7 желтоқсанда Ақтөбе қаласында жүргiзiлген арнайы iрi операция кезiнде мұнай ұрлады деген күдiкпен қылмыстық топтың бiрнеше мүшесi құрықталған едi. Сондай-ақ Алматыда да арнайы iс-шара ұйымдастырылып,  Еркiн Iзбасар, көлiк жүргiзушiсi ұсталған болатын.  Ұлттық қауiпсiздiк комитетiнiң арнайы ұшағымен Ақтөбеге жеткiзiлген күдiктiлердi тергеу, тағыл­ған айыптың қаншалықты дәлелдi, дәлелсiз екенiн анықтау тиiстi органдардың құзыретiндегi шаруа. Редакциямызға бiлiктi бапкер Бауыржан Нұрмаханов келiп, Еркiн Iзбасарды ұзақ жылдан берi танитынын айтып, оның спортқа қосқан еңбегi жайлы жазған мақаласын ұсынды.  

Мен   Еркiн Iзбасар­мен 1980 жылдардан берi таныспын. Екеумiз күрес залында танысып, таныстығымыз достыққа, жолдастыққа ұлас­ты. Ол Ақтөбе өңi­рiнде еркiн күрестiң дамуына ерекше көңiл бөлдi. Өзi де жастайынан күресiп, жол апатына ұшырағанға дейiн спортпен шұғылданғандығынан болар.

Еркiн Ақтөбе өңiрiнiң еркiн күресi дамуы үшiн, жастар өсiп шы­ғуы үшiн көп күш салды. Жастар өсiп шығуы үшiн Ресейдiң Хасавюрт қапласындағы бапкер­лердi шақыртып, бiздiң балуандарды сол жаққа жiберiп, Хасавюрттың, Ресейдiң ұлттық құрамасына енген спортшыларын Ақтөбеге шақыртып, бiрлескен оқу-жаттығу жиынын өткiздi. Күнi кеше Алматыда аяқталған Конфедерация кубогы үшiн өткен додаға әзiрлiктi Ақтө­бенiң еркiн күрес бал­уандары Хасавюртта өткiздi. Хасавюрттағы жаттығу жиынына жүре­тiн балуандардың жолына қысылтаяң уақытта қаражат табылмай, Еркiн балуандарды жi­беру үшiн ақша iздеп қиналғанын бiлемiн.

Бiрде Ақтөбеге бар­ғанда Еркiн менi бал­уандардың әзiрлiк өткi­зе­тiн залына ертiп барды. Өзiнiң болашақта атқаратын шаруасымен бөлiскен едi сонда. “Бауыржан, неге бiздiң Ақтөбе қаласында да Хасавюрттағыдай балуандар мектебi болмайды? Хасавюртта Магомед Гусейнов ашқан   мектеп-интернатта 200 балуан бар. Солардың бәрi интернатта жатады, сол жерде жаттығады. Бәрi iшiнде. Осы мектептiң түлек­терi арасынан әлем чемпионы,Олимпиада ойындарының жеңiм­пазы мен жүлдегерлерi шықты. Неге бiз де сондай жүйемен жұмыс iстемеймiз? Еркiн күрес елiмiзге келгелi алпыс жылға жуықтады, әлi бiрде-бiр әлем чемпио­ны жоқ. Жарайды, ке­зiнде КСРО-ның шетқақпайлауымен   Әбiл­сейiт Айханов, Аманжол Бұғыбаев, Амангелдi Ғабсаттаровтың жарқырап көрiнуiне мүмкiндiк болған жоқ дедiк. Тәуелсiз­дiгiмiздi алғанымызға да 25 жыл толды, еркiн күрестен есе­мiздiң кетiп жүр­генiне қарным ашады” деген едi. Және өзi балуандар мектебiн саламын деген жерге ағаш көшеттерiн де отырғызып, алғашқы қадамын бастаған да болатын. Еркiн күрестен биылғы Рио Олимпиадасында 57 келi салмақта елi­мiз­дiң намысын Нұр­ислам Санаев қорғады. Рас, бұл да легионер. Ресейден алдырған балуан, бiрақ бұл балуан Қазақстанға келгенге дейiн Ресей­дiң iшкi бiрiншiлiгiнде топ жарып, құрамасына iлiнген жоқ. Күрес жолында ендi-ендi көрiнiп келе жатқан Санаевтан тамаша балуан шығатынын бiлiп елiмiзге алдырды. Былтырғы АҚШ-та өткен әлем бiрiншiлiгiнде жолдаманы иеленiп, Рио Олимпиадасында бел­дестi. Нұрислам Санаев Бразилияда өткен жаз­ғы Олимпиада ойындарында әзiр­байжан балуаны Гаджи Алиевпен күрескенде Са­наев­тың алты ұпайын төрешiлер көпе-көрнеу бермей қойды. Сонда Еркiн Iз­басар белдесуге тө­релiк еткен қа­зылардың бәрiн жиып алып сiл­кiлеп-сiлкiлеп ұрысқан болатын. “Бұларды осылай тойтарып қоймаса, қазақ балуандарына тiзесiн батыра бередi” деп күйiнген едi сонда.   Бразилия жерiнде кү­реске тө­релiк еткен қазыларды жиып қойып ұрысқан Еркiннiң қасында тұрып Дәулет Тұр­лыхановтың балуандарымыз үшiн күйген, ара түскен кезi есiме түстi.

Мен бапкер ретiнде төрт жазғы Олимпиада ойындарына балуан баптап қостым. Даңқты балуан Дәулет Тұрлыхановтың бiздiң бал­уандардың есесi кеткен жерде тiкелей өзi араласып, төрешiлер­дiң бұра тартуына жол бермегенiн көргенмiн. Еркiн де қазақ спортының, балуандардың намысы үшiн деп жүрген азаматтың бiрi мен үшiн.Қазақ спортының дамуы үшiн үлесiн қосты.

 Бауыржан Нұрмаханов,

Алматы қаласы

zhasalash.kz