ауылдағы ағайынның да жайына жаны ашитын еңбек ерінің әр ісі берекелі бола бергей! Бақытқан Қазезұлының мемлекет тарапынан жоғары бағаланып жатуы – қазақ халқының да еңбексүйгіш, бауырмал, талапты халық екенін миллиардтар еліне танытты деп ойлаймыз.
Мұрат Алмасбекұлы 

baq.kz