كوز قاراس

ارتىق ماماندار دايىنداپ، ارتىق اقشا شاشۋ كىمگە كەرەك، مامين مىرزا!

kerey.kz

 |  May 16, 2019

ونەركاسىپ سالاسىندا جاڭادان جۇمىس ورىندارى اشىلۋدا دەپ كوپ
ۇرانداتقانىمىزبەن ونىڭ ناقتى كولەمى كوڭىل كونشىتەرلىك ەمەس. ستاتيستيكا جونىندەگى
كوميتەتتىڭ مالىمەتتەرىنە قاراعاندا ەلىمىزدەگى اسا ءىرى جانە ورتاشا كاسىپورىنداردا بارلىعى
2 ملن. 416 مىڭ ادام ەڭبەك ەتەدى ەكەن دە ۇستىمىزدەگى جىلى ولار وسى ساننىڭ تەك 0,5 پايىزى
كولەمىندە عانا ، ياعني 11 مىڭ جاڭا جۇمىسكەر ماماندار قابىلداي الادى.
جالپى ەكونوميكامىزدا ءوسىم بار بولعانىمەن تەحنيكالىق ماماندىقتارعا دەگەن
سۇرانىس بارىنشا تومەن بولىپ شىقتى. 2014-2018 جىلدار ارالىعىندا ازىق-تۇلىك
وندىرىسىندە – 1600, ءتۇستى مەتاللۋرگيادا – 700, اگروحيميادا – 800, تەمىرجول تەحنيكاسى
وندىرىسىندە – 100 عانا جاڭا جۇمىس ورىندارى اشىلعان. بۇل 5 جىلدىق مەرزىمگە تىم از. ول
ول ما، مۇناي-گاز سالاسىندا جاڭا جۇمىس ورىندارى ءتىپتى اشىلماعان. ال قۇرىلىس
ماتەريالدارىن جاساۋ سالاسىندا – 8900, مۇناي وڭدەۋدە – 1000, ونەركاسىپكە قاجەتتى
حيميكاتتار دايىنداۋدا – 1800, مۇناي وڭدەۋ سالاسىنا جاراقتار شىعارۋ مەن مۇناي
وندىرۋدە – 1000, ەلەكتر جاراقتارىن شىعارۋدا – 1300, اۆتوكولىك شىعارۋدا – 300,
اۋىلشارۋاشىلىعى تەحنيكالارىن شىعارۋدا – 400 جۇمىس ورىندارى قىسقارعان.
جاعداي وسىلاي بولسا دا ۇكىمەت جۇمىسشى ماماندىقتارىن دايىنداۋدىڭ
قانشالىقتى قاجەتتىلىگىنە ءجىتى نازار اۋدارماي، ۇرانشىلدىققا سالىنىپ وتىرعانىن
ماجىلىستەگى «حالىق كوممۋنيستەرى» فراكتسياسى اشىپ، اشكەرەلەپ وتىر. فراكتسيا جەتەكشىسى
ايقىن قوڭىروۆتىڭ ۇكىمەت باسشىسى ا.مامينگە جولداعان ساۋالىنان وسىنى كورۋگە
بولادى. وندا «بارىنە تەگىن كاسىپتىك-تەحنيكالىق ءبىلىم» باعدارلاماسى جاعدايدى تولىق
ەكشەمەي نەمقۇرايلىقپەن جاسالىپ، بيۋدجەتتىڭ قاراجاتىن بوسقا شاشۋدا ەكەندىگى
ايتىلعان.
ارينە، ناقتى قاجەتتىلىكتىڭ كولەمىن زەرتتەمەي، 670 مىڭ تەحنيكالىق مامان
دايىندايمىز دەپ داۋرىققاندىق – ۇرانشىلدىقتىڭ ناعىز كورسوقىرلىق كورىنىسى. جوعارىدا
ايتقانىمىزداي بىزگە جىلىنا 10-11 مىڭ عانا تەحنيكالىق مامان كەرەك، ال بەس جىلدا ول 60
مىڭنان اسپايدى…
بىراق جاستاردىڭ كوبى بۇل بوس داۋرىقپاعا جەلىككەن جوق، ويتكەنى ۇكىمەتپەن
سالىستىرعاندا ولار تەحنيكالىق ماماندىقتارعا دەگەن سۇرانىستىڭ تومەن ەكەنىن ومىردە
كورىپ ءجۇر. سوندىقتان باعدارلاما العاشقى كەزەڭىنىڭ وزىندە كوزدەگەن ماقساتىنا جەتە
الماعان. الايدا مەملەكەت بۇعان ءمان بەرىپ جاتقان جوق، كەرىسىنشە جىل سايىن باعدارلاما
بويىنشا بولىنگەن شىعىنداردى ارتتىرا بەرىپ، بيۋدجەتتى سورلاتۋدا. الدە… الدە ءبىزدىڭ
ۇكىمەت مەملەكەتتىڭ بە، الدە تەحنيكالىق ماماندىقتار دايىندايتىن جوو-لاردىڭ
مۇددەسىن كوزدەي مە، وسى جاعى بەلگىسىز…
«حالىق كوممۋنيستەرى» فراكتسياسى ءوز ساۋالدارىندا ۇكىمەتتىڭ نازارىن وسى ماسەلەنى
ءجىتى زەرتتەۋگە نازار اۋدارۋ ءۇشىن تومەندەگىدەي سۇراقتار قويىپتى:

2

1.«بارىنە تەگىن كاسىپتىك-تەحنيكالىق ءبىلىم» باعدارلاماسى بويىنشا جاڭادان تۇسەتىندەرگە
اقشا شىعارۋعا قانداي نەگىز بارى ايقىندالدى ما؟
2.ناقتى ماماندىقتار بويىنشا قانشا ادامعا كاسىپتىك-تەحنيكالىق ءبىلىم بەرۋ كەرەكتىگى
قانداي دەرەكتەرگە سۇيەنىپ ەسەپتەلدى؟ مۇنىڭ عىلىمي نەگىزى بار ما؟
3.يندۋستريالاندىرۋ باعدارلاماسى بويىنشا باسىمدى باعىتتار دەپ بەلگىلەنگەن سالالاردا
جۇمىس ورىندارىنىڭ ازايۋ سەبەبى نەدە؟ ولاردى كوبەيتۋ ءۇشىن قانداي شارالار
قاراستىرىلعان؟
مىنە، وسىنداي ناقتى سۇراقتار قويىلعان، بىراق سوعان ۇكىمەت دايەكتىلىكپەن جاۋاپ
بەرە الار ما ەكەن…

س.ەلەۋ، ساراپشى

kerey.kz