اقش بيلىگى 35 رەسەيلىك ديپلوماتتى ەلدەن قۋىپ، ماسكەۋگە جاڭا ەكونوميكالىق سانكتسيا سالۋ تۋرالى شەشىمىن جاريالادى. بۇل – ۆاشينگتوننىڭ اقش-تاعى پرەزيدەنت سايلاۋى كەزىندە “رەسەي ۇيىمداستىردى” دەپ سيپاتتالعان حاكەرلىك شابۋىلعا جاۋابى.

اق ءۇي 29 جەلتوقسان كۇنى جاريالاعان بۇل شەشىمنىڭ قابىلدانعالى جاتقانىن پرەزيدەنت باراك وباما بۇعان دەيىن دە ايتىپ قالعان. وبامانىڭ پرەزيدەنتتىك مەرزىمىنىڭ بىتۋىنە ءبىر ايداي عانا ۋاقىت قالدى. جاڭا سايلانعان پرەزيدەنت دونالد ترامپ اق ءۇي مەن تسرۋ-دىڭ پرەزيدەنت سايلاۋى كەزىندە رەسەيدىڭ حاكەرلىك شابۋىل جاساعانى تۋرالى ماعلۇماتتارىنا قۇلاق اسپاي كەلگەن. 20 قاڭتاردا قىزمەتىنە كىرىسەتىن ترامپ اقش-تىڭ رەسەيگە سالعان سانكتسيالارىن سوزۋعا قاجەتتىلىك بار ما دەگەن دە ماسەلە كوتەرگەن.

بەيسەنبىدە اق ءۇي تاراتقان مالىمەتتە رەسەيدىڭ مەريلەند پەن نيۋ-يوركتەگى ديپلوماتيالىق وكىلدىكتەرىنىڭ تىڭشىلىق جاسادى دەگەن كۇدىكپەن جابىلاتىنى جازىلعان. سونىمەن بىرگە 35 رەسەيلىك ديپلومات تىڭشىلىق جاساعانى ءۇشىن “پەرسونا نون گراتا” دەپ جاريالانىپ، ولاردىڭ اقش-تان كەتۋىنە 72 ساعات ۋاقىت بەرىلگەن. بۇعان قوسا ۆاشينگتون رەسەيلىك ارنايى ورگاندار – گرۋ مەن فسب-ءنىڭ توعىز وكىلىنە قارجى جانە ساياحات سانكتسيالارىن سالدى.

پرەزيدەنت وبامانىڭ اتىنان جاريالانعان مالىمدەمەدە: “رەسەيدىڭ اگرەسسياشىل ءىس-ارەكەتىنە قارسى جاساعان تۇتاس شارامىز بۇل عانا ەمەس. ۋاقىتى مەن مەكەنىنە قاراي ءتيىستى شارا قولدانا بەرەمىز، ولاردىڭ كەيبىرى ءالى جاريالانعان جوق” دەگەن جولدار بار.

تسرۋ، فبر مەن امەريكالىق باسقا دا بارلاۋ ۇيىمدارى رەسەي ۇكىمەتىنەن نۇسقاۋ العان حاكەرلەر سايلاۋالدى ناۋقان كەزىندە اقش دەموكراتيالىق پارتياسىنىڭ جانە باسقا دا لاۋازىمدى وكىلدەردىڭ سەرۆەرى مەن ەلەكتروندىق پوشتالارىنا بۇزىپ كىردى دەگەن تۇجىرىم جاساعان.

9 جەلتوقساندا The Washington Post گازەتى تسرۋ رەسەيلىك حاكەرلەر تەك امەريكالىق سايلاۋ جۇيەسىنە نۇقسان كەلتىرىپ قويماي، ترامپتىڭ پرەزيدەنت سايلاۋىندا جەڭىپ شىعۋىنا كومەكتەسپەك بولدى دەپ حابارلاعان. The New York Times گازەتى حاكەرلەردىڭ رەسپۋبليكالىق پارتيانىڭ كومپيۋتەرلەرىنە دە بۇزىپ كىرگەنىمەن بۇل پارتياعا نۇقسان كەلتىرەتىندەي ەلەكتروندىق حاتتار مەن ماتەريالداردى اشكەرە ەتپەگەن دەپ جازعان.

ساراپشىلار بۇدان سوڭ رەسەيدىڭ حاكەرلەرى ترامپتىڭ قولىن اق ۇيگە جەتكىزۋدى ماقسات ەتتى دەگەن قورىتىندى جاساعان. دونالد ترامپ 8 قاراشادا وتكەن پرەزيدەنت سايلاۋىندا دەموكرات كانديدات حيللاري كلينتوننان ۇستەم تۇسكەن بولاتىن.

بۇل تۇجىرىمداردى ترامپ ۇنەمى جوققا شىعارىپ كەلگەن. 11 جەلتوقسان كۇنى بەرگەن ءبىر تەلەسۇحباتىندا ول دەموكراتتار ءوزىن جەڭىستەن ايىرۋ ءۇشىن تسرۋ-ءدىڭ مالىمەتىن پايدالانىپ باعىپ جاتىر دەگەن پىكىر ايتقان.

بىراق ترامپ كونگرەستەگى رەسپۋبليكالىق پارتيا وكىلدەرىنىڭ تاراپىنان دا قىسىمعا ۇشىراي باستادى. رەسپۋبليكاشىل زاڭ شىعارۋشىلار رەسەيلىك حاكەرلەردىڭ ارەكەتىن جان-جاقتى تەكسەرۋدى تالاپ ەتىپ جاتىر. قاڭتاردا سەناتتىڭ ءۇش بىردەي كوميسسياسى بۇل ماسەلەنى قاراماق.

كرەمل اقش-تىڭ دەموكراتيالىق پارتياسى مەن سايلاۋ جۇيەسىنە جاسالعان حاكەرلىك شابۋىلعا قاتىسى جوق ەكەنىن مالىمدەپ كەلەدى. بىراق رەسەي پرەزيدەنتى ۆلاديمير پۋتين بۇل ماسەلەگە قاتىستى ەكىۇشتى كوممەنتاريلەر ايتىپ قالعان.

ازات ەۋروپا / ازاتتىق راديوسى