الماتىدا بۇگىن پرەزيدەنت مۇراعاتىندا “جاسامپازدىق پەن تابىستىڭ قازاقستاندىق جولى” دەپ اتالاتىن كورمە اشىلدى دەپ حابارلايدى ازاتتىق ءتىلشىسى. كورمەگە ءبىرىنشى رەت قازاقستاننىڭ مەملەكەت بولىپ قالىپتاسۋ تاريحىنا قاتىستى نورماتيۆتىك جانە زاڭنامالىق قۇجاتتاردىڭ، ستراتەگيالىق جوسپارلاردىڭ تۇپنۇسقالارى، پرەزيدەنت نۇرسۇلتان نازارباەۆتىڭ ونداعان سۋرەتى مەن كىتابى قويىلعان.

كورمەنىڭ ەكى ستەندى قازاقستان مەن اقش-تىڭ ديپلوماتيالىق ىنتىماقتاستىعىنا 25 جىل تولعانىنا ارنالعان. اقش قازاقستاننىڭ تاۋەلسىزدىگىن العاش بولىپ مويىنداعان. كورمەگە قويىلعان حاتتار اراسىندا اقش پرەزيدەنتى ۇلكەن دجوردج بۋشتىڭ قازاقستان تاۋەلسىزدىگىن رەسمي تۇردە مويىنداۋ تۋرالى حاتىنىڭ كوشىرمەسى بار. حات 1991 جىلى 26 جەلتوقساندا جازىلعان. كورمە اشىلعاننان كەيىن بىردەن وتكىزىلگەن دوڭگەلەك ۇستەلدە اقش-تىڭ باس كونسۋلى مارك مۋدي مۇراعات ديرەكتورى بوريس جاپاروۆقا وسى حاتتىڭ كوشىرمەسىن تابىستادى.

اقش ديپلوماتى قۇتتىقتاۋ سوزىندە ەكى جاقتى قارىم-قاتىناستىڭ نەگىزگى دامۋ كەزەڭدەرىن ايتىپ ءوتتى. ول ءسوزىنىڭ اراسىندا ەكراندا نازارباەۆتىڭ 1992 جىلى 19 مامىردا العاش رەت اق ۇيگە جاساعان العاشقى ساپارىنان، بۋش پەن نازارباەۆتىڭ امەريكالىق “تاعا” ويىنىن ويناعانىنان، نازارباەۆتىڭ قازاقستاندا جۇمىس ىستەگەن اقش ەلشىلەرىمەن تۇسكەن سۋرەتتەرىن كورسەتتى.

كورمەنىڭ اشىلۋى مەن دوڭگەلەك ۇستەلگە مەملەكەت جانە قوعام قايراتكەرلەرى، شەتەل ديپلوماتتارى، مەملەكەتتىك مەكەمەلەردىڭ، ۇلتتىق-مادەني ورتالىقتاردىڭ وكىلدەرى، عىلىمي جانە ينتەلليگەنتسيا وكىلدەرى، الماتىداعى وقۋ ورىندارىنىڭ وقىتۋشىلارى مەن ستۋدەنتتەرى قاتىستى. كورمەنى ۇيىمداستىرعاندار كورمە مەن دوڭگەلەك ۇستەلدىڭ “قازاقستاننىڭ تاۋەلسىزدىك جىلدارى جەتكەن جەتىستىكتەرىن” كەڭىنەن قامتىپ، ناسيحاتتاۋ ءۇشىن ۇيىمداستىرىلعانىن ايتادى.

ازات ەۋروپا / ازاتتىق راديوسى