ۇستازدىق ەتۋ بالالارعا ساباق بەرۋمەن شەكتەلمەيدى ەكەن. بۇل كىسىلەردىڭ ءبىر باسىنا قىرۋار جۇمىس جۇكتەپ قويىپتى-دەپ جازدى kaz.365info.kz.

روكسالانا تسوي ەسىمدى قارىنداسىمىزدىڭ جازباسىن وقىپ كوز جەتكىزدىك بۇعان. روكسالانا ءوز كاسىبىنىڭ جاقسى جاعى مەن كەمشىلىگىن ايتىپ بەرىپتى. ويلانتىپ تاستادى. مۇعالىمنىڭ جۇمىسى ماشاقات ەكەن عوي. سونىمەن، ول نە دەيدى؟

مەن ءوز كاسىبىم تۋرالى ايتقىم كەلەدى. مەن مۇعالىممىن.

كەمشىلىگى:
1. جالاقى. 50-55 مىڭ ايلىقپەن ۇزاققا شاپپايسىڭ. شاماڭ بەلگىلى. مۇمكىندىگىڭ شەكتەۋلى. قارىزعا ءومىر سۇرەسىڭ. قارىز الاسىڭ، قارىز قايتاراسىڭ. جولىمنىڭ وزىنە جالاقىمنىڭ تەڭ جارتىسى كەتەدى.

2. جۇمىس كەستەسى. جۇمىستى قاي ۋاقىتتا باستايتىنىڭ ماڭىزدى ەمەس. تاڭەرتەڭ كەلسەڭ دە، تۇستە كەلسەڭ دە ءبارىبىر سەن جۇمىستا ءومىر سۇرەسىڭ. ماسەلەن مەن 8-دەن تۇسكى ساعات 1-گە دەيىن جۇمىس ىستەسەم دە، تىنىش وتىرعىزبايتىنىن بىلەم. تۇسكى اسىمدى اپىل-عۇپىل ىشەم دە بىرەۋدىڭ ورنىنا ساباق بەرەم. سەبەبى، مۇعالىم مۇلدەم جەتىسپەيدى. سەنىڭ 12 ساعات بويى تىكەڭنەن تىك تۇرىپ جۇمىس ىستەگەنىڭ ەشكىمدى قىزىقتىرمايدى. مەكتەپ سەنىڭ ۇيىڭە اينالادى. كوزىڭنىڭ استى ءىسىپ كەتكەن تۇرىڭمەن جۇرگەنىڭ. مۇندايدا ءوز-ءوزىڭدى كۇتۋگە شاماڭ دا، قۇلقىڭ دا بولمايدى. ءۇزىپ-جۇلىپ ىشكەن تاماعىڭ دەنساۋلىققا اسەر ەتەدى.

3. قاعازباستىلىق. بىتپەيتىن ەسەپ. جوسپارلار. كەستەلەر. ەشكىمگە كەرەك ەمەس، ءبىر قۇشاق پاپكى قۇشاقتاپ جۇرگەنىڭ. بۇل پاپكىدەگى اقپار كوميسسياعا ارنالعان. ال كوميسسياعا قاراساڭ، ولار وسى مەكتەپتە ءومىر سۇرەتىن سياقتى.تاۋسىلمايتىن تەكسەرىس. ءبىزدىڭ كوميسسياعا دايىن ەكەنىمىزدى تاعى ءبىر كوميسسيا تەكسەرەدى. تەكسەرۋشىلەر سەنىڭ سىنىبىڭداعى بالالاردىڭ سانىنان كوپ. ءبىر قۇجاتىڭ تولىق بولمادى ەكەن، كوميسسيا شاشىڭدى جۇلادى. سەنى اقىماق قىپ كورسەتۋگە تىرىسادى.  سوسىن داپتەر…كوتەرۋدەن شارشايسىڭ. قۇشاعىڭا سىيمايدى. سىنىبىڭدا 37 بالا بار بولسا، وسى 37-ءنى 4-كە كوبەيتىڭىز. كوبەيتتىڭىز بە، مىنە وسىنشا داپتەردى ارقالاپ جۇرەسىڭ، ونىسى ءوز الدىنا بۇلاردى تەكسەرۋ كەرەك. 

4. پاتەر ارالاۋ. جىلىنا ەكى رەت جازدا جانە جاڭا جىلدان كەيىن ساقىلداعان سارى ايازدا پاتەر ارالاپ جاسى 0-دەن 18-گە دەيىنگى بالالاردى ساناقتان وتكىزەمىز. قاشان، قايدا تۋدى. قايدا وقيدى. ەگەر ءبىزدىڭ مەكتەپتە وقىماسا، ونىڭ مەكتەبىنە بارىپ، انىقتاما الامىز. ارقايسىمىزعا 100-200 پاتەردەن بەرىپ قويعان. ءبىزدىڭ ادامدار دا دولى عوي. ەسىگىن اشپايدى، تارس جاۋىپ الادى. بوقتاپ تاستايدى. تيىسەتىندەر دە تابىلادى. وسىنىڭ بارىنە ءتوزۋ كەرەك. انىقتاما جينامادىڭ، ساعان ءتيىستى پاتەرگە كىرمەدىڭ ەكەن ەسكەرتۋ الاسىڭ. 3 رەت ەسكەرتۋ الساڭ جۇمىستان قۋىپ شىعادى. 

5. سىرتقى كەلبەتىڭ مەن جەكە ءومىرىڭ… تۋرالى جازىپ تا كەرەگى جوق. ءۇستىڭ بور-بور، سيا-سيا، ءتىپتى اجەڭ دە كيمەيتىن كيىممەن جۇرگەنىڭ. جۇمىستاعى جۇرتتىڭ دەنى ايەل. ايەل بولعاندا دا شەتىنەن دولى، اشۋلانشاق كۇيەۋگە شىقپاعان نەمەسە جالعىزباستى قاتىندار. ومىردەن قاجىعان فيزرۋك. ءيا، سەنى دە سونداي تاعدىر كۇتىپ تۇر، روكسولانا. ءبىر-ەكى جىل كۇت. سەن دە سولاردىڭ كەبىن كيەسىڭ. مەكتەپتىڭ وتىمەن كىرىپ، كۇلىمەن شىعىپ زومبيعا اينالعان قىزدى كىم الادى؟ كانە، كىم بار؟ ەشكىم ۇندەمەيدى عوي!  جىگىتتەر دە قىزىق. «قىدىرمايتىن، ۇيدە وتىراتىن قىز كەرەك» دەگەندە سوندايسىڭدار. مەن كلۋبتىڭ اتىن ەستىگەنىم بولماسا، زاتىن كورگەن ادام ەمەسپىن. تاڭعى ساعات 6-دا تۇرسام قايداعى كلۋب. بۇل ۋاقىتتا مەنىڭ قۇرداستارىم ءومىردىڭ قىزىعىن كورىپ ءجۇر. كيگەندەرى كەرەمەت كويلەك، وپا-دالاپ، جاساندى قاس…ال مەن بولسام، بۇل ۋاقىتتا بالالاردىڭ باقىلاۋ جۇمىستارىن تەكسەرىپ وتىرام. ءيا، ەركەكتەر كۇتىمدى قىزدى جاقسى كورەدى، مويىنداۋىم كەرەك. سوندا مەندە جەكە ءومىر جوق پا؟ ول قاشان پايدا بولادى؟ 

6. ەندى جۇمىسىمنىڭ جاقسى جاعى تۋرالى ايتسام. ول بىرەۋ عانا. بالالار. ولار سەنى شىن كوڭىلمەن جاقسى كورەدى. ارينە، بۇل ءۇشىن ولاردىڭ ماحابباتىنا لايىقتى ۇستاز بولۋىڭ كەرەك. مىسالعا، مەن سياقتى. مەن مەكتەپكە كەلگەندە، ولار الدىمنان شىعادى. قۇشاقتايدى. ساعىنىپ قالعانىن ايتادى. مىنە، سول كەزدە بۇل كاسىپتى نەگە تاڭداعانىڭدى تۇسىنەسىڭ. كەيبىر قوشاقاندار قاتەلەسىپ مەنى ماما دەپ قويادى. كۇندەرىنىڭ قالاي وتكەنىن اڭگىمەلەپ بەرەدى. سەن ولاردىڭ ەڭ جاقىن دوسىسىڭ. سولاي. 

 P.s. ەگەر مەنى وسى جازبا ءۇشىن جۇمىستان شىعارىپ تاستاسا، مەنى جۇمىسقا الىڭىزدارشى.