Ұзынағашта жоғалған үш жігітке қатысты қылмыстық оқиғаның хронологиясы
Талдықорған қаласына жақын маңдағы Көксу ауданының 3 тұрғыны Алматы жақтағы Ұзынағаш базарында мал сатамыз деп із-түзсіз жоғалып, соңында құмға көмілген сүйектері табылған болатын. Baq.kz редакциясы жалпы жағдайды назарда ұстап, әр күнгі болған оқиға тізбектерін жариялап отырған еді. Енді соңы қайғымен аяқталған қылмыстық оқиғаның хронологиясын ұсынады.
4-5 жылдан бері мал саудасын кәсіп еткен 1979 жылы туған Долданұлы Жарқынбек, 1973 жылғы Зарлыханұлы Мұқият пен Әлімхан Қадылбек есімді жігіттер Шығыс Қазақстан облысының Тарбағатай ауданынан 43 бас мал сатып алып, оны екі жүк көлігімен 17 қыркүйек, сенбі күні, Алматы маңындағы Ұзынағаш базарына шығарған.
Сенбі, 17 қыркүйекте: Сол күні олар екі бас малдың сатылғанын, қалғандарын да сату үшін ертеңгі жексенбілік базарға шығатынын айтып, үйіндегілерге хабарлаған.
Жексенбі, 18 кыркүйекте: Оларға жексенбі күні бейтаныс бір азамат келіп, «Малдарыңның бәрін мен сатып аламын. Ұзынағаштан 40 шақырым жердегі үйіме жеткізіп беріңдер. Ақшаларыңды сол жерден аласыңдар», – деп, әр бас малға 143 мың теңгеден бағасын да келісіп кеткен.
Сол күні көрген куәгерлердің айтуынша, жоғалған жігіттер: «Малдарымыздың қалған 41 басын біреулер алатын болды. Үйіне жеткізіп беріп, ақшамызды алып, кешке қарай біз де үйге қайтамыз», – деген.
Сатып алған адамға малдарын жеткізіп беруге жолға шықанын айтып, үйіндегілерге телефонмен хабарлаған.
Түстен кейіннен бастап олардың телефондары сөндірулі болады.
Дүйсенбі, 19 қыркүйекте: мүлде хабарсыз кетсе де, тусықандары оларды келеді деп күткен. Тергеу нәтижесіне сай, бірінші машина осы күні өртенген.
Сейсенбі, 20 қыркүйекте: ешқандай хабар болмаған соң, үш жігіттің біреуінің ағасы Адал Зарлыхан отбасындағылармен ақылдаса келе, Алматы облысы Көксу аудандық ішкі істер бөліміне інілерінің жоғалғаны жайлы арыз түсіріп, қасына бірнеше адам ертіп, Алматы жаққа жігіттерді іздеуге шыққан. Ұзынағаш, Отар және қырғыз-қазақ шекарасы маңын шарлап іздеген. Түнгі сағат 21:00 мөлшерінде Қордай полциясына үш жігіттің жоғалғаны жайлы арыз қалдырған.
Сәрсенбі, 21 қыркүйекте: туыстарын іздеген аталмыш жігіттер күні бойы Шу жақты шарлап келіп, кешке қарай Ұзынағаштағы Жамбыл аудандық ішкі істер бөліміне арзы жазған. Олар Ұзынағаш аудандық ішкі істер бөлімінде отырған кезде үстілерінен «Талдықорғаннан келдік» деп үш адам кірген. Ол жерде отырған полицейлер бір-біріне орысша сөйлеп: «Кешегі өртенген машина осылардікі емес пе екен?» деген сияқты әңгімелер қозғаған.
Бейсенбі, 22 қыркүйекте: іздеу шараларынан еш нәтиже болмаған соң, жоғалған жігіттердің біреуінің ағасы Тұрсын Әлімхан деген азамат Baq.kz редакциясына хабарласып, ақпараттық көмек беруін өтінген.
Бұл күні жоғалған жігіттерге тиесілі бір көлік өртенген күйінде табылған.
Сол күні кешке қарай өртенген машина туралы хабарды естіген Адал Зарлыхан полицейлерге еріп, нақ майданға барған. Жол бойындағы камераларды тексеріп, еш дерек көре алмаған. Сол машина өртенген уақытта оны көрген бір малшы мен дәмханада жұмыс жасайтын тағы бір әйел Ұзынағаш полициясына хабар береген. Бірақ ешқандай құқық қорғаушы көлік өртенген жерге келмеген. Куәгерлер «бұл көліктің кешкі 20:40 кезінде өртенгенін, 20 қыркүйектен 21 қыркүйекке қараған күні кеште, қасынан алдыңғы бампері сынған жеңіл көлікке мінген екі адамның кетіп бара жатқанын көргенін» айтқан.
Жұма, 23 қыркүйекте: Жамбыл облысы Дегерес ауылынан екінші машина табылды.
Ол туралы қытайдан көшіп келген бейтаныс оралман жігіт хабарлаған. Ол мал сатып жүрген жігіттердің жоғалғанын, ел болып іздеп жатқанын интернеттен көріп, иесіз тұрған көліктің қасына барып фотоға түсіріп алған да, тілеулестік ниетпен іздеушілерге хабарлап, ватсаппен фотосын жіберген. Бұл хабарды ести сала, туысқандары таңғы бес мөлшерінде полицейлермен бірге майданға барған. Оны өзге екі полицей күзетіп тұрған. Көліктің аккумуляторы ұрланыпты.
Көлікті көргенін хабарлаған жігіт, «өткен кеште өзінің бір танысының мал тиеген, бұзылып, оталмай қалған бір жүк көлігін жөндеп бергенін» айтып, ол адамның телефон нөмірін берген. Іздеушілер, яғни, Адал Зарлыхан бастаған адамдар әлгі адамға хабарласып, кездескен. Сол екінші куәгердің айтуынша: «бұрын полиция қызметкері болған бір жігіт келіп, машиналары бұзылып қалғанын, жөндеп беруін өтініп, ертіп барған. Ол кезде жоғалған үш жігіт бұл жерде де болмаған. Полицияда жұмыс жасаған әлгі жігітпен қоса ол жерде өзге екі адам және иесімен қоса бір трактор болған. Ол оталмай қойған машинаны сүйреуге келгенін айтқан.
Жүк көлігі жөнделген соң рөлге асығыс отырған олар машинаны орнынан қозғап қалғанда жол шетінде жақын тұрған тракторды барып соғып, аударып тастаған.
Ол тркаторды тартып тұрғызу үшін өзге көліктер шақырылған. Сосын бұзылған машинаны жөндеген жігіт үйіне қайтып кеткен.
Іздеушілер бұл хабарды ести сала сол маңайға барып, көздерімен анық іздерді көрген.
Осы күні түнге қарай іздеуші жігіттердің күшімен Шиен деген ауылда жайылып жүрген жерінен 35 бас мал табылды.
Сенбі 24 қыркүйекте: Алматы облысы Жамбыл ауданында өткен жексенбіде жоғалған мал саудасымен айналысатын үш жігіттің қаза тапқаны белгілі болды. Ол туралы полиция марқұмдардың туыстарына естірткен.
Қылмыскерлер үш мүрдені Алматыдан 270 шақырым жерге апарып, иен шұңқырға тастап, көңмен көміп кеткен.
Қанды қылмысты тергеу жұмыстары Алматы облысы әкімдігінің назарына алынды.
Бүгін, Ұзынағаш полициясы тексеру нәтижесінен соң, қапыда жазым болған үш азаматтың сүйектерін қайтарып берді.
Жаназа намазы ертең, яғни, 27 қыркүйек күні Алматы облысы Көксу ауданы Қазақстан ауылында сағат 10:30 да оқылады.
Қоғамда зор дүмпу тудырған атышулы оқиға жайлы қазірге дейін ешбір құзырлы орган арнайы мәлімдеме жасаған жоқ.
Қаза болған үш азаматтың артында 9 бала жетім қалды…
Пікір қалдыру